Read Talaud IBRANI 12 Bible Online

IBRANI 12 - Talaud bible

IBRANI 12

¹Ne, su ola'i ite sassane, uapaal᷊iwutta si ite manambo atonna mattatiala! Ana waugu udde wette i ite mandammen anambon apa apan mammakkata si ite wuṛṛu rosa apan sidutu uareeta si ite. Wuṛṛu wette i ite ringannu ma'udduppa sumutta su pattalumanna apan sasaruannani ite.

²Ṛinone aellegi ite tuddane su Mawu Yesus, ana waugu ete i Tou namangunna pangangimanni ite wuṛṛu nappadul᷊i wuassu paarorone saran panginsueanne. Mawu Yesus natataṛṛanga susa su alu arussa! I Tou tawe mannaungnga manungku mate su alu arussa udde sambau inolaanna apan ma'asili. I Tou tumba'u mannaungnga al᷊al᷊uassa apan sarun apendaman-Ne su allo murine. Orassa indi tou ua'ianna su samba'an uanannu Ruata wuṛṛu mammarenta suadio'a ringanni Tou.

³Annama'a ṛingira'a ereapa asasusane Mawu Yesus sinumaruanna manga taumata marosa apan nilumawangnga si Tou aroddi al᷊aṛṛage! Ana waugu udde arie maadio'a naungngu wuṛṛu mallome.

⁴Ana waugu sulal᷊ummu manaranu lullawangnga rosa, i yamiu taambe saran paassa mammanara na'oman sara napaaturon ṛaṛṛa.

⁵Wuṛṛu imbaṛṛanga maabul᷊in tanatan Ruata indi, apan nionggolla si yamiu manga al᷊aṛṛanang-Nge: “Al᷊aṛṛana'u, paatutuṛṛe paapia-pia al᷊aṛṛa'u Mawu, wuṛṛu arie naungngu maadio'a amungkangu i Tou masa'u si'o.

⁶Ana waugu Mawu mangaṛṛa'a manga taumata apan arangnguan-Ne, i Tou mammu'ulla manga taumata apan sueten nia'un-Tou maola'a al᷊aṛṛanang-Nge.”

⁷Ṛinone i yamiu manengkamma hahesekku Ruata maola'a sambau al᷊aṛṛa'a wuassu sangkatou iamangnga. Ana waugu apa piate sangkatou ana'a tawe iṛṛuumannu iamangnge?

⁸Amungkangu i yamiu tawe iṛṛuumanna ere al᷊aṛṛanangnge waine indi, yamiu wal᷊ine ana'a suṛṛiwa, ewe'e ana'a uata'a.

⁹I ite pia iamangnga su runia. I Tou mangngaṛṛa'a si ite, wuṛṛu i ite mangngaddatta si tou. Ne, nangillembo su saruannu Iamangngi ite su surga, natantuna i ite lembon matuṛṛuta si Tou tadea'u i ite wiakka.

¹⁰Hagurangngi ite su runia mangngaṛṛa'a si ite tumba'u sulal᷊ummu tempo apan pia patta'al᷊anne, tumuṛṛuttu apa apan su apendami mangitou mapia. Arawe Ruata mangngaṛṛa'a si ite hunane su apapiang kite sassane, tadea'u i ite wotongnge maola'a susi suadio'a ringanni Tou.

¹¹Atonna su tempo i ite a'aṛṛaanna, ṛuumanna udde tawe ma'al᷊uassa naungngi ite, ewe'e tumba'u maasusa. Arawe mal᷊iu wua isudde, si ite apan suete niaṛṛa'anna, ṛuumanna udde ma'ola'a si ite mabbiakka tuttuṛṛuta apulu Ruata, wuṛṛu mangngonggolu apendamu paddarame si ite.

¹²Ana waugu udde, tohasse limanu apan lome wuṛṛu wuunu apan mangngindo udde!

¹³A'amatte sidutu su lal᷊anna apan mal᷊aukka, tadea'u leddanu u'ento udde tawe maggal᷊isa, ewe'e sarun mapia.

¹⁴Paddea'e ringannu wotongnge mabbiakka su paddarame ringannu anambon taumata. Paddea'e lai see mabbiakka susi, tumba'u ringannu Mawu. Ana waugu tawe saran sangkatou wotongnge maasilo Mawu amungkangu i tou tawe mabbiakka ereudde.

¹⁵Paariagai arie ma'oman sara piaddu sangkatou apan sumabbanga wuassu alindongannu apapia naungngu Ruata, tadea'u tawe piaddu maola'a ere sasuanna apan pia pasangkade su pattangnganni yamiu ma'oman sara mandantan asasusa wuṛṛu mandal᷊eo anambon taumata ringannu pasangkade.

¹⁶Paariagai tadea'u tawe piaddu mabbiakka sussandaga ara'e tawe mangadata inolaannu Ghaṛṛaho, ere suete niola'i Esau. I tou nabbal᷊u'u watanganne ere sangkatou ana'a pahul᷊u, ana waugu tumba'u sanlama'a anna.

¹⁷I yamiu masingkata manungku wua'udde i Esau ma'apulu maasomba al᷊amatta udde wuassu iamangnge, arawe i tou nito'e. Ana waugu salaiwe ringannu lal᷊uai tou maddea'a lal᷊anne ipangapia passasal᷊ane, arawe allo ipaddea'a udde nasuete.

¹⁸Manga tuṛṛangnga tawe nirumanta sumaruanna apa-apa ere sinaruanannu walahannu Israel dorone. I mangitou sinumaruanna apa apan botongnge iapita, eteudde Wowon Sinai ringannu putungnge apan lukkenggama; i mangitou sinumaruanna araranduma, wasa tuudda wuṛṛu tandi'a;

¹⁹I mangitou sinumaruanna tingikku trompeta, wuṛṛu tingikka apan ma'ikkatta. Su tempo manga taumatan Israel naaringikka tingikka udde, i mangitou madorongnga ringannu sasal᷊ande tadea'u tingikka udde tate mabbisara apia si mangitou.

²⁰Ana waugu i mangitou tawe ma'ataṛṛanga madaringikka parenta apan niapaasingkatu tingikka udde. Ana waugu tingikka udde mabbisara, “Anambon taumata apan namita wowone indi, tawe pilene apa udde winatanga ara'e lai isai, ṛinone tuntungannu watu ma'oman sara mate.”

²¹Apa apan niasiloannu manga taumatan Israel udde aroddi ahewalle na'oman sara i Musa nabbisara, “I ya'u matta'utta wuṛṛu mangngindo!”

²²Arawe, i yamiu suete nirumanta watukku Wuiddu Sion wuṛṛu soan Ruata apan biakka, eteudde Yerusalem apan su surga ringannu mala'ekan-Ne su ṛiwune.

²³I yamiu nassemodda su ammulanna apan maal᷊uassa — ammul᷊annu al᷊aṛṛana'a pahul᷊un Ruata, apan manga aranne uawoṛṛetta sulal᷊ummu surga. I yamiu nirumanta sumaruanna Ruata, Mallaṛṛuungngu walahannu taumata. I yamiu sumaruanna manga ghaṛṛaho manga taumata mapia, apan suete niola'a nasuungnga.

²⁴I yamiu nirumanta sumaruanna Mawu Yesus, Uatangnga pa'aire apan wakku udde; i yamiu sumaruanna ṛaṛṛa wawokka apan wotongnge maola'a tatubbusu inolaanna apan lembon apianne wuassu apan nitubbusanu ṛaṛṛan Habel.

²⁵Ana waugu udde, paatehamma arie ma'oman sara i yamiu maddiri maddaringikka si Tou apan mabbisara udde. I mangitou apan maddiri maddaringikka si Tou apan nirumanta su runia wuṛṛu namasingkatu watti'u Ruata, tawe maatal᷊angngu watanganne. Lembonete lai i ite indi apan uararingikka si Tou mabbisara wuassu surga! Amungkangu i ite maddiri maddaringikka si Tou, i ite tawe maatal᷊angnga wuassu ṛuumanna!

²⁶Su tempo udde tingikke naaṛṛindu'a runia. Arawe orassa indi i Tou na'ire, “Paassa lai, ya'u sarun mamaṛṛindu'a wal᷊ine tumba'u su runia ewe'e su langitta lai.”

²⁷Wisara “Paassa lai” mannantiro manungku ahewallu runia apan suete niolang-Nge sarun iio'a wuṛṛu iramme, tadea'u mallambe tumba'u sarannapa apan tawe umio'a.

²⁸Ana waugu udde, ṛinone i ite ma'adiangkamanna su Ruata, ana waugu i ite nanengkamma wuassi Tou sambau araratuanna apan tawe umio'a. Ṛinone i ite ma'adiangkamanna wuṛṛu mattaṛṛamawu Ruata ringannu addata wuṛṛu atata'utta, tumuṛṛuttu pallal᷊agu apan ipa'apulu-Ne sassane.

²⁹Ana waugu Ruatang kite ere putungnga apan maatutungnga.