Read Talaud YAKOBUS 1 Bible Online

YAKOBUS 1 - Talaud bible

YAKOBUS 1

¹Manga tuṛṛangnga al᷊aṛṛana'u Ruata sarangkanambone apan uasal᷊iawukka su ahewallu runia! Tabea wuassi ya'u, Yakobus, allangngu Ruata wuṛṛu allangngi Yesus Kristus.

²Manga tuṛṛangnga! Amungkangu yamiu sumaruanna al᷊awo'u hatin bawono'a, ṛinone itarimatti yamiu ere auntunganna.

³Ana waugu i yamiu masingkatta, manungku amungkangu i yamiu siddutu mangngimanna Mawu su tempo wabbono'anna, asombange eteudde: i yamiu maola'a masabare.

⁴Riagai tadea'u asasabare naungngu udde siddutu aatambanna ma'oman sara atonna-tonna i yamiu maola'a masuungnga see tawe urangnge saran kadio'a.

⁵Amungkangu pia sangkatou wuassu wallatti yamiu apan woddo, ṛinone i tou sumal᷊ande su Ruata, ne Ruata sarun mangonggolu apande si tou; ana waugu su al᷊awo'u taumata, Ruata sarun mangonggola ringannu naungnga mal᷊uassa wuṛṛu ringannu apendammu darangngu.

⁶Arawe taumata apan maddoronga, ṛinone mangngimanna: i tou tawe wotongnge mapapadua. Ana waugu taumata uapapadua udde ere wallade su tahal᷊oangnga apan tattiupannu anginna uawal᷊elenganna.

⁷Taumata ereudde tawe matana'a ṛingiranne; i tou tawe mapakkawessa apa-apa su al᷊awo'u manga apa apan niolangnge. Ana waugu udde, ariete lai i tou mangantimma maasomba apa-apa wuassu Mawu.

⁹Taumatan Saṛṛani apan asiangnga ṛinone lulluassa amungkangngu Ruata manduitti tou.

¹⁰Wuṛṛu taumatan Saṛṛani apan ala, ṛinone lumuassa lai, amungkangu Ruata mapaawawon tou. Ana waugu taumata ala sarun mawul᷊i ere wungan ahuranganna.

¹¹Su tempo matannallo lumapputa ringannu paddisa apan mal᷊oso, ne ahuranganna udde sarun tumolangnga ma'oman sara manontonga wungane wuṛṛu mawul᷊ite lai araṛṛansange. Aroddi lai taumata ala; i tou sarun maṛṛimunsa'a su tempo i tou mappaamattu manarane.

¹²Lal᷊umanna'a su taumata apan masabare su tempo i tou naasomba wawono'a. Ana waugu napawe i tou naataṛṛanga wawono'a udde, i tou sarun manengkamma lal᷊antake, eteudde wiakka apan suete pina'iren Duata su manga taumata apan mandangngu Ruata.

¹³Amungkangu pia sangkatou niawono'annu wawono'a ereudde, ariewe i tou mabbisara, “Wawono'a indi darantane wuassu Ruata,” ana waugu Ruata tawe awono'annu al᷊al᷊eo, wuṛṛu tawe lai mamono'a saran sangkatou.

¹⁴Arawe taumata niawono'anna, amungkangngu i tou wol᷊enganna wuṛṛu panemmannu apulune sassane apan lal᷊eo.

¹⁵Wua'udde, amungkangngu apulune apan lal᷊eo udde tuṛṛutanna, ne lumappute rosa; wuṛṛu amungkangu rosa nahurangke, ne inul᷊eanne papate.

¹⁶Ariewe i yamiu aawusuanna, manga tuṛṛangku apan aranguanna!

¹⁷Suapan aonggola apan mapia wuṛṛu lal᷊antake apan nasuungnga darantane wuassu surga, nisossoku Ruata, Mandariaddi al᷊awo'u asasemakka su langitta. I Tou Ruata apan tawe mawal᷊u, wuṛṛu tawe lai mapaarantan ararandumma.

¹⁸Wuassu apulu-Ne sassane i Tou nandiaddi si ite al᷊aṛṛanang-Nge wuassu ṛengetan-Ne apan atonna. I Tou nandiaddi udde tadea'u i ite maasomba tampa apan apianne su wallatu anambon riadian-Ne.

¹⁹Panutukke indi paapia-pia, manga tuṛṛangnga apan arangnguanna! Suapan taumata ṛinone mal᷊ihakka maddaringikka, arawe mal᷊iwue mabbisara wuṛṛu mal᷊annu masa'u.

²⁰Taumata mal᷊ihakka masa'u tawe maaola'a inolaanne apan mapia, apan maal᷊uassa naungngu Ruata.

²¹Ana waugu udde, rammea'e al᷊awo'u inanaramanna apan nallal᷊uhuranna wuṛṛu lal᷊eo. Sengkampe ringannu awawawo naungnga wisara apan nisuannu Ruata sulal᷊ummu naungngu, ana waugu wisara udde pia taṛṛinone manal᷊amatta si yamiu.

²²Ṛinone i yamiu tumuṛṛutta apa apan niwisaran Duata, arie tumba'u maddaringikka, na'oman sara i yamiu mangawusu watanganni yamiu sassane.

²³Taumata apan maddaringikka wisaran Duata, arawe tawe tumuṛṛutta, udde ere taumata apan tantal᷊anna ma'ellega hatine apan atonna su saruannu saṛṛuminanna.

²⁴Napawe i tou naatutukke mapia-pia, i tou inaite wuṛṛu lapiddu naabul᷊i ereapa ola'u hatine udde.

²⁵Titan Duata nasuungnga wuṛṛu pia taṛṛinone mamallosu taumata. Wuṛṛu taumata apan mammarikissa wuṛṛu mannutukka mapia-pia lapiddu tuttuṛṛutta tita udde, wuṛṛu wal᷊inewe tumba'u maddaringikka see timbul᷊iananna, taumata udde sarun al᷊amatannu Ruata sulal᷊ummu al᷊awo'u inolaanne.

²⁶Amungkangu pia sangkatou mammendama watanganne sangkatou apan matuṛṛutta su agama, arawe i tou tawe maariagga lilane, ne i tou nangawusu watanganne sassane; patataṛṛamawune tawe gunane.

²⁷Tatuṛṛuta su agama apan waresi wuṛṛu tutune su aellegu Ruata Iamangnga eteudde: mantul᷊ungngu al᷊aṛṛana'a asisin pal᷊ussa wuṛṛu manga wawine wal᷊u apan susa, wuṛṛu uariagga wadangnge sassane tadea'u tawe lal᷊eoannu runia indi.