Read Talaud IBRANI 11 Bible Online

IBRANI 11 - Talaud bible

IBRANI 11

¹Pangangimanna eteudde mangngimanna atonna-tonna su manga apa apan a'antimanna, atappasanne pia pangangantima su apa apan tawe asiloanna.

²Ana waugu pangangimanna, ne manga taumata su tempo nal᷊iu iaal᷊uassu Ruata.

³Ana waugu mangngimanna, ne i ite ma'asunna manungku runia indi niola'u ṛengetannu Ruata; nariaddi, apa apan a'asiloanna, niola'a wuassu apa apan tawe asiloanna.

⁴Ana waugu mangngimanna, ne i Habel nangonggolu sasamba apan apianne su Ruata wuassu aonggoli Kain. Ana waugu pangangimanne udde, Habel tinarimmatu Ruata naola'a sangkatou taumata apan mapia, ana waugu nilumiatta'e manungku Ruata nanengkamma aonggole. I Habel natete, arawe ana waugu pangangimanne udde, ne i tou ta'e uahahatto sara orassa indi.

⁵Ana waugu mangngimanna, ne i Henokh tawe nate, ewe'e nasengkenga wuṛṛu niapiadda ringannu Ruata. Tawe saran sangkatou apan botonge maisasomban tou, ana waugu i tou suete niapaasengkengu Ruata. Sulal᷊ummu Wuke Susi uawoṛṛetta manungku tantal᷊anna i Henokh taambe niapaasengkenga, i tou ma'al᷊uassa naungngu Ruata.

⁶Amungkangu tawe pangangimanna, tawe saran sangkatou apan wotongnge maal᷊uassa naungngu Ruata. Ana waugu taumata apan rumanta ringannu Ruata ṛinone mangngimanna manungku pia Ruata, wuṛṛu manungku Ruata mangonggolu wawal᷊inne su taumata apan maddea'a si Tou.

⁷Ana waugu mangngimanna, ne i Nuh niapasingkatannu Ruata su ola'u apa apan sarun mariaddi su allo murine, apan tawe asiloanni tou. I Nuh tinumuṛṛuta Ruata na'oman sara i tou nallanginnu apalla apan sal᷊immurine niasingkatanna napanal᷊amatta wadangnge wuṛṛu lal᷊oṛṛon bal᷊ene. Ringannu aroddi runia niṛṛuumanna, arawe i Nuh sassane ana waugu pangangimanne niapaal᷊iatta'u Ruata ere sangkatou taumata apan mapia.

⁸Ana waugu mangngimanna, ne i Abraham tinumuṛṛuta Ruata su tempo Ruata namago si tou, wuṛṛu nandolokki tou inai watukku wanua apan suete pina'iren Ruata si tou. See i Abraham inaite ringannu awa'gananna suapa sarun patuddanni tou.

⁹Ringannu mangngimanna, i Abraham natana'a ere sangkatou raho su leta'a apan suete pina'iren Ruata si tou udde. I Abraham uatana'a isudde su rasanna. Aroddi lai Ishak wuṛṛu i Yakub, apan nanengkamma paaire apan nassul᷊ungnga wuassu Ruata.

¹⁰Ana waugu i Abraham tantal᷊anna uaraṛṛaddo soa apan ilakki'inna wuṛṛu iapararisikku Ruata ringannu rapappake apan matohassa.

¹¹Ana waugu mangngimanna, ne Abraham wotongnge naasomba walahanna wuassi Sara, salaiwe i Abraham tumaniten timmade, wuṛṛu Sara lai sassane tinna. I Abraham mangngimanna manungku Ruata sarun mapaatipussu pa'aire-Ne.

¹²Salaiwe i Abraham su tempo udde ere taumata apan wadange natete, arawe i tou naasomba walahanna, apan anambone tawe iareengnga — ere anambon anumpitanna su langitta wuṛṛu anne su winggin apanne.

¹³Anambon taumata udde sidutu mangngimanna ma'oman sara mate. I mangitou tawe naasengkamma manga inolaanna apan pina'iren Ruata, arawe tumba'u ma'ellega wuṛṛu mannal᷊oho wuassu marau. Wuṛṛu ringannu udde i mangitou nabbal᷊o manungku i mangitou tumba'u taumata raho wuṛṛu mamamal᷊intadu runia indi.

¹⁴Taumata apan nabbisara aroddi mapaal᷊iatta'a ringannu masemakka, manungku i mangitou tantal᷊anna maddea'a wanua apan maola'a leta'a pussa'a atatanaanni mangitou.

¹⁵Wal᷊ine wanua apan suete tinantangi mangitou udde apan sidutu iraṛṛingidi mangitou. Ana waugu amungkangu aroddi, ne manambote tempo si mangitou ipabbelengnga apia su wanua udde.

¹⁶Arawe nasemakke, manungku i mangitou maapulun sambau soa lembon mapia, eteudde Soa su surga. Ana waugu udde Ruata tawe masili amungkangu i mangitou managone Ruata mangitou, ana waugu Ruata suete nanaddia sambau soa si mangitou.

¹⁷Ana waugu mangngimanna lai, i Abraham nanantilli Ishak maola'a sambau sasamba su tempo i tou niannamannu Ruata. Ete tumba'u si Abraham Ruata nangonggolu pa'aire-Ne, arawe i Abraham ma'apulu nanantillu anangnge apan man sambau udde.

¹⁸Ruata suete nabbisara si Abraham, “Wuassi Ishak indi, i'o sarun maasomba walahanna apan pina'ire-U si'o.”

¹⁹Abraham nangimanna manungku Ruata wotongnge mapaawiakki Ishak apia wuassu papate — nariaddi, wotongnge iwisara, manungku Abraham suete nanengkamma si Ishak apia wuassu papate.

²⁰Ana waugu mangngimanna, ne i Ishak na'ire manga al᷊amatta si Yakub wuṛṛu si Esau su allo addantane.

²¹Ana waugu mangngimanna, tantal᷊anna Yakub taambe nate, i tou nangal᷊amatta manga al᷊aṛṛana'i Yusuf — ringannu uasandaka su puan ta'inne wuṛṛu massubba Ruata.

²²Ana waugu mangngimanna, ne i Yusuf — su tempo maraniten mate — nabbisara su ola'u sasabangu taumatan Israel wuassu Mesir, wuṛṛu nanantangu tanata, su ola'u winal᷊unanne ṛinone olaanna ereapa.

²³Ana waugu mangngimanna, ne hagurangngi Musa namunin tou al᷊annune tallu wul᷊anna napawe i tou niasungkanga. I mangitou na'ellega manungku i tou sangkatou ana'a apan maṛṛamaga, wuṛṛu i mangitou tawe matta'utta lumawangnga parentan ratu.

²⁴Ana waugu mangngimanna, i Musa napawe nahewalle, maddiri isago ana'u maṛṛualan ratu Mesir.

²⁵Mappianne i tou matataṛṛanga su sambau ringannu walahannu Ruata wuassu i tou mattemma al᷊al᷊uassa tal᷊ang kadio'a mabbiakka su paddarosa.

²⁶I Musa mammendama manungku maareganne marau i tou maasomba aal᷊uandaga ana waugu Ratum Punnu Sal᷊amatta apan pina'iren Ruata udde, wuassu maasomba al᷊awo'u darotongngu wanuan Mesir, ana waugu Musa uaantima lal᷊antake su allo murine.

²⁷Ana waugu mangngimanna, ne i Musa nanantangu Mesir ringannu tawe matta'utta su asasa'un ratu. Musa niumamatta mattudam pattudanne ere ola'u i tou naasilote Ruata apan tawe asiloanna udde.

²⁸Ana waugu mangngimanna, ne i Musa nallaghum Paskah wuṛṛu namarenta tadea'u iwokka ṛaṛṛa su ngara wal᷊en taumatan Israel taddea'u Mala'ekattu Papate tawe mamate al᷊aṛṛana'a pahul᷊u mangitou.

²⁹Ana waugu mangngimanna, ne manga taumatan Israel wotongnge tumumbe Tahal᷊oangnga Maṛṛamu, paṛṛimaunnapa i mangitou u'amatta su leta'a mamara, arawe manga taumatan Mesir niallupu tahal᷊oangnga udde, su tempo i mangitou maannamma tumumbe lai.

³⁰Ana waugu mangngimanna, manga taumatan Israel napaaṛṛa'a manga darandungu Yerikho napawe i mangitou namal᷊iwutta sulal᷊ummu pitu allo al᷊annune.

³¹Ana waugu mangngimanna lai, ne i Rahab, wawine masandaga udde, tawe niapate suadio'a ringannu manga taumata apan lullawangnga Ruata; ana waugu i tou nanal᷊oho ringannu masaṛṛionto'a manga mallal᷊ingen taumatan Israel.

³²Ne, i ya'u wotongnge lai tawe illol᷊one mabbisara, arawe orassa tawe natimu si ya'u. Ana waugu i ya'u lai taambe nanagon Gideon, i Barak, i Simson, i Yefta, i Daud, i Samuel wuṛṛu manga nabi.

³³Ana waugu mangngimanna, ne i mangitou suete napaarugi manga araratuanna. I mangitou ma'ola'a apa apan su ṛinone, na'oman sara naasengkamma apa apan suete pina'iren Ruata. I mangitou nanggattumu manga moṛṛongu singa,

³⁴namaduma putungnga apan wahewalla, nal᷊iu wuassu pappilitanu hal᷊ele. I mangitou lome, arawe nabbal᷊i matohassa; i mangitou masaṛṛaungnga sulal᷊ummu pangalo na'oman sara napaarugi manga tantaram walahannu lumal᷊o'a.

³⁵Ana waugu mangngimanna, ne manga wawine naasomba apia manga taumatane apan natete. Piaddu lai apan ma'apulu sansaranna ma'oman sara mate, wuṛṛu maddiri ipallosa, ana waugu ma'apulu iapa'awiakka apia su sambau ringannu pabbawiakka apan lembon mapia.

³⁶Piaddu lai a'al᷊uandahanna, pappuul᷊anna, niṛṛapussu ṛate wuṛṛu tinaṛṛo su tuttupanna.

³⁷I mangitou tinuntungannu watu na'oman sara nate, piaddu niponggo'u laṛṛahari, wuṛṛu piaddu nipaten hal᷊ele. I mangitou lullallele ringannu laubba wuassu pisin domba ara'e pising kambinga; i mangitou asiangnga, pappateanna wuṛṛu sassansaranna.

³⁸Runia indi wal᷊inewe tampa su ṛinone si mangitou. I mangitou lullallele su wadda'a wuṛṛu manga wuidda, see uatana'a sulal᷊ummu manga liangnga wuṛṛu sulal᷊ummu manga loṛṛangu leta'a.

³⁹Tumanitem wahewalla auntunganna apan niaobaannu anambon taumata udde ana waugu pangangimanni mangitou! Arawe i mangitou tawe maasengkamma apa apan suete pina'iren Ruata,

⁴⁰ana waugu Ruata pia pandumanna apan lembon apianne si ite. Pandumanne eteudde manungku tumba'u uaaukka su sambau ringanni ite i mangitou sarun masuungnga.