Read Talaud YAKOBUS 3 Bible Online

YAKOBUS 3 - Talaud bible

YAKOBUS 3

¹Manga tuṛṛangnga! Arie tumaniten manambo wuassu wallatti i yamiu maapulu maola'a huru. I yamiu masingkata manungku i ite apan naola'a huru sarun parikisanna ringannu nangillembo wuassu taumata waine.

²I ite sarangkanambone masokka ma'ola'a pasasal᷊a. Arawe taumata apan taambe na'ola'a pasasal᷊a ringannu manga wisarane, i tou taumata nasuungnga, apan wotongnge maa'ul᷊inna ahewallu ririne.

³Amungkangu i ite manuṛṛin tal᷊i su moṛṛongu awal᷊o tadea'u i tou tumuṛṛutta apulun kite, ne i ite wotongnge mamiaṛṛa'u ahewallu wadangngu awal᷊o udde.

⁴Panganute lai sambau apalla maola'a sasumandinge. Salaiwe apalla sambau inolaanna apan aroddi ahewalle wuṛṛu iaapidu anginna apan ma'ikkatta, arawe i tou iappiaṛṛa'u aul᷊inna apan tumaniten adio'a, tumuṛṛuttu apulu mangangul᷊inna.

⁵Aroddi lai lilan kite: salaiwe lilan kite udde adio'a, arawe i tou wotongnge mamarabungan watanganne su manga inolaanna apan wahewalla. Ṛangngoa'e aroddi ahewalle mahurangnge wotonge tutungannu putungnga apan tumaniten addio'a!

⁶Lila nassul᷊ungu putungnga. Su wadangi ite, i tou naola'a punnu al᷊al᷊eo apan mannal᷊iawukku al᷊al᷊eo su ahewallu wadangi ite. Ringannu putungnga apan darantane wuassu naraka, i tou nanutungnga ahewallu wiakki ite.

⁷Al᷊awo'u winatangnga mal᷊aṛṛaga, manu'u winalanganna, winatangnga tuttondon tianne wuṛṛu inassa wotongnge ṛaroanna, wuṛṛu suete niṛṛaron taumata.

⁸Arawe lilan taumata tawe iaṛṛaron sangkatou taumata. Lila udde lal᷊eo wuṛṛu tawe iapiaṛṛa'a; napenen racunna maapate.

⁹I ite mappaatta ipaadiangkamanna su Ruata Iamangngi ite, arawe lai ipammontoga sansul᷊ungngu taumata, apan suete niola'a tumuṛṛuttu lihiddu Ruata.

¹⁰Wuassu moṛṛongnga apan sambau sumabanga manga wisara aadiangkamanna wuṛṛu lai wisara a'ane. Ṛinone tawe aroddi!

¹¹Apa piaal᷊imatan ua'e apan mapaasabangngu ua'e mapia wuṛṛu ua'e mapetta wuassu al᷊imatane sambau?

¹²Alu ara, manga tuṛṛangku, tawe mabbuan zaitun, wuṛṛu alu anggore tawe mabbuan ara. Al᷊imatan ua'e mapakkada tawe mapaasabangngu ua'e mapia.

¹³Amungkangu su wallatti yamiu pia sangkatou apan pande wuṛṛu pia buddine, ṛinone i tou mapaal᷊iatta'a ringannu mabbiakka mapia, wuṛṛu ringannu ma'ola'a inolaanna apan mapia, apan rarundinganannu awawon naungnga wuṛṛu apapande.

¹⁴Arawe amungkangu i yamiu taṛṛa l᷊uadda, naungnge lal᷊eo, wuṛṛu maṛṛingiddu ririnu sassane, arie mamarabungan apande udde, ana waugu ringannu udde i yamiu mammal᷊elongngu watti'a mapia wuassu Ruata.

¹⁵Apande ereudde tawe wuassu surga. I tou wuassu runia wuṛṛu wuassu apulu naungngu taumata, wuṛṛu wuassu setanna!

¹⁶Suapa pia lu'adda wuṛṛu pallal᷊agu maṛṛingiddu waddangnga sassane, isudde lai asombanganna pabbawawul᷊o wuṛṛu al᷊awo'u inolaanna apan lal᷊eo.

¹⁷Arawe taumata apan pia apande niarantane wuassu surga, i tou paarorone atonna waresi, wua'udde maapulun paddarame, masaṛṛionto'a, wuṛṛu matuṛṛuta. I tou napenen darangngu, wuṛṛu mabbuan manga pallal᷊agu apan mapia. I tou tawe manamba'a wuṛṛu tawe mallilangkamal᷊e'a.

¹⁸Atonna apapia udde wuan bualannu padarame apan niasi'u taumata apan maapulun padarame!