Read Talaud MAL᷊AṚṚUUNGNGA 1 Bible Online

MAL᷊AṚṚUUNGNGA 1 - Talaud bible

MAL᷊AṚṚUUNGNGA 1

¹Napawe i Yosua natete, walahannu Israel naiwal᷊o MAWU, “MAWU, ṛuanganna suapane wuassi i yami apan ṛinone paarorone inai mamangalo taumatan Kanaan?”

²MAWU sinumimbakka, “Walahanni Yehuda. I mangitou buatte nionggol᷊annu taṛino iapaaṛo wanua udde.”

³Ana see walahanni Yehuda nabbisara walahanni Simeon, “Sumbal᷊i i yami namangalo taumatan Kanaan wuṛṛu nangaṛo leta'a apan nionggolu MAWU si yami. Yami lai sarun massumbala si yamiu mangaṛo leta'a apan nionggolu MAWU si yamiu.” Ne ruanganni Simeon

⁴wuṛṛu ruanganni Yehuda inaite namangalo suadio'a. Ne MAWU nangonggolu auntunganna si mangitou su taumatan Kanaan wuṛṛu taumatan Feris. Mapul᷊o ṛiwu su atoune tantaran seetta nate su Bezek.

⁵I mangitou naasangkalla si Adoni-Bezek, ratu su wanua udde, ne i mangitou namangalote si tou.

⁶I tou tinumal᷊angnga, arawe i mangitou nangenggenna wuṛṛu nanametta si tou ana see inangngu lima wuṛṛu leddane nipototta.

⁷Unni Adoni-Bezek, “Dorone pitum pul᷊o su atoune ratun seetta ta'u nipototta inangngu lima wuṛṛu leddane, ana see i mangitou ta'u niwala niumanna manga anna lambene apan tinumaṛoto wuassu medda'u. Orassa indi Ruata na'ola'a si ya'u ere lai ya'u na'ola'a si mangitou.” Wua'udde i Adoni-Bezek niapidda watukku Yerusalem, ne i tou natete poiaroddi.

⁸Taumatan Yehuda namangalo Yerusalem, ana see nangaṛo wuṛṛu nanoṛobba soa udde see lai namate tumanangnge.

⁹Wua'udde i mangitou inaite lai namangalo taumatan Kanaan apan uatana'a su panenteanna, wuṛṛu su manga sendekku wuidda; wuṛṛu lai i mangitou apan uatana'a su leta'a mamara samba'an timukka,

¹⁰wuṛṛu su soa Hebron, eteudde soa apan paarorone isassago Kiryat-Arba. Isudde taumatan Yehuda namaddon amonanni Sesai, Ahiman wuṛṛu Talmai.

¹¹Wuassu Hebron, taumatan Yehuda inaite namangalo soan Debir, apan su tempo udde aranne Kiryat-Sefer.

¹²Sangkatou suwallatu ruanganni Yehuda udde, aranne i Kaleb, nabbisara, “Isai apan botongnge maapangaṛo Kiryat-Sefer, i tou wotongnge maawingngu ana'u maṛuala i Akhsa.”

¹³I Otniel ana'u tuarin Kaleb aranne i Kenas, inaite nangaṛo soa udde. Ne i Kaleb nangonggolen Akhsa, anangnge maola'a awingngi Otniel.

¹⁴Su allo itarua na'awingnga, i Otniel namata'i Akhsa tadea'u madorongnga santampa leta'a su iamange. Ne i Akhsa sinumossoke wuassu keledai, ana see i Kaleb naiwal᷊o si tou apa ipa'apulune.

¹⁵I Akhsa sinumimbakka, “I ya'u mapulu manga pira al᷊imatan kua'e, ana waugu leta'a apan nionggoli papa si ya'u udde leta'a annalanne.” Ne i Kaleb nangonggola si tou al᷊imatan ua'e su ul᷊une wuṛṛu al᷊imatan ua'e su wunnene.

¹⁶Papapulunnu iamangngu la'iananni Musa, eteudde manga taumatan Keni, tinumantalonga taumatan Yehuda sinumabbanga wuassu Yerikho, soam kurma, wuṛṛu inaite watukku wageangngu leta'a apan maṛṛasa alu su samba'an timukku Arad su Yehuda. Poiaroddi i mangitou namanua suwallatu walahannu Amalek.

¹⁷Wua'udde su sambau ringanu ruanganni Simeon, ruanganni Yehuda inaite namangalo wuṛṛu namaddon taumatan Kanaan apan uatana'a su soa Zefat. I mangitou nantal᷊an soa udde, wua'udde nisoṛobba ana see aranne nisaggo Horma.

¹⁸MAWU nantul᷊ungngu taumatan Yehuda na'oman sara i mangitou wotongnge napangaṛṛo wageangngu panenteanna. Arawe i mangitou tawe napaangaṛo Gaza, Askelon ara'e lai Ekron wuṛṛu manga wanua maranine, ana waugu manga walahanna apan uatana'a su al᷊o'engngu apanne, uatahuanna manga kereta pangalo wuassu atta'a; ana waugu udde taumatan Yehuda tawe naal᷊imbuakka si mangitou.

²⁰Ere buatte nirolokki Musa, Hebron ionggola si Kaleb, ana waugu dorone tatalluamonanna wuassu pappapulunni Enak buatte nilimbuaṛanni Kaleb wuassu soa udde.

²¹Ruanganni Benyamin tawe naal᷊imbuakka taumatan Yebus niapasabbanga wuassu soa Yerusalem. Ana waugu udde taumatan Yebus ta'e uatana'a poiaroddi suadio'a ringannu taumatam Benyamin.

²²Ruanganni Efraim wuṛṛu Manasye papapulunni Yusuf, inaite namangalo soa Betel, apan su tempo udde aranne Lus. Ne MAWU nantul᷊ungngi mangitou. Su tempo matataṛaso'o nirolokka mattuddan soa udde,

²⁴i mangitou nassomban sangkatou esakka apan nirumanta wuassu soa udde. Unnu mangitou si tou, “Amungkangngu i'o mantul᷊ungngi yami, tadea'u i yami maasutta sulal᷊ummu soa indi, i yami sarun ma'ola'a si yamiu ringannu mapia.”

²⁵Ne taumata udde namantingidda si mangitou lal᷊anna sasuttanna watukku soa udde. Ana see manga taumatan Efraim wuṛṛu Manasye sinumutta su soa udde ana see namate anambon tumanangnge, nallambe ete taumata udde wuṛṛu manga tuṛangnge.

²⁶Wua'udde i tou namengkangke watukku wanuan taumatan Het, ana see napararisikku sambau soa isudde wuṛṛu nisaggo Lus. Soa udde sidutu aranne ta'e aroddi.

²⁷Walahanni Manasye tawe nallimbuakka tumana'u soa Bet-Sean, Taanakh, Dor, Yibleam wuṛṛu Megido ringannu manga ampunga maranine. Nariaddi taumatan Kanaan sidutu uatana'a isudde.

²⁸Atonna napawe taumatan Israel niatambante atohanne, i mangitou mammata'u taumatan Kanaan mammanara manaram mangitou, arawe i mangitou lai tawe nallimbuakka manga taumatan Kanaan wua isudde.

²⁹Su soa Gezer, ruanganni Efraim tawe nallimbuakka taumatan Kanaan, tumana'u soa udde. Nariaddi, taumatan Kanaan ta'e sidutu uatana'a isudde suadio'a ringanni mangitou.

³⁰Tumana'u soa Kitron wuṛṛu Nahalol tawe lai nilimbuaṛannu ruanganni Zebulon. Ana waugu udde taumatan Kanaan sidutu ta'e uatana'a isudde suadio'a ringanni mangitou, arawe manga taumatan Kanaan udde niwata'a mammanara manaram mangitou.

³¹Tumana'u soa Ako, Sidon, Ahlab, Akhzib, Helba, Afek wuṛṛu Rehob tawe lai nilimbuaṛannu ruanganni Asyer.

³²Ana waugu udde taumatan Kanaan, tumana'a tutune su wanua udde, ta'e uatana'a isudde suadio'a ringannu taumatan Asyer.

³³Tumana'u soa Bet-Semes wuṛṛu Bet-Anat tawe nilimbuaṛannu ruanganni Naftali. Ana waugu taumatan Kanaan, tumana'u tutune su wanua udde ta'e uatana'a isudde suadio'a ringannu taumatan Naftali. Arawe i mangitou niwata'a mammanara manaran taumatan Naftali.

³⁴Walahannu Amori sidutu ta'e uatana'a su Ayalon, Saalbim wuṛṛu Wowon Heres, ana waugu ruanganni Dan nisesse'i mangitou watukku penenteanna, wuṛṛu tawe niwala lumintukka su leta'a ratakke. Arawe walahannu Amori udde sidutu iradolokku ruangannu Efraim wuṛṛu Manasye see lai niwata'a mammanara manaran walahanna darua udde.

³⁶Su Sela samba'a sawannakka, passarannu leta'u manga taumatan Amori sumabbi Sasaannu Akrabim.