Read Talaud YAKOBUS 2 Bible Online

YAKOBUS 2 - Talaud bible

YAKOBUS 2

¹Manga tuṛṛangku! Ere sangkatou taumata apan mangngimanna Mawu Yesus Kristus, Mawu Apan Mawantuga, arie i yamiu mamile taumata ana waugu ola'u ririne.

²Ana waugu amungkangu pia sangkatou taumata ala apan ual᷊uṛṛen sinsinga wul᷊awanna wuṛṛu laubba mapia nirumanta su ammul᷊annu, see nirumanta lai sangkatou asiangnga apan ual᷊uṛṛen laubba nahahesa'a,

³ne i yamiu lembon mangngaddatta taumata laungnge mapia udde. I yamiu mabbisara si tou, “Wette Tua, aiana'a su addera apianne indi.” Arawe su taumata apan asiangnga i yamiu mabbisara, “Darisikke poiaroddi,” ara'e “A'iante su rapappake isindi.”

⁴Ringannu ma'ola'a aroddi, yamiu na'ola'a palal᷊aṛṛae su wallatu sandingananni yamiu wuṛṛu ma'ellega taumata wuassu ṛingiranna apan lal᷊eo.

⁵Paanaunge, manga tuṛṛangnga apan arangnguanna! Taumata asiangnga su runia indi, nipilen Duata maola'a taumata ala sulal᷊ummu pangangimanna. Manga taumata udde sarun maola'a reengannu al᷊aṛṛana'u Ruata ere suete nipa'iren Duata su taumata apan mandangngu si Tou.

⁶Arawe i yamiu ewe'e mangngal᷊uandaga taumata asiangnga, wutte'e ete taumata ala apan mandal᷊eo wuṛṛu mangngapidi yamiu watukku pallaṛṛuumanna.

⁷Ete i mangitou apan mangngal᷊uandaga aranna awantuhanne apan nisengkammi yamiu wuassu Ruata!

⁸I yamiu ma'ola'a su ṛinone, amungkangu i yamiu tumuṛṛutta titan Araratuanna sulal᷊ummu wageangu Wuke Susi indi, “Pandangngu sansul᷊ungu ere i yamiu mandangngu watangannu sassane.”

⁹Arawe amungkangu i yamiu mammile taumata ana waugu ola'u ririne, i yamiu ma'ola'a rosa, wuṛṛu titan Duata napaal᷊iatta'a manungku eteudde i yamiu lumal᷊awangnga tita.

¹⁰Taumata apan nilumawanga sambau wuassu wallatu manga tita Ruata, udde atappasanne nilumawangnga sarangkanambone.

¹¹Ana waugu isai nabbisara, “Arie passandaga,” ete i tou lai nabbisara “Arie pamate.” Nariaddi amungkangngu i yamiu tawe sumandaga, arawe mammate, ne i yamiu lumal᷊awangnga tita udde lai.

¹²Pabbisarate wuṛṛu pa'ola'e ere taumata apan sarun parikisanna tumuṛṛuttu titan Duata apan mamallosu taumata.

¹³Ana waugu Ruata tawe mapaal᷊iatta'u darangngu-Ne su taumata apan tawe maaillal᷊a darangngu. Arawe darangngu mattohasanna wuassu ṛuumanna!

¹⁴Manga tuṛṛangnga! Apa hunane taumata mabbisara, “I ya'u taumata apan mangngimanna”, amungkangu i tou tawe mapaal᷊iatta'u pallal᷊agune? Wotongnge pangangimanna ereudde maasal᷊amatta si tou?

¹⁵Unnu wisara sangkatou tuṛṛanga esakka ara'e wawine mappanduma laubba wuṛṛu tawe maasuungngu anna su miallo-miallo.

¹⁶Apa hunane i yamiu mabbisara si tou, “Sal᷊amatte mappaattu laubba wakku wuṛṛu sal᷊amatta umanna!” — amungkangu i yamiu tawe mangonggolu apa apan pappandumanni tou su wiakke?

¹⁷Aroddi lai ringannu pangangimanna, amungkangu tawe ipaal᷊iatta'u pallal᷊agu, ne pangangimanna udde tawe gunane.

¹⁸Asinungka piaddu mabbisara, “Pia taumata uatundeeta su pangangimanne wuṛṛu pia lai uatundeeta su pallal᷊agune.” I ya'u sarun sumimbaka, “Ta'ea'o sia'u ereapa taumata pia pangangimanna ringannu tawe pallal᷊agu wuṛṛu i ya'u sarun mapaa'al᷊iatta'u pallal᷊agu manungku i ya'u pia pangangimanna.”

¹⁹I yamiu mangngimanna manungku Ruata tumba'u sambau, are? Ne manga ghaṛṛaho lal᷊eo lai mangngimanna wuṛṛu i mangitou mangngindon katata'utta!

²⁰I yamiu tumaniten woddo! Apa wotonge iapaasilo si yamiu manungku tawe gunane pia pangangimanna wuṛṛu tawe pallal᷊agu?

²¹Pa'ellege si Abraham iupungngu al᷊amonan kite. I tou sinengkammu Ruata ringannu mapia ana waugu pallal᷊agune, eteudde su tempo i tou nanantilli Ishak anangnge, su Ruata su wowon mezbah.

²²Isindi natualage manungku pangangimanna ṛinone iapaal᷊iatta'u pallal᷊agu tadea'u masuungnga.

²³Udde nassul᷊ungu wageangngu Wuke Susi indi, “Abraham mangngimanna Ruata, wuṛṛu ana waugu pangangimanne udde Ruata nanengkamma si tou naola'a sangkatou apan tinumuṛṛuta apulun Duata.” Ana waugu udde Abraham nisago “Hawen Duata.”

²⁴Natualage orassa indi, manungku taumata itarimmattu Ruata ringannu mapia ana waugu inolaannu taumata udde, wuṛṛu wal᷊ine tumba'u ana waugu pangangimanne.

²⁵Pa'ellega lai si Rahab, wawine masandaga udde. I tou tinarimmattu Ruata ringannu mapia ana waugu pallal᷊agune, eteudde su tempo i tou nanarimmattu matataṛṛa so'o taumatan Israel su wal᷊ene wuṛṛu nantul᷊ungi mangitou tinumal᷊angnga su lal᷊anna waine.

²⁶Ne, su ereapa wadangnga ringannu tawe ghaṛṛaho, udde wadangnga nate, aroddi lai pangangimanna tawe pallal᷊agu, udde pangangimanna apan nate.