Read Talaud IBRANI 3 Bible Online

IBRANI 3 - Talaud bible

IBRANI 3

¹Manga tuṛṛangnga sansul᷊ungnga Saṛṛani apan suete niwagoannu Ruata lai! Annama'a ṛingiṛṛa'a paalal᷊umma su ola'u Mawu Yesus indi! Ruata nandolokki Tou sassane maola'a Imam Wahewa sulal᷊ummu agama apan pangngimananni ite.

²I Tou matuṛṛuta Ruata apan suete namile si Tou su manara udde, ere lai Musa rorone matuṛṛuta mappaamattu manarane su Wal᷊en Ruata.

³Arawe Mawu Yesus lai ṛinone addatanna lembon ahewal᷊anne wuassi Musa. Ana waugu taumata apan mapararisikku wal᷊e, ṛinone maasomba aaddata maggewal᷊anne wuassu wal᷊e udde sassane.

⁴Atonna al᷊awo'u wal᷊e piaddu mapararisikke, arawe namangunna sarangkanambone eteudde Ruata sassane.

⁵I Musa matuṛṛuta ere sangkatou mangangaṛṛa'a su Wal᷊e Mawu wuṛṛu mabatti'u manga inolaanna apan sarun iapaasingkatu Ruata su tempo apan sarun rumanta.

⁶Arawe i Kristus matuṛṛuta ere sangkatou Ana'a apan uariaga Wal᷊en Ruata. Wuṛṛu ete i ite indi Wal᷊en Ruata, amungkangu i ite sidutu maṛṛimadda wuṛṛu sidutu mangngimanna maasomba apa apan aantimanni ite.

⁷Ana waugu udde, ere su wisaran Ghaṛṛahon Ruata, “Amungkangu su allo indi yamiu maaringikka tingikku Ruata,

⁸ariewe i yamiu maddiri maddaringikka, ere iupungngu al᷊amonanu, su tempo i mangitou nilumawangnga Ruata, wuṛṛu nanal᷊u'atta Ruata su wadda'a.

⁹‘Poiaroddi iupungngu al᷊amonanu namono'a si Ya'u, wuṛṛu nanalu'atta si Ya'u,’ unnu Ruata, ‘sumbal᷊i i mangitou naasilote inolaang-Ku appatu pul᷊o su tonnane al᷊annune.’

¹⁰Ana waugu udde i Ya'u nasa'u si mangitou wuṛṛu i Ya'u nabbisara, ‘I mangitou sidutu maddiri tumuṛṛutta wuṛṛu tawe tumuṛṛutta manga parenta-U.’

¹¹I Ya'u nasa'u wuṛṛu nassalu, ‘I mangitou sarun tawe maasutta su soa udde wuṛṛu mangillol᷊o ringang-Ku.’ ”

¹²Manga tuṛṛangnga, paatehamma arie ma'oman sara piaddu sangkatou wuassu wallatti yamiu apan pia naungnge aroddi alal᷊eone wuṛṛu tawe pangangimanne, na'oman sara i tou mabelengnga wuṛṛu mangindaun Ruata apan biakka!

¹³Nariaddi, tadea'u tawe saran sangkatou wuassu wallatti yamiu apan awono'annu rosa na'oman sara lumawangke Ruata, ṛinone i yamiu uatataggu su miallo-miallo tantal᷊anna i ite ta'e mabbiakka su tempo apan isassago “Allo Indi” sulal᷊ummu Wuke Susi.

¹⁴I ite sarangkanambone uddewe sanggaweanna sulal᷊ummu manara ringanni Kristus, sawal᷊iate saran pangudusanne i ite uaaggasa pangangimanna apan tatahuananni ite ro'en paarorone.

¹⁵Ete indi apan uawoṛṛetta sulal᷊ummu Wuke Susi, “Amungkangu su allo indi yamiu naaringikka tingikku Ruata, imbaṛṛanga i yamiu tawe madaringikka, ere iupungngu al᷊amona, su tempo i mangitou lullawangnga Ruata.”

¹⁶Ne, isai manga taumata apan madaringikka tingikku Ruata see nilumawangnga si Tou? Eteudde anambon taumata apan nipiaṛṛa'i Musa sinumabanga wuassu leta'u Mesir, are?

¹⁷Wuṛṛu sisai lai Ruata nasa'u appatu pul᷊o su tonnane al᷊annune? Ete si mangitou apan marosa, apan nanawo see nate su wadda'a, are?

¹⁸Su tempo Ruata nassalu arendi, “I mangitou sarun tawe maasutta su soa udde ana see maasomba pangillol᷊oanna ringang-Ku” — isai lai apan ipapandumu Ruata? Apan ipappandume eteudde manga taumata apan lullawangnga Ruata, are?

¹⁹Orassa indi i ite naasunnate manungku i mangitou tawe maasutta, ana waugu i mangitou tawe mangngimanna Ruata.