Read Talaud 2 TIMOTIUS 2 Bible Online

2 TIMOTIUS 2 - Talaud bible

2 TIMOTIUS 2

¹Timotius, ana'u! Ṛinone i'o mabbal᷊i matohassa ana waugu al᷊amatta apan nionggolla si ite, ana waugu i ite uaaukka ringanni Kristus Yesus.

²Al᷊aṛṛa'a paarorone suete niaringiṛṛanu wuassia'u su saruannu awadaalla, ṛinone itantillu su manga taumata apan wotongnge apangimananna wuṛṛu pande mangaṛṛa'a taumata waine.

³I'o ṛinone sarun matataṛṛangnga lai ere tantaran Kristus Yesus apan matuṛṛutta.

⁴Sangkatou tantara apan tantal᷊anna mammanara, maddiri mammanara hausanne sassane, ana waugu i tou maapulu malluassa naungngu tembonanne.

⁵Sangkatou mattandinganna tawe maauntunga sulal᷊ummu sambau tandinganna, amungkangu i tou tawe tumuṛṛutta manga atoranne.

⁶Mabbawailla apan suete nammanara maṛṛimada, ete i tou apan paarorone maasomba hessin sinuananne.

⁷Ṛingira'a wisara'u udde, ana waugu Mawu sarun mangonggolu ṛingidda si'o ipassunna sarangkanambone udde.

⁸Naungete indi: Watti'u Al᷊al᷊uassa apan ta'u niapaasingkata udde, eteudde watti'a su ola'i Yesus Kristus, papapulunni Daud; ete i Tou Kristus apan nabbiakka apia wuassu papate.

⁹Ana waugu mabatti'u Watti'u Al᷊al᷊uassa udde, i ya'u natataṛṛangnga; ewe'e lai na'oman sara niṛṛapussa ere sangkatou taumata lal᷊eo. Arawe wisaran Duata tawe iaṛṛapussa.

¹⁰Ana waugu udde i ya'u tawe matta'uttu sarangkanambone udde apan hunane su manga taumata apan suete nipilen Duata, tadea'u i mangitou lai maasomba asasal᷊amatta apan ionggola sulal᷊ummi Kristus Yesus, wuṛṛu tatantalongannu awawantuga saran mal᷊annu-l᷊annu.

¹¹Mangke atonna wisara'u indi, “Amungkangu i ite suete nate suadio'a ringanni Tou, i ite sarun mabbiakka lai suadio'a ringanni Tou.

¹²Amungkangu i ite sidutu matammuda, i ite sarun mamarenta lai suadio'a ringanni Tou. Amungkangu i ite massinaadi Tou, I Tou lai sarun massinaadi ite.

¹³Amungkangu i ite mal᷊awangnga I Tou sidutu matuṛṛutta ana waugu i Tou tawe maapanompolla watangan-Ne sassane.”

¹⁴Ṛinone i'o mapaanaungnga su manga taumata su ola'u sarangkanambone indi. Su saruannu Ruata, tantiroi i mangitou, tadea'u tawe mattatiakka su ola'u manga wisara wakku. Udde tawe gunane, ewe'e tumba'u mangngal᷊iwu manga taumata apan maddaringikka.

¹⁵Ṛinone i'o mammanara atonna-tonna tadea'u i'o a'uannu Ruata mola'a sangkatou taumata apan wotongnge mangimbe si Tou. Pappandumpe tadea'u i'o tawe masili su ola'u manaranu, ewe'e mangngaṛṛa'u al᷊aṛṛa'a apan su ṛinone wuassu Ruata.

¹⁶Pangindauten manga hatto tawe gunane wuṛṛu mangal᷊uandaga Ruata. Manga hatto ereudde tumba'u maaola'a taumata lembon dal᷊eo.

¹⁷Al᷊aṛṛa'u manga taumata udde maal᷊iu ere radda'a kanker apan mahiadda. Su wallatti mangitou nasutta lai Himeneus wuṛṛu Filetus.

¹⁸I mangitou suete nalliu wuassu al᷊aṛṛa'a apan su ṛinone, wuṛṛu nangal᷊iwun pangangimannu sangkawageanganna taumata. I mangitou nabbisara manungku pabbawangunna wuassu papate suete nariaddi.

¹⁹Arawe pinangiananne matohassa apan niola'u Ruata, tawe ia'io'a. Su wowone uawoṛṛetta arendi, “Mawu masingkattu manga taumata pussa'a-Ne”, wuṛṛu “Taumata apan mabbisara manungku i tou pussa'an Mawu, taumata udde ṛinone tate ma'ola'a inolaanne apan nassal᷊a”.

²⁰Sulal᷊ummu wal᷊e apan wahewalla pia al᷊awo'u saranapa. Piaddu niola'a wuassu sal᷊a'a ara'e, wul᷊awanna, arawe piaddu lai wuassu alu ara'e leta'a. Pia ipappaatta su pandumanna apan mawantuga, wuṛṛu pia lai ipappaatta su tudda inanaramanna.

²¹Taumata apan mammaresi watanganne wuassu anambon al᷊al᷊eo, taumata udde sarun ipaatta su pandumma apan apianne. I tou maola'a pussa'a apianne wuṛṛu mahuna su mawune. I tou sasaddianna ipaatta su al᷊awo'u manara apan mapia.

²²Pangindau manga lal᷊umanna'u taumata dario'a. Pabbiakke tumuṛṛuttu apulun Duata, paatuṛṛutta su al᷊aṛṛang-Nge wuṛṛu paarangngu taumata sansul᷊unga, wuṛṛu pia atatammudu naungnga. Pabbiakke aroddi suadio'a ringanni mangitou apan sussal᷊ande madorongnga tul᷊unganna su Mawu ringannu naungnga waresi.

²³Arie lumal᷊o'a su pattatiakku manga taumata woddo apan waggan apa-apa. I'o masingkatta manungku sarangkanambone udde tumba'u mapaal᷊apputu pattatiakka.

²⁴Taumata apan mammanara manaran Mawu tawe ṛinone mattatiakka; i tou ṛinone masaṛṛionto'a su anambon taumata, wuṛṛu wotongnge mangaṛṛa'a taumata ringannu mapia wuṛṛu masabare.

²⁵I tou ṛinone ringannu masi'ome mangaṛṛa'a manga taumata mal᷊awanga; doronganna Ruata sarun mangonggolu allo su manga taumata udde mawal᷊u wuassu manga rosan mangitou wuṛṛu ma'illal᷊a al᷊aṛṛa'a su ṛinone.

²⁶Ringannu aroddi i mangitou maatutukke apia, wuṛṛu napallose wuassu seddan Setanna apan suete nangiitta si mangitou wuṛṛu mammata'i mangitou tumantalongnga apulune.