Read Talaud YAKOBUS 5 Bible Online

YAKOBUS 5 - Talaud bible

YAKOBUS 5

¹Manga tuṛṛangnga, manga taumata ala! Padaringikka tatantiro'u. Ṛinone i yamiu lumuai wuṛṛu lumallu ana waugu i yamiu sarun matataṛṛanga asasusa!

²Paa'alanu nawukku'e. Peddenu nianten wa'u'a.

³Wul᷊awanna wuṛṛu sal᷊aanu nitaiante, taine sarun maola'a tatiala lumawangnga si yamiu wuṛṛu sarun umanna wadangu ma'oman sara masue ere putungnga. I yamiu suete nangombon darotongnga su tempo maraniten allon panginsueanne.

⁴I yamiu tawe namaekka lal᷊antaku manga taumata apan mammanara su wawail᷊annu. Orassa indi paddaringikke sasal᷊iomanni mangitou! Manga taumata apan nangammullu wuan bawail᷊annu, mangngintul᷊i ma'iontolla wuṛṛu aintul᷊in mangitou na'omate su tal᷊ingan Duata, Ruata Lembon Mataṛṛino.

⁵I yamiu suete nabbiakka su al᷊al᷊uassa, wuṛṛu naatemmate apapian dunia indi. Yamiu paṛṛimaunnapa ere tantal᷊anna mapaatawan wadangnga ipaṛṛaddo allo pamamototanna.

⁶I yamiu maṛṛuumanna wuṛṛu mammate manga taumata apan tawe sal᷊ane, wuṛṛu i mangitou tawe lumawangnga si yamiu.

⁷Ana waugu udde, paasabbarete manga tuṛṛangku, ma'oman sara Mawu rumanta. Pa'ellege ereapa asabarene sangkatou mabbawailla ual᷊aṛṛado ma'oman sara letangnge mangonggolu hessine apan maarega si tou. Ringannu asasabbare i tou uaraṛṛaddo uranna su tempo manga rongnga matontonga wuṛṛu uranna su tempo maddongnga.

⁸Ṛinone i yamiu lai masabbare wuṛṛu pia naungnga wahewalla, ana waugu allon darantan Mawu maranite.

⁹Arie sumamboṛṛe wuṛṛu mapapaṛṛansila, tadea'u i yamiu tawe irṛṛuumannu Ruata. Paanaunge! Mallaṛṛuungnga maranite, wuṛṛu nasaddiate rumanta.

¹⁰Manga tuṛṛangnga, paanaunge manga nabi apan mabbisara ringannu arannu Mawu. I mangitou masabbare wuṛṛu mataṛṛanga su asasusa. Nariaddi ola'e i mangitou ere sambau tul᷊ada.

¹¹I mangitou nisaggo su lal᷊umanna'a ana waugu i mangitou masabare. I yamiu suete naaringikka su ola'u asasabaren Ayub, wuṛṛu i yamiu masingkata lai ereapa panginsueanne Mawu nangal᷊amatta si tou. Ana waugu Mawu lembon marangngu wuṛṛu naung-Nge mapia.

¹²Apan apianne eteudde: Arie massalu, mawae ringannu arannu langitta, ara'e arannu runia, ara'e ringannu manga apa lai. Wal᷊oa'e “Ore” amungkangu pandumannu ore, wuṛṛu “Tawe” amungkangu pandumannu tawe; tadea'u i yamiu tawe maasomba ṛuumannu Ruata.

¹³Amungkangu su wallatti yamiu pia sangkatou apan tantal᷊anna massusa, ṛinone i tou umal᷊iomanna. Amungkangu piaddu lulluassa, ṛinone i tou mangantari maddalo Ruata.

¹⁴Amungkangu piaddu maradda'a ṛinone i tou mamaggo manga piaṛṛa'u jamaatta. Wuṛṛu ṛinone manga piaṛṛa'u jamaatta udde umal᷊iomannu taumata maradda'a udde wuṛṛu mamuṛṛan lana sulal᷊ummu arannu Mawu.

¹⁵Amungkangu aal᷊iomanni mangitou niruitta ringannu pangangimanna, Mawu sarun mapaapian taumata maradda'a udde, wuṛṛu mangampunga manga rosa apan suete niolangnge.

¹⁶Ana waugu udde, ṛinone i yamiu uaa'a'u pasasal᷊a wuṛṛu uaa'al᷊iomanna, tadea'u i yamiu iapaapia. Aal᷊iomannu taumata apan tuttuṛṛutta apulun Duata, pia taṛṛino apan wahewalla.

¹⁷Elia taumata lai ere i ite. I tou u'al᷊iomanna ringannu atonna-tonna, tadea'u tawe manguranna, ne tawe nanguranna tallu tonna annumu wul᷊anna al᷊annune.

¹⁸Wua'udde i tou inumal᷊iomanna apia, see langitta nanossokku uranna na'oman sara leta'a nangonggolu hessine apia.

¹⁹Manga tuṛṛangku! Amungkangu wuassu wallatti yamiu pia sangkatou apan maddirite tumuṛṛutta al᷊aṛṛa'u Ruata, wua udde sangkatou waine napaawelengngu taumata udde ringannu Ruata,

²⁰naungete addoanne indi: Taumata apan na'ola'a taumata marosa mabelengnga wuassu lal᷊anne apan nassal᷊a, taumata udde nanal᷊amatta niawan taumata marosa udde wuassu papate wuṛṛu na'ola'a manambo rosa niampunganna. Tabea wuassi yami, Yakobus