Read Talaud YAKOBUS 4 Bible Online

YAKOBUS 4 - Talaud bible

YAKOBUS 4

¹Wuassuapa darantane al᷊awo'u pabbawawul᷊o wuṛṛu pattatiakka su wallatti yamiu? Wal᷊inewe udde nirumanta wuassu manga apulunu apan siddutu uawawul᷊o sulal᷊ummu ririnu ana see maasomba al᷊al᷊uassu runia!

²I yamiu maapulu, arawe tawe maasomba, ne i yamiu maapulute mamate. I yamiu maṛṛimada arawe tawe maasomba apa raddeaanni yamiu, ne yamiu matatiakke wuṛṛu mabawul᷊ote. I yamiu tawe maasomba apa-apa ana waugu tawe maddorongnga su Ruata.

³Wuṛṛu amungkangu lai yamiu suete naddorongnga, i yamiu tawe maasomba lai, ana waugu tuddan darorongngu nassal᷊a; apa apan radoronganni yamiu udde tumba'u al᷊al᷊uassu watangannu sassane.

⁴I yamiu udde taumata mal᷊awangnga! I yamiu masingkate manungku amungkangu i yamiu uahahawen dunia, ne i yamiu sarun maola'a seettu Ruata? Nariaddi isai-sai apan maola'a hawen dunia indi, i tou maola'a seettu Ruata.

⁵Arie massunna manungku Wuke Susi tawe pinangiananne mabbisara, “Sulal᷊ummu wadangi ite Ruata nangaddon Ghaṛṛaho apan matohassa apulune.”

⁶Salaiwe aroddi, al᷊amattu Ruata apan nionggolla si ite mattohasanna wuassu apulun ghaṛṛahon kite udde. Ana waugu udde sulal᷊ummu Wuke Susi niwoṛṛeta lai, “Ruata mandooppa taumata mawunga, arawe inul᷊eanne i Tou mandangngu taumata apan naungnge mawawo.”

⁷Ana waugu udde, paatuṛṛutte Ruata wuṛṛu ro'apete Setanna, ne Setanna sarun tumal᷊angnga wuassi yamiu.

⁸Pangundaniten Ruata, ne Ruata lai sarun mangundanin kamiu. Ukkase limanu, i yamiu apan marosa! Wuṛṛu paatilangke naungngu, i yamiu apan naungnge uapenga!

⁹Ṛinone atonna-tonna i yamiu sumassilla wuṛṛu lumuai lapiddu lumal᷊o; ṛinone lal᷊agenu maola'a lal᷊uai wuṛṛu al᷊al᷊uannu maola'a asasusa!

¹⁰Ṛinone i yamiu sumallungu watangannu su saruannu Mawu, ne Mawu sarun manduitti yamiu.

¹¹Manga tuṛṛangnga, arie i yamiu uaal᷊uandaga ara'e mapaasal᷊an sangkatou ringannu waine. Taumata apan mangal᷊undaga wuṛṛu mapaasal᷊an tuṛṛange sansul᷊unga Saṛṛani, i tou mangngal᷊uandaga wuṛṛu mapaasal᷊an titan Duata. Wuṛṛu amungkangu i yamiu mapaasal᷊an titan Duata, udde atappasanne i yamiu tawe tumuṛṛutta manga tita udde, ewe'e maola'a lai mapaasal᷊an tita udde.

¹²Wutte'e tumba'u sangkatou apan wotongnge makkuumannu taumata wuṛṛu mamarikissa taumata. Eteudde Ruata apan uataṛṛino manal᷊amatta wuṛṛu mamate. Nariaddi, isai yamiu, na'oman sara i yamiu mapaasal᷊an sansul᷊ungu taumata?

¹³Manga tuṛṛangnga apan nabbisara, “Allo indi ara'e tiṛṛabbi yami sarun inai watukku soa sambau wuṛṛu matana'a poiaroddi santonna al᷊annune ana waugu mabbal᷊u'a wuṛṛu maddea'a roitta,” — daringiṛṛe'o tatantiro'u indi.

¹⁴Apa apan sarun mariaddi su wiakku tiṛṛabbi, yamiu sassane lai wagga! I yamiu tumba'u ere timbulla apan aellehanna tal᷊an kadio'a, wua'udde mawul᷊i.

¹⁵Ṛinone i yamiu mabbisara arendi, “Amungkangu Mawu mamala, i yami sarun mabbiakka wuṛṛu mammanara indi ara'e udde.”

¹⁶Arawe orassa indi yamiu namarabunga wuṛṛu matal᷊imoṛṛonganna. Anambon wisaranu udde nassal᷊a.

¹⁷Ana waugu udde, taumata apan masingkatu apapia apan ṛinone manaranne, arawe i tou tawe nammanara, taumata udde marosa.