Read Talaud 1 TIMOTIUS 3 Bible Online

1 TIMOTIUS 3 - Talaud bible

1 TIMOTIUS 3

¹Mangke atonna wisara'u indi, “Taumata apan maapulu maola'a mallal᷊u'adda jamaatta, maapulun sambau manara apan maarega.”

²Sangkatou mallal᷊u'adda jamaatta ṛinone taumata tawe sal᷊ane, tumba'u sangkatou awingnge, masabare, pande, wuṛṛu maaduna; i tou maapulu manol᷊oho raho su wal᷊ene, wuṛṛu wotongnge mangaṛṛa'a taumata;

³arie taumata taṛṛa wu'anna, ara'e taṛṛa wawul᷊o. Ewe'e i tou ṛinone sangkatou masaṛṛionto'a, wuṛṛu mal᷊utu su paddarame. Tawe wotongnge i tou wal᷊iun roitta.

⁴Ṛinone i tou masingkata mangatokku lal᷊oṛṛon bal᷊ene ringannu mapia, wuṛṛu mangaṛṛa'a al᷊aṛṛanangnge matuṛṛuta wuṛṛu maadatta si tou.

⁵Ana waugu amungkangu taumata wagga mangatokku lal᷊oṛṛon bal᷊ene sassane, ereapa i tou wotongnge mangatokku jamaattu Ruata?

⁶Sangkatou mallal᷊u'ada jamaatta tawe wotongnge taumata wakkute sinumutta Saṛṛani, ana waugu takka i tou mabbal᷊i mawunga see awontohanna ere Setanna dorone.

⁷Ṛinone i tou taumata apan pia aranne mapia sulal᷊ummu soa; ana waugu amungkangu tawe aroddi, ne i tou sarun al᷊uandahannu taumata, na'oman sara manawo su liman Setanna.

⁸Ṛinone masasumbala jamaatta lai taumata mapia wuṛṛu matul᷊ida; tawe wal᷊iun doitta tawe tumaniten manambo ma'inumma anggore.

⁹Ṛinone i mangitou matohassa su pangangimanna ringannu naungnga waresi su al᷊aṛṛa'u pangangimannu taumatan Saṛṛani apan suete niapaal᷊iatta'u Ruata.

¹⁰Ṛinone i mangitou iannamma asuene, wuṛṛu amungkangu i mangitou tawe sal᷊ane, wakkute udde i mangitou wotongngete massumbala sulal᷊ummu jamaatta.

¹¹Awingngi mangitou lai ṛinone taumata mapia, wal᷊ine taumata apan taṛṛa watti'u wahia. I mangitou ṛinone masingkata mattuṛṛadana, wuṛṛu tawe mamahia su al᷊awo'u inolaanna.

¹²Masasumabala jamaatta ṛinone awingnge tumba'u sambau. Ṛinone i tou masingkata mangatokku al᷊aṛṛanangnge wuṛṛu lal᷊oṛṛon wal᷊ene ringannu mapia.

¹³Manga taumata apan massumbala ringannu mapia sulal᷊ummu jamaatta, sarun addatanna wuṛṛu lembon waṛṛani mabbisara su ola'u pangangimanni mangitou si Kristus.

¹⁴I ya'u mangantimma tate mal᷊anu lai ya'u sarun mattembo si'o. Salaiwe aroddi, ya'u namoṛṛetu suratta indi lai si'o,

¹⁵tadea'u amungkangu i ya'u mal᷊annu, i'o masingkate ereapa i ite mabbiakka maola'a walahannu Ruata, eteudde jamaattu Ruata apan wiakka. Ete jamaatta indi apan naola'a alu tatungkale wuṛṛu rapappaku al᷊aṛṛa'a apan naṛṛino wuassu Ruata.

¹⁶Taweddu saran sangkatou wotongnge massinaada, aroddi ahewalle addapingu agaman kite: I tou namasilon batanganne sulal᷊ummu lihiddu taumata, wuṛṛu niapaal᷊iatta'u Ghaṛṛahon Duata, see aellehannu manga mala'ekatta. Wattinge niapararingikka su wallatu manga walahanna, wuṛṛu i Tou apangimananna su ahewallu runia wuṛṛu niapaasengkenga su surga.