Read Talaud 1 PETRUS 2 Bible Online

1 PETRUS 2 - Talaud bible

1 PETRUS 2

¹Ana waugu udde, rammea'e wuassu ririnu al᷊awo'u al᷊al᷊eo; ariete lai pamahia, wuṛṛu arie pallilangkamal᷊e'a. Ariete mannaungnga lal᷊eo, wuṛṛu arie pangngadio'a taumata waine.

²Ṛinone i yamiu maola'a ere ana'a wakku niasungkanga, sidutu maroun susu ghaṛṛaho apan waresi. Ringannu aroddi yamiu sarun tumuwo wuṛṛu iapaasal᷊amatta.

³Sulal᷊ummu Wuke Susi uawoṛṛetta arendi, “I yamiu suete naapendama sassane aroddi apiane Mawu.”

⁴Ana waugu udde, rantate ringannu Mawu. I Tou naal᷊ihida watu apan wiakka, watu apan nirammen taumata ana waugu sansunnanna tawe gunane; arawe nipilen Duata maola'a watu apan maarega.

⁵I yamiu naal᷊ihida manga watu apan wiakka. Ana waugu udde ṛinone i yamiu pia apulu ipaatta ipa'ola'a Wal᷊en Duata apan pia ghaṛṛaho. Ringannu aroddi yamiu naola'a manga imam, apan mabbiakka tumba'u hunane su Ruata, wuṛṛu sulal᷊ummi Yesus Kristus mangonggola su Ruata, sasamban pangangimanna apan ipaapulun Duata.

⁶Ana waugu sulal᷊ummu Wuke Susi uawoṛṛetta arendi, “I Ya'u suete namile sambau watu maarega, apan Ta'u niaddo su Sion maola'a watu apianne; wuṛṛu taumata apan mangngimanna si Tou tawe iapaasusa naungnge.”

⁷Watu udde lembon maarega si yamiu apan mangngimanna. Arawe su taumata apan tawe mangngimanna, matipusse manga araddoanne su Wuke Susi ereindi, “Watu apan tawe ipaattu manga ma'aola'a wal᷊e udde wutte'e naola'a watu apianne.”

⁸wuṛṛu “Eteudde watu apan maatara taumata, watu apan naaema'a si mangitou.” I mangitou natara ana waugu i mangitou tawe mangngimanna wisaran Duata. Ete aroddi suete tinantunu Ruata su ola'i mangitou.

⁹Arawe i yamiu udde walahanna apan niapile, manga imam apan mangngimbe ratu, walahanna naukkassa, tumba'u hunan Duata, walahannu Duata sassane. Ruata namile si yamiu wuṛṛu namaggo si yamiu sinumabangnga wuassu araranduma sumutta su asasemakke apan mal᷊endappa ringannu pandumma tadea'u i yamiu mamasingkatu watti'a su ola'u manga inolaan-Ne apan wahewalla.

¹⁰Dorone i yamiu wal᷊ine walahannu Ruata, arawe orassa indi yamiu nareengke al᷊aṛṛana'u Ruata. Dorone i yamiu tawe rangnguannu Ruata, arawe orassa indi yamiu manengkamma darangngu-Ne.

¹¹Manga tuṛṛangnga apan arangnguanna! I yamiu uddewe taumata lumal᷊o'a wuṛṛu mattindaho su runia indi. Ana waugu udde i ya'u sumal᷊ande si yamiu tadea'u i yamiu tawe tumuṛṛutta apulun taumata apan sidutu uapapangalo lullawangnga ṛimuudda.

¹²Pallal᷊agunu su wallatu taumata apan tawe maaillal᷊a Mawu ṛinone lembon mapia, na'oman sara napawe i mangitou mangngadio'a si yamiu ere taumata lal᷊eo, i mangitou lai sarun manga'u inolaannu apan mapia na'oman sara i mangitou sarun maddalo Ruata su allo daranta-Ne.

¹³Ringannu arannu Mawu, ṛinone i yamiu matuṛṛuta su manga tembonannu taumata: mawae su Kaisar apan naola'a tembonanne apan apianne,

¹⁴aroddi lai su gubernure apan nitebo'u Kaisar iapaṛṛuumannu taumata apan ma'ola'a al᷊al᷊eo wuṛṛu mangngaddatta taumata apan ma'ola'a apapia.

¹⁵Ana waugu Ruata maapulu tadea'u ringannu manga inolaannu apan mapia i yamiu maṛṛapinga moṛṛongu taumata apan wagga maggahatto.

¹⁶Ṛinone i yamiu mabbiakka ere taumata walate apulune, arawe arie mappaatu apulu naungngu udde ipallindumma al᷊al᷊eo, ewe'e pabbiakke ere sangkatou allangngu Ruata.

¹⁷Pangadate anambon taumata, paarangngu manga tuṛṛangu apan sansul᷊ungnga Saṛṛani. Ata'utten Ruata, wuṛṛu pangadate Kaisar.

¹⁸Manga tuṛṛangnga apan naola'a mangangimbe, tuṛṛutte mawunu ringannu al᷊awo'u aadata; wal᷊ine tumba'u si mangitou apan naungnge mapia wuṛṛu masaṛṛionto'a, arawe si mangitou lai apan maṛṛagisa.

¹⁹Ruata sarun mangal᷊amatta si yamiu, amungkangu i yamiu ana waugu naatutukka apulun Duata, masabare maataṛṛanga inolaanna apan wengkolla.

²⁰Ana waugu amungkangngu i yamiu masabare matataṛṛangu ṛuumanna apan ṛinone maṛṛia'a si yamiu ana waugu pasasal᷊a? Arawe amungkangu i yamiu ringannu sabare matataṛṛangnga asasusa apan naṛṛia'a si yamiu ana waugu na'ola'a apapia, ne Ruata sarun mangal᷊amatta si yamiu.

²¹Ana waugu eteudde Ruata namaggo si yamiu. ana waugu Kristus sassane suete natataṛṛangnga asasusa ana waugu i yamiu, wuṛṛu ana waugu udde i Tou nangonggolu tul᷊ada si yamiu, tadea'u i yamiu manantuṛṛutta wal᷊ada-Ne.

²²Tawe saran paassa i Tou na'ola'a rosa, wuṛṛu taambe pia sangkatou taumata naaringikka si Tou namahia.

²³Su tempo i Tou lallelanna, i Tou tawe nabal᷊issu lal᷊ela. Su tempo i Tou uatataṛṛanga, i Tou tawe namansaga; i Tou tumba'u nanantillu hatto-Ne su Ruata, Mallaṛṛuungnga apan matul᷊ida udde.

²⁴Kristus sassane namasanna manga rosan kite su watangan-Ne roso su alu arussa, tadea'u i ite mapallosa wuassu taṛṛinon dosa, wuṛṛu mabbiakka tuttuṛṛuta apulun Duata. Ete manga lessan Kristus apan nangapia si yamiu.

²⁵Dorone i yamiu ere domba nilamammiṛṛanne, arawe orassa indi yamiu suete niapidda apia tumantalongnga Mallal᷊u'adda wuṛṛu Mamamadul᷊i niawanu.