Read Talaud TITUS 3 Bible Online

TITUS 3 - Talaud bible

TITUS 3

¹Paanaunga'a su manga lal᷊oṛṛon jamaatta tadea'u i mangitou matuṛṛuta manga piaṛṛange wuṛṛu tembonannu araratuanna, see matuṛṛuta wuṛṛu maapulu ma'ola'a manga inolaanna apan mapia.

²Wal᷊oa'a si mangitou tadea'u tawe mangal᷊uandaga ara'e matatiakku manga taumata, ewe'e mabbiakka masaṛṛionto'a. Ṛinone i mangitou sidutu masambiolo su saruannu anambon taumata.

³Ana waugu dorone i ite sassane lai woddo, niumal᷊iwu wuṛṛu mal᷊awangnga. I ite niallangngu al᷊awo'u aapulun runia; i ite mabbiakka ringannu pandumanna apan lal᷊eo wuṛṛu mangngune, wuṛṛu uasaseetta.

⁴Arawe Ruata, Punnu Sal᷊amatti ite napaal᷊iatta'u darangngu-Ne wuṛṛu apapian naung-Nge si ite.

⁵I Tou nanal᷊amatta si ite, wal᷊ine ana waugu i ite suete na'ola'a apapia, ewe'e ana waugu i Tou sassane tinumal᷊antupi ite. I Tou nanal᷊amatta si ite sulal᷊ummu Ghaṛṛahon Duata, apan nangonggolu arariaddianna wakku si ite wuṛṛu wiakka wakku ringannu nangukkassu daṛṛa-Ne si ite.

⁶Ruata namobbokku Ghaṛṛaho-Ne si ite sulal᷊ummu Anang-Nge Yesus Kristus, Ratum Punnu Sal᷊amatti ite,

⁷tadea'u wuassu darangngu Mawu Yesus, i ite wotongnge maaukka apia ringannu Ruata wuṛṛu i ite maasomba wiakka tutune wuṛṛu saran mal᷊annu-l᷊annu apan aantimanni ite.

⁸Wisara indi atonna-tonna. I ya'u maapulu i'o mangaṛṛa'u olangnge indi, tadea'u manga taumata apan mangngimanna Ruata atonna-tonna maddea'a ma'ola'a manga manara apan mapia wuṛṛu mahuna su anambon taumata.

⁹Pangindaute manga pattatiakka apan tawe gunane, manga watti'u al᷊amona, pattatiakka wuṛṛu pabbawawul᷊o su ola'u titan agama. Sarangkanambone udde tawe gunane wuṛṛu tawe gessine.

¹⁰Taumata apan mandantan pattatiakka sulal᷊ummu jamaatta, ṛinone i tou tagguanna paassa ara'e paarua; wua'udde ariete lai maggawen tou.

¹¹I'o masingkate manungku taumata ereudde lal᷊eo wuṛṛu manga rosane mapaal᷊iatta'a manungku i tou nassal᷊a.

¹²Napawe i ya'u suete nandolokki Artemas ara'e Tikhikus ringannu, paal᷊ihakke maddea'a tempone rumanta ringangku su Nikopolis, ana waugu i ya'u pia apulu matana'a isudde su al᷊annun tempo masunge.

¹³Pattinsahadde ringannu atonna-tonna massumbala si Zenas, mapapanden tita udde, wuṛṛu Apolos, tadea'u i mangitou wotongnge inai umamatta wuṛṛu tawe asueannu manga apa.

¹⁴Manga taumatan kite ṛinone mangurumma al᷊aṛṛa'a, ma'ola'a inolaanna apan mapia tadea'u wotongnge mapaasuungngu sarannapa apan ipaapulune; arie ma'oman sara i mangitou mabbiakka tawe gunane.

¹⁵Manga tuṛṛanga sarangkanambone apan suaddio'a ringangku, nandohon tabea si yamiu. Wal᷊oa'a tabean kami su manga hawen kite apan su pangangimanna sambau. Doronganna Mawu mangal᷊amatta tuṛṛangnga sarangkanambone. Tabea wuassi yami, Paulus