Read Talaud IBRANI 10 Bible Online

IBRANI 10 - Talaud bible

IBRANI 10

¹Titan agama Yahudi tumba'u mangngonggolu hambaranne apan mal᷊abbuka su ola'u manga inolaanna mapia apan sarun dumanta, wuṛṛu wal᷊ine hambaranna apan su ṛinone wuassu manga inolaanna udde. Tawe mariaddi tita udde wotongnge mapaasuungngu taumata apan rudanta massubba Ruata ringannu uaapiddu sasamba, salaiwe suapan tonna mannantilu manga sasamba apan uasul᷊ungnga.

²Unnu wisara, manga taumata apan massubba Ruata udde atonna-tonna suete niwaresi wuassu rosa, i mangitou tate lai pia naungnga uapendama rosa, wuṛṛu sasamba tate lai itantila.

³Arawe wutte'e manga sasamba apan tinantilla suapan tonna udde, ewe'e mappaanaungnga su taumata su ola'u manga rosa mangitou,

⁴ana waugu atonna ṛaṛṛan sapi wuṛṛu ṛaṛṛang kambinga esakka tawe maatubusa rosa.

⁵Ana waugu udde su tempo i Kristus sinumutta su runia, i Tou nabbisara su Ruata, “I'o tawe ma'apulun aonggola wuṛṛu sasamba; arawe I'o suete nanaddia wadanga, si Ya'u.

⁶I'o maddirin sasamba tattutungana ara'e sassamba ipanubbusa rosa.

⁷See i Ya'u nabbisara, ‘Ete indi Ya'u, oh Ruata! I Ya'u nirumanta tadea'u tumuṛṛutta apulu-Nu, ere uawoṛṛetta su ola'u riri-U sulal᷊ummu Wuke Susi.’ ”

⁸Paarorone i Kristus nabbisara, “I'o tawe mappandumma aonggola wuṛṛu sassamba; I'o maddirin sasamba wuassu winatanga apan iatambuna maola'a aonggola wuṛṛu sasamba ipanubbusa rosa.” I Kristus nabbisara aroddi, salaiwe al᷊awo'u sasamba udde nionggolla tumuṛṛuttu titan agama Yahudi.

⁹Wua'udde Kristus nabbisara, “Ete indi Ya'u, oh Ruata! I Ya'u nirumanta tadea'u tumuṛṛutta apulu-Nu.” Nariaddi Ruata namappasa al᷊awo'u sasamba apan tabbe udde, wuṛṛu nihantiannu sassamban Kristus.

¹⁰Yesus Kristus suete tinumuṛṛuta apa apan ipaapulun Ruata wuṛṛu nanantillu watanganne maola'a sassamba. Ringannu sasamba udde, apan niolangnge tumba'u paassa ma'oman sara mal᷊annu-l᷊annu, i ite sarangkanambone niwaresi wuassu rosa.

¹¹Suapan imam taumatan Yahudi mappaamattu manarane ere sangkatou imam su miallo-miallo, wuṛṛu masokka i tou mangonggolu sasamba uasul᷊ungnga. Arawe manga sasamba udde atonna-tonna tawe maatubbusa rosa.

¹²Arawe i Kristus tumba'u nangonggolu sambau sasamba ipanubbusa rosa, wuṛṛu sasamba udde ipappaatta saran mal᷊annu-l᷊annu. Napawe suete nanantillu sasamba udde, i Kristus inuma'ianna su uanannu Ruata wuṛṛu mammarenta suadio'a ringanni Tou.

¹³Wuṛṛu orassa indi i Kristus uaṛṛado ma'oman sara Ruata ma'ola'a manga seenne massuṛṛubawa si Tou.

¹⁴Nariaddi ringannu sasamba sambau, i Kristus napaasuungngu manga taumata apan suete niwaresi wuassu rosa.

¹⁵Su olangnge udde Ghaṛṛahon Ruata nangonggolu lai tatialane si ite. Ghaṛṛahon Ruata mabbisara,

¹⁶“ ‘Ete indi pa'aire apan sarun olaang-Ku ringanni mangitou miallo-miallo apan sarun rumanta’, unnu wisara Mawu, ‘I Ya'u sarun mantaṛṛon tita-U sulal᷊ummu naungngi mangitou, wuṛṛu mamoṛṛettu tita udde su lal᷊ummu ṛingiṛṛanni mangitou.’ ”

¹⁷Ruata nabbisara lai, “I Ya'u tate mannaungnga manga rosa wuṛṛu manga al᷊al᷊eo mangitou.”

¹⁸Nariaddi, manga rosa wuṛṛu manga al᷊al᷊eo udde suete niampunganna, ne lasa'e lai mangonggolu sasamba ipangampunga rosa.

¹⁹Ne, Manga tuṛṛangnga, ana waugu papate Mawu Yesus udde i ite orassa indi waṛṛani sumutta su Wabbo'a Lembon Susi.

²⁰Mawu Yesus suete namu'a sambau lal᷊anna apan wakku si ite, eteudde lal᷊anna apan mangngonggolu pabbawiakka. Lal᷊anna udde sumabbi passaranne eteudde i Kristus sassane.

²¹Wuṛṛu i ite orassa indi uatahuanna sangkatou imam bahewalla, apan uariagga Wal᷊e Ruata.

²²Ana waugu udde, wette i ite mangundani Ruata ringannu naungnga matul᷊ida wuṛṛu pangangimanna apan matohassa; ringannu naungnga apan suete niukassa wuassu apendamma apan sal᷊a, wuṛṛu ringannu wadangnga apan suete niukkassu ua'e waresi.

²³Ṛinone i ite uaagasa atonna su antima apan pangimananni ite, ana waugu Ruata wotongnge apangimananna wuṛṛu i Tou sarun manuungngu pa'aire-Ne.

²⁴Wuṛṛu ṛinone i ite ua'aellega sandingananna, tadea'u i ite wotongnge uasasasa mandangngu sansul᷊ungnga wuṛṛu ma'ola'a manga inolaanna apan mapia.

²⁵Ṛinone i ite sidutu ma'ammula suadio'a, wuṛṛu imbaṛṛanga wolo'a ere taumata waine. I ite ṛinone lembon satia wuṛṛu uatatohassa, ana waugu i ite masingkata manungku tate mal᷊annu lai Mawu sarun dumanta.

²⁶Ana waugu amungkangu watti'a apan atonna wuassu Ruata suete niapassingkata si ite, arawe i ite sidutu ma'ola'a rosa ringannu apulu naungnga, ne tate lai sasamba ipamappasa rosang kite.

²⁷Tumba'u sambau apan piate si ite eteudde sumaruanna pamamarikisannu Ruata ringannu putungngu asasa'une apan sarun manutungnga ma'oman sara masue manga taumata apan lullawangnga si Tou!

²⁸Taumata apan tawe tumuṛṛutta tita apan suete nionggoli Musa, iṛṛuumanna mate ringannu tawe ampungnge, amungkangu pia sakassi darua ara'e sire tallu, i tou niatialante nassal᷊a.

²⁹Aroddi awakkane ṛuumanna apan ionggola su taumata apan maṛṛinda Ana'u Ruata. Taumata udde mangngadio'a ṛaṛṛam pa'airen Ruata, eteudde papaten Kristus apan namaresi si tou wuassu rosa. I Tou mangngadio'a Ghaṛṛaho apan mangngonggolu al᷊amatta.

³⁰I ite masingkata isai Tou apan nabbisara, “I Ya'u sarun mabbal᷊issa! I Ya'u sarun makkuumanna!” wuṛṛu lai nabbisara, “Mawu sarun makkuungngu al᷊aṛṛanang-Nge.”

³¹Asasusa eteapa amungkangu manawo su lima Ruata Apan Wiakka!

³²Naungete ereapa ola'u manga tuṛṛanga su tempo nal᷊iu. Su tempo udde, napawe semakku Ruata nilumansiangnga si'o, i yamiu anamboanne uatataṛṛanga, arawe i yamiu sidutu mammanara ringannu maṛṛimada.

³³Pattaṛṛa assa i yamiu a'al᷊uandahanna wuṛṛu a'olaanna tawe aregane su saruannu awada'alla. Pattaṛṛa assa lai yamiu uatataṛṛanga ringanni mangitou apan a'olaanna aroddi,

³⁴wuṛṛu i yamiu lai mammendama su sambau, asasusan taumata apan su tuttupanna. Wuṛṛu su tempo manga al᷊awo'a apan tatahuananni yamiu aṛṛoanna, i yamiu nanengkamma udde ringannu naungnga mal᷊uassa, ana waugu i yamiu masingkata manungku i yamiu ta'e uatahuanna sambau apan lembon mapia, apan mataṛṛanga saran mal᷊annu-l᷊annu.

³⁵Ana waugu udde, arie naungnga maadio'a, ana waugu amungkangu i yamiu sidutu mangngimanna, ne pia lal᷊antakke apan bahewalla su inolaannu udde!

³⁶I yamiu ṛinone masabare, tadea'u i yamiu wotongnge mapa'ola'a apulun Ruata wuṛṛu ringannu aroddi yamiu manengkamma apa apan suete nipa'iren Tou.

³⁷Ana waugu sulal᷊ummu Wuke Susi uaroṛṛetta, “Ete tal᷊ang kadio'a lai, ne i Tou apan sarun dumanta udde, sarun rumanta ringannu mal᷊ihakka; I Tou sarun tawe mangaddo mal᷊annu daranta-Ne.

³⁸Wuṛṛu pabbawala'u apan naṛṛino sarun mangngimanna wuṛṛu mabbiakka; arawe amungkangu pia wuassu wallatti mangitou apan sussoṛṛota ne i Ya'u tawe mal᷊uassa si tou.”

³⁹I ite indi wal᷊inewe walahanna apan sussoṛṛota wuṛṛu u'al᷊iwu. Arawe i ite uddewe walahanna apan mangngimanna Ruata wuṛṛu apan iapaasal᷊amatta.