Read Talaud 1 PETRUS 5 Bible Online

1 PETRUS 5 - Talaud bible

1 PETRUS 5

¹I ya'u maddorongnga aellegu manga piaṛṛa'u jamaannu. I ya'u namoṛṛeta indi, ere sangkatou tuṛṛangnga piaṛṛangnge wuṛṛu ere taumata apan suete naasilo sassane asasusan Kristus, wuṛṛu sarun wantuhanna lai suaddio'a, napawe awawantugi Kristus niapaasilote su taumata. I ya'u sumal᷊ande

²tadea'u yamiu mallu'adda ammul᷊annu domba apan tinantillu Ruata si yamiu. Lu'arete i mangitou ringannu al᷊al᷊uassu naungnga su ereapa ipaapulun Ruata, wuṛṛu arie ringannu ipabbawata'a. Arie lai ma'ola'a manaranu ana see maasomba auntunganna, ewe'e ana waugu i yamiu atonna-tonna maapulu mangimbe.

³Arie pa'ola'a ere tembonanne si mangitou, apan tinantilla si yamiu, ewe'e i yamiu ṛinone maola'a tul᷊ada si mangitou.

⁴Wuṛṛu su tempo Mallal᷊u'adda Mawantuga udde rumanta apia, i yamiu sarun manengkamma mahkota apan mal᷊endapa wuṛṛu tawe mawulle sal᷊endamme.

⁵Aroddi lai tuṛṛangnga, manga umbasanna maṛṛuala. Paatuṛṛuta su manga timmade. Tuṛṛanga sarangkanambone ṛinone tawe mamarabunga wuṛṛu uaa'imbe sangkatou ringannu sangkatou ringannu awawawon naungnga. Ana waugu sulal᷊ummu Wuke Susi uawoṛṛetta arendi, “Ruata mannompola taumata mawunga, arawe mandangngu taumata naungnge mawawo.”

⁶Ana waugu udde panantillen watangannu su al᷊ungngu liman Duata apan matohassa, tadea'u i Tou mapaatanggaki yamiu napawe nia'omante tempone.

⁷Tantila'e anambon asasinggawangngu su Ruata, ana waugu i Tou uapaddul᷊i si yamiu.

⁸Ṛinone i yamiu paatehamma wuṛṛu paariagga! Ana waugu Setanna udde seetti yamiu. I tou ere singa u'amatta mammal᷊intadu runia lapiddu mannuntingikka maddea'a pabbawiakke.

⁹Roopete i tou ringannu pangangimanna apan matohassa, ana waugu i yamiu masingkata manungku manga tuṛṛangnga sansul᷊ungnga Saṛṛani apan waine su ahewallu runia uatataṛṛanga lai ere i yamiu.

¹⁰Arawe napawe i yamiu suete natataṛṛangnga sangkatempo, Ruata sassane sarun manuungngi yamiu. I tou sarun mapaatagekki yamiu wuṛṛu manohassa si yamiu see mapaarisikki yamiu. Ana waugu ete i Tou udde Ruata apan naung-Nge lembon mapia, apan suete namago si yamiu mamendama suadio'a awawantu-Ge sarangkal᷊o'engnge sulal᷊ummi Kristus.

¹¹Ete i Tou apan uataṛṛino sara mal᷊annu-l᷊annu. Amin.

¹²Sura'u apan maautta indi ta'u niwoṛṛeta si yamiu ringannu sasumbalan Silas, apan aantimangku sangkatou tuṛṛangnga Saṛṛani apan matuṛṛuta. I ya'u maapulu mangonggolu sasasa si yamiu, wuṛṛu manohassa pangangimanni yamiu manungku apa apan ta'u niwoṛṛeta indi watti'a atonna su ola'u darangngun Duata. Ṛinone i yamiu mangke uaantimma su darangngu udde.

¹³Manga hawe jamaatta sambau su Babilon, apan nipilen Duata lai, napawawan tabea si yamiu; aroddi lai ana'u Markus apan arangnguanna.

¹⁴Paa'addate sangkatou ringannu waine ringannu napenen darangngu ere tuṛṛanga rundusa Saṛṛani. Antimanna Mawu mangonggolu paddarame si yamiu sarangkanambone apan naola'a pussa'an Kristus. Tabea wuassi yami, Petrus