Read Talaud 1 YOHANES 1 Bible Online

1 YOHANES 1 - Talaud bible

1 YOHANES 1

¹Lal᷊oṛṛon suratta indi mannal᷊a'a ola'u Ṛengetanna apan mangngonggolu wiakka, eteudde Ṛengetanna apan piate ro'en wuassu al᷊amonane. I yami suete naaringikka, wuṛṛu suete naasilo matan kami sassane. I yami suete naellega, wuṛṛu suete nangagasu liman kami.

²Su tempo wiakka udde niapaal᷊iatta'a, i yami naasilo. Ana waugu udde i yami nattiala su olange udde. I yami mammasingkata si yamiu su ola'u wiakka tutune wuṛṛu saran mal᷊annu-l᷊annu, apan su sambau ringannu Ruata Iamangnga, wuṛṛu apan suete niapaal᷊iatta'a si yami.

³Apa apan suete niasiloanna wuṛṛu niaringiṛṛani yami, eteudde lai apan iappasingkati ami si yamiu, tadea'u i yamiu suadio'a ringanni ami wotongnge maapendamma wiakka uaaukka ringannu Iamangnga wuṛṛu ringannu Anang-Nge Yesus Kristus.

⁴I yami namoṛṛetu indi tadea'u naungngi ite atonna-tonna mal᷊uassa.

⁵Ete indi watti'a apan suete niaringiṛṛani ami wuassu Anang-Nge wuṛṛu apan iwabbatti'i ami si yamiu: Ruata eteudde asasemakka, wuṛṛu si Tou tawe araranduma saran kadio'a.

⁶Amungkangu i ite mabbisara manungku i ite mabbiakka uaaukka ringanni Tou, arawe i ite mabbiakka su araranduma, ne i ite nangawusu mawae ringannu wisara ara'e lai ringannu pallal᷊agu.

⁷Arawe amungkangu i ite mabbiakka sulal᷊ummu asasemakka ere lai Ruata sulal᷊ummu asasemakka, ne i ite mabbiakka uaaukka atonna, uasangkapia sangkatou ringannu waine, wuṛṛu ṛaṛṛan Mawu Yesus, Anang-Nge, namaresi si ite wuassu al᷊awo'u rosa.

⁸Amungkangu i ite mabbisara manungku i ite tawe paddarosa, i ite nangawusu watanganni ite sassane; wuṛṛu Ruata tawe sulal᷊ummu naungngi ite.

⁹Arawe amungkangu i ite manga'u al᷊awo'u rosan kite su Ruata, i Tou sarun manipussa paaire-Ne wuṛṛu ma'ola'a atatul᷊idda. I Tou sarun mangampunga manga rosan kite wuṛṛu mangukkasa si ite wuassu al᷊awo'u al᷊al᷊eon kite.

¹⁰Arawe amungkangu i ite mabbisara manungku i ite tawe paddarosa, i ite maṛṛangngo manungku Ruata udde taṛṛa awusu wuṛṛu i ite tawe uaraddon wisaran Duata sulal᷊ummu naungngi ite.