Read Talaud IBRANI 7 Bible Online

IBRANI 7 - Talaud bible

IBRANI 7

¹I Melkisedek indi eteudde sangkatou ratu wuassu Salem wuṛṛu imam wuassu Ruata Lembon Atanggaṛṛanne. Su tempo i Abraham nawelengnga wuassu pangalo nalluṛṛugu manga ratu, i Melkisedek nirumanta nanal᷊oho si tou wuṛṛu nangal᷊amatta.

²Ne i Abraham nangonggola si Melkisedek sambau wuassu mapul᷊o apan niaaṛṛon tou. (Aranna Melkisedek atappasanne, paarorone, “Ratun Atatul᷊idda”; pia atappasanne lai “Ratum Paddarame”.)

³Su ola'i Melkisedek indi tawe tal᷊aane suapa-suapa manungku i tou pia hagurangnga ara'e iupungnga; tawe lai tal᷊aane su ola'u niasungkanganne ara'e papatene. I tou nassul᷊unga ere Ana'u Ruata; i tou udde imam saran mal᷊annu-l᷊annu.

⁴Nariaddi, i ite isindi maasilo aroddi ahewalle Melkisedek indi; i tou aroddi ahewalle na'oman sara i Abraham, iamangngu al᷊amonang kite, nangonggola si tou sambau wuassu mapul᷊o al᷊awo'u ina'ul᷊e wuassu pangalo udde.

⁵Sulal᷊ummu titan agama Yahudi tinantuna manungku manga imam papapulunni Lewi ṛinone manganu sambau wuassu mapul᷊o addapatu taumatan Israel, eteudde manga tuṛṛangi mangitou sassane, salaiwe i mangitou suadio'a papapulunni Abraham.

⁶I Melkisedek wal᷊inewe papapulunni Lewi, arawe i tou nanengkamma lai sambau wuassu mapul᷊o asombangi Abraham, wuṛṛu nangal᷊amatta lai si Abraham apan suete lai nanengkamma manga pa'airen Ruata.

⁷Atonna tawe wotongnge iapaasal᷊a manungku taumata apan nial᷊amatanna mabbawoanna wuassu taumata apan nangal᷊amatta si tou.

⁸Manga imam apan nanengkamma darorongnga sambau wuassu mapul᷊o wageangnge udde, eteudde taumata apan wotongnge mate. Arawe tumuṛṛuttu Wuke Susi, i Melkisedek apan nanengkamma aonggola sambau wuassu mapul᷊o udde, eteudde taumata apan sidutu wiakka.

⁹Wotongnge iwisara, manungku i Lewi — apan papapulunne nanengkamma sambau wuassu mapul᷊o asombangu walahannu Israel — namaekka lai wageangnge udde si i Abraham, su tempo Abraham namaekka si Melkisedek.

¹⁰Salaiwe i Lewi taambe niasungkanga, arawe wotongnge iwisara i tou sulal᷊umpen badangngi Abraham iupungnga al᷊amonane, su tempo i Melkisedek nassomban Abraham.

¹¹Su al᷊ungngu piaṛṛa'u manga Imam Lewi, titan agama Yahudi nionggolla su taumatan Israel. Ana waugu manga Imam Lewi dorone udde tawe maaola'a ringannu masuungnga apa apan mammanaranne, ne ṛinone pia imam baine, eteudde apan ere Imam Melkisedek, wuṛṛu wal᷊ine lai wuassu wageangngu Imam Harun!

¹²Ne amungkangu a'iannu manga imam nawal᷊u, titan agama Yahudi ṛinone mawal᷊u lai.

¹³Apan ipappandumme isindi eteudde Mawun kite; i Tou wuassu walahanna waine, wuṛṛu taambe saran paassa wuassu pabbawalage nammanara ere sangkatou imam.

¹⁴Anambon taumata masingkata manungku Mawung kite niarantanne wuassu walahanni Yehuda; wuṛṛu i Musa tawe saram paassa nanaggom walahanna udde su tempo i tou mabbisara su ola'u manga imam.

¹⁵Olangnge apan iwabbisara indi naola'a lembon matualaga lai, ringannu darantan sangkatou imam baine ere i Melkisedek.

¹⁶I tou nitenega naola'a imam, wal᷊ine ana waugu manga atorannu taumata, arawe wuassu wiakke apan natataṛṛino wuṛṛu tawe panginsueanne.

¹⁷Ana waugu sulal᷊ummu Wuke Susi niwisara, “I'o ewe'e sangkatou imam saran mal᷊annu-l᷊annu ere Imam Melkisedek.”

¹⁸Nariaddi, orassa indi atoranna apan tabbe tate saileanna, ana waugu lomete wuṛṛu tate gunane.

¹⁹Titan agama Yahudi tawe maaola'a sambau inolaanna apan masuungnga. Ana waugu udde i ite orassa indi nionggol᷊annu pangangantima lembon apianne; ringannu aroddi i ite wotongnge mangundanin Ruata.

²⁰See lai, sarangkanambone udde lapiddu ringannu sasalu wuassu Ruata. Tawe sassalu ere udde su tempo manga imam baine nitenega.

²¹Arawe Mawu Yesus nitenega maola'a imam, nappaattu sasalu, su tempo Ruata nabbisara si Tou, “Mawu suete nassalu, wuṛṛu i Tou sarun tawe mamal᷊u ṛingidde, ‘Ete I'o imam saran mal᷊annu-l᷊annu.’ ”

²²Ringannu udde lai Mawu Yesus naola'a wataṛṛu su sambau pa'aire apan lembon apianne.

²³Pia lai hatto sambau: manga imam apan baine udde manambo, ana waugu i mangitou sangkatou-sangkatou natete, na'oman sara tate naasassuku manarane.

²⁴Arawe Mawu Yesus mabbiakka saran mal᷊annu-l᷊annu, nariaddi wuassu manarane ere sangkatou imam, tawe na'ingkata su taumata waine.

²⁵Ana waugu udde saran mal᷊annu-l᷊annu Mawu Yesus wotongnge manal᷊amatta manga taumata apan nirumanta ringannu Ruata sulal᷊ummi Tou, ana waugu i Tou mabbiakka saran mal᷊annu-l᷊annu ipangapiddu sasal᷊ande su Ruata, hunane su manga taumata udde.

²⁶Nariaddi, Mawu Yesus eteudde Imam Bahewa apan pappandumanni ite. I Tou susi; si Tou tawe niasombanganna pasasal᷊a ara'e rosa sarang kadio'a. I Tou niṛṛae wuassu manga taumata marosa, wuṛṛu niruitta su tampa lembon atanggaṛṛanne wuassu al᷊awo'u langitta.

²⁷I Tou tawe ere manga imam wahewa waine, apan miallo-miallo ṛinone mangapiddu sasamba ana waugu manga rosane sassane rorone, wua'udde ana waugu rosan walahanna. Mawu Yesus nangapiddu sasamba tumba'u paassa ma'oman sara mal᷊annu-l᷊annu, su tempo i Tou nattingkaola'u wadang-Nge sassane naola'a sambau sasamba.

²⁸Titan agama Yahudi mappaatenegu taumata apan tawe nasuungnga maola'a imam bahewa. Arawe wuassu tita udde, Ruata na'ola'a pa'aire ringannu sasalu manungku i Tou mapaatenega maola'a sangkatou Imam Bahewa, Ana'a apan suete niola'a Ratum Punnu Sal᷊amatta apan nasuungnga saran mal᷊annu-l᷊annu.