Read Talaud MAL᷊AṚṚUUNGNGA 10 Bible Online

MAL᷊AṚṚUUNGNGA 10 - Talaud bible

MAL᷊AṚṚUUNGNGA 10

¹Napawe i Abimelekh natete, i Tola ana'i Pua, naola'a piaṛange, mamallossu taumatan Israel. I tou pulunni Dodo wuassu ṛuanganni Isakhar. I tou uatana'a su Samir su wageangngu panenteannu Efraim.

²Ruan pul᷊o tallu su tonnane al᷊annune i tou uapiaṛa'u walahannu Israel, wua'udde i tou natete ana see nilabbinga su Samir.

³Nanansunna si Tola, Israel nipiaṛa'i Yair ruan pul᷊o dua su tonnane al᷊annune. I Yair taumata wuassu Gilead.

⁴Anangnge esakka tallun pul᷊o su atoune. I mangitou uatahuanna tallun pul᷊o keledai sasa'eanna wuṛṛu tallun pul᷊o ampunga su leta'u Gilead. Manga ampunga udde isassago manga ampungi Yair.

⁵Ne i Yair natete, wuṛṛu nilabbinga su Kamon.

⁶Walahannu Israel na'ola'e rosa apia su MAWU. I mangitou tate mappandumma MAWU wuṛṛu tate lai massubba si Tou. I mangitou massubbate manga mongannu Baal wuṛṛu Asytoret, wuṛṛu mongannu manga walahannu Siria, Sidon, Moab, Amon wuṛṛu Filistin.

⁷Ana waugu udde MAWU nasa'u su walahannu Israel, na'oman sara i Tou namalan walahannu Filistin wuṛṛu balahannu Amon namarenta si mangitou.

⁸Mapul᷊o ual᷊o su tonnane al᷊annune walahanna darua udde mammarenta anambon taumatan Israel apan uatana'a su Gilead, eteudde leta'u taumatan Amori su samba'a ra'in Sal᷊ukku Yordan. I mangitou tumaniten maṛagissa mamarenta taumatan Israel.

⁹Ewe'e lai taumatan Amon tinumumbe Sal᷊ukku Yordan ana waugu inai mamangalo ruangannu Yehuda, Benyamin wuṛṛu Efraim na'oman sara ruangannu Israel tumaniten uatataṛangnga asasusa.

¹⁰Ana see walahannu Israel sinumal᷊andete MAWU, wisarane, “I yami buatte na'ola'a rosa Si'o, ana waugu i yami tawe manaile Si'o, oh Ruatan kami. I yami massubba manga mongannu Baal.”

¹¹MAWU sinumimbakka, “Dorone i yamiu niallangngu balahannu Mesir, Amori, Amon, Filistin, Sidon, Amalek wuṛṛu walahannu Maon. Ana see su tempo udde i yamiu sinumal᷊ande lai si Ya'u, are? Angngerate i Ya'u tawe nanal᷊amatta si yamiu wuassu taṛinon mangitou?

¹³Salaiwe aroddi, yamiu ewe'e ta'e lai tuttal᷊iudda si Ya'u, ana see inai massubba manga monganna. Orassa indi Ya'u maddirite mamallossi yamiu apia.

¹⁴Roote ringannu manga monganna apan nipilen kamiu udde. Sassal᷊andete si mangitou! Walate i mangitou mantul᷊ungnga su tempo i yamiu sulal᷊ummu asasusa.”

¹⁵Arawe ruangannu Israel nabbisara MAWU, “Yami narosate, MAWU. Ola'e suereapa ipaapulu-Nu, sawal᷊iate I'o mantul᷊ungngi yami su allo indi.”

¹⁶Wua'udde anambon paal᷊uanna sassubbanna nirammete si mangitou, ana see nassubbate Ruata. Ne Ruata nompo'a naung-Nge naasilo si mangitou sulal᷊ummu asasusa.

¹⁷Su tempo udde tantaran Amon uasasadiate inai mapapangalo. I mangitou naddasanna su Gilead. Ruangannu Israel naammule lai wuṛṛu naddasanna su Gilead.

¹⁸Poiaroddi tumanangnge wuṛṛu manga piaṛa'u ruangannu Israel ua' aiwal᷊ote, tanne wuassu wallati mangitou pia sangkatou apan baṛani namatten lutangnga mando'appa balahannu Amon. Taumata udde sarun pileanna maola'a piaṛa'u anambon taumatan Gilead.