Read Talaud IBRANI 6 Bible Online

IBRANI 6 - Talaud bible

IBRANI 6

¹Ana waugu udde, wette i ite mangasal᷊ate manassukku manga al᷊aṛṛa'a sansunne, su ola'u al᷊aṛṛa'a mattanggaṛṛanna su taumatan Saṛṛani, wuṛṛu arie tumba'u maṛṛingiddu manga al᷊aṛṛa'u agamang kite paarorone. Arie i ite manul᷊e apia pinangianannu al᷊aṛṛa'a manungku taumata ṛinone mangillol᷊o ma'ola'a manga inolaanna apan tawe gunane wuṛṛu ṛinone mangngimanna Ruata,

²ara'e pinangianannu al᷊aṛṛa'a su ola'u pananaṛṛani ara'e mangaddon lima su wowon taumata, ara'e su ola'u mabbiakka apia napawe natete, ara'e ṛuumanna saran mal᷊annu-l᷊annu.

³Wette i ite, amungkangu Ruata mamala, mattuddaten al᷊aṛṛa'a apan manansuna!

⁴Ana waugu, manga taumata apan suete nassinaadu Ruata, tate wotongnge aṛṛaanna apia. I mangitou dorone sulal᷊umpen asasemakka wuassu Ruata, wuṛṛu suete naatemma aonggolu Mawu. I mangitou lai suete niintaṛṛoannu Ghaṛṛahon Ruata.

⁵I mangitou masingkata wuassu ola'u pabbiaṛṛani mangitou manungku wisaran Ruata udde mapia, wuṛṛu i mangitou suete naapendama manga al᷊amatta apan napenen taṛṛino wuassu tempo apan sarun dumanta.

⁶Arawe wua'udde i mangitou nassinaadu Mawu! Apa wotongnge mangaṛṛa'a si mangitou apia mawal᷊u wuassu manga rosa mangitou. Ana waugu i mangitou tantal᷊anna mangngarussan Ana'u Ruata apia wuṛṛu manggal᷊usa'a si Tou su saruannu awada'alla.

⁷Leta'a apan mangngiṛṛupa ua'eng kuranna apan masokka manawo su leta'a udde, see tinuwoante manga sasuanna apan mahuna su taumata apan mamamaddul᷊ine, leta'a udde nial᷊amatannu Ruata.

⁸Arawe amungkangu leta'a udde tatuwoannu manga akke wuṛṛu sasuanna ṛoaanna, ne leta'a udde tawe gunane wuṛṛu sarun bontohannu Ruata wuṛṛu panginsueanne tutunganna ma'oman sara masue.

⁹Arawe manga tuṛṛangnga apan arangnguanna, salaiwe i yami mabbisara aroddi, arawe i yami mangngimanna su ola'i yamiu. I yami mangngimanna manungku i yamiu suete nanengkamma manga inolaanna apan lembon mapia, eteudde manga al᷊amatta apan maola'a sambau wageangnga wuassu asasal᷊amannu.

¹⁰Ruata wal᷊ine Ruata tawe matul᷊ida. I Tou tawe maabul᷊i apa apan mammanaranni yamiu si Tou, wuṛṛu darangngu apan niapaasilong kamiu si Tou su tempo nantul᷊ungu manga tuṛṛanga apan pangangimanna sambau, dorone wuṛṛu sara orassa indi.

¹¹I yami ma'apulu taasul᷊unge tadea'u i yamiu sangkatou-sangkatou maṛṛimadda saran panginsueanne, ma'oman sara i yamiu manengkamma apa apan a'antimanni yamiu udde.

¹²I yami maddiri yamiu mabbal᷊i wolo'a. Arawe i yami maapulu tadea'u i yamiu mabbiakka ere manga taumata apan mannengkama apa apan suete pina'iren Ruata, ana waugu mangngimanna si Tou wuṛṛu ana waugu uaraṛṛaddo ringannu asasabare.

¹³Su tempo Ruata na'ire si Abraham, i Tou nassalu manungku i Tou sarun mapaatipussu apa apan suete pina'ire-Ne. Wuṛṛu ana waugu tawedu mattanggaṛṛanne wuassu Ruata, ne i Tou nassalu ringannu aran-Ne sassane.

¹⁴I Tou nabbisara, “I Ya'u ma'ire sarun mangal᷊amatta si'o wuṛṛu ma'ola'a walahannu mabbal᷊i manambo,”

¹⁵Abraham uaṛṛado ringannu sabare, ne i tou nanengkamma apa apan pina'iren Ruata si tou.

¹⁶Amungkangu manga taumata massalu, i tou massalu ringannu arannu taumata waine apan mattanggaṛṛana wuassi tou, ne sasalu udde mangudusu al᷊awo'u pattatiakka.

¹⁷Ruata ma'apulu manualaga su manga taumata apan manengkamma paaire-Ne, manungku i Tou tawe mamal᷊u ṛiin-Ne. Ana waugu udde i Tou nanamba sasalu su pa'aire-Ne udde.

¹⁸Darua inolaanna udde apan tawe wotonge mawal᷊u: Ruata tawe mangawusu su ola'u pa'aire wuṛṛu sasalu-Ne. Ana waugu udde, i ite apan uasirungke ringannu Ruata, nionggol᷊annu sasasa apan matohassa ipangagassa antimma apan uawilatta su saruanni ite.

¹⁹Antimmi ite udde ere wal᷊ango apan ual᷊abinga mal᷊al᷊umma wuṛṛu maola'a sambau pangangal᷊eanna apan matohassa wuṛṛu tawe singkal᷊one su pabbiaṛṛani ite. Antimma udde nallapasa su lal᷊indumu Wabbo'a Lembon Susi su Wal᷊e Mawu su surga.

²⁰Mawu Yesus suete namu'a lal᷊anna watukku tampa udde si ite, wuṛṛu suete sinumutta poiaroddi naola'a Imam Bahewang kite sara mal᷊annu-l᷊annu, ere Imam Malkisedek.