Read Talaud MAL᷊AṚṚUUNGNGA 11 Bible Online

MAL᷊AṚṚUUNGNGA 11 - Talaud bible

MAL᷊AṚṚUUNGNGA 11

¹I Yefta uddewe sangkatou tantara apan matohassa wuṛṛu waṛani. I tou uatana'a su Gilead. Iamange aranne i Gilead arawe inangngene sangkatou masandaga.

²Iamange pia ana'a esakka waine wuassu sawa awingnga. Napawe al᷊aṛana'a udde wahahewalle i mangitou nallimbuakka si Yefta wuassu wal᷊en. I mangitou nabbisara si Yefta, “I tou tawe maasomba tahia saran addio'a wuassu iamangi yami, ana waugu i'o ana'u wawine waine.”

³Ana waugu udde i Yefta nattal᷊ein manga tuṛangnge ana see nilumintukka wuṛṛu natana'e su leta'u Tob. Poiaroddi sangkammul᷊anna taumata lal᷊eo naammuli tou wua'udde i mangitou inaite naṛampassa saranapa.

⁴Manga pira tempo wua'udde taumatan Israel nipangaloannu taumatan Amon.

⁵Su tempo olangnge udde nariaddi, manga tembonannu Israel poi su Gilead inaite wuṛṛu nangahe si Yefta manantangngu leta'u Tob.

⁶I mangitou nabbisara, “Piaṛaa'e yami mando'appa taumatan Amon.”

⁷Arawe i Yefta sinumimbakka, “Wal᷊inewe i yamiu tumaniten maddantingku? I yamiu buatte nallimbuakka si ya'u wuassu wal᷊en iamangku. Anio orassa indi, su tempo i yamiu sulal᷊ummu asasusa i yamiu rumanta ringangku?”

⁸I mangitou sinumimbakka, “Yami nirumanta ana waugu yami maapulu tadea'u i'o mamiaṛa'u anambon tumana'u Gilead inai mamangalo balahannu Amon orassa indi lai.”

⁹I Yefta sinumimbakka, “Amungkangu i yamiu mangahe si ya'u mabelengnga watukku Gilead inai mamangalo walahannu Amon, wuṛṛu MAWU mangonggolu auntunganna si ite, ete i ya'u apan sarun maola'a tembonanni yamiu.”

¹⁰I mangitou sinumimbakka, “Yami maapulu. MAWU matatialane.”

¹¹Ne i Yefta inaite suadio'a ringannu manga piaṛa'u Gilead. Wua'udde tumana'u Gilead nanenegi tou naola'a tembonanne wuṛṛu piaṛangnge. Su saruannu MAWU su Mizpa, i Yefta nabbisaran darorongnge su tumana'u Gilead.

¹²Wua'udde i Yefta nandolokku taumata inai ringannu ratun Amon iapawal᷊o arendi, “Apate pasasal᷊an kami na'oman sara i yamiu mamangalo wanuan kami?”

¹³Ratun balahannu Amon sinumimbakka manga daroloṛanna udde, “Su tempo ruangannu Israel nirumanta wuassu Mesir, i mangitou nanganu leta'i yami, nanattakka wuassu Sal᷊ukku Arnon naddatingngu Sal᷊ukku Yabok wuṛṛu Sal᷊ukku Yordan. Orassa indi ul᷊la'e leta'a udde ringannu paddarame.”

¹⁴Ana see i Yefta lai nandolokku taumata apia inai ringannu ratun Amon

¹⁵iapasimbakka arendi, “Ruangannu Israel tawe saran paassa nangaṛṛo leta'u taumata Moab ara'e leta'u taumatan Amon.

¹⁶Su tempo taumatan Israel nanantangngu Mesir, i mangitou nabatukku Eṛṛangngu Akaba sinumabbi wadda'u anne ana see na'omate su Kades.

¹⁷Wua'udde i mangitou nandolokku taumata inai ringannu ratun Edom niaparoronga tadea'u wotongnge sumabbi wanuane. Arawe i tou lai tawe namalan mangitou. Wua'udde naddorongnga lai su ratun Moab, arawe i tou lai tawe namalan mangitou sumabbi wanuane. Ana waugu udde ruangannu Israel natana'e su Kades.

¹⁸Wua'udde i mangitou nanassukku amatanne sinumabbi wadda'u anne, arawe tawe sinumabbi Edom wuṛṛu Moab, ewe'e nanganu lal᷊anna namal᷊iwutta na'oman sara na'omate su Moab sambaane ra'i, su samba'an Sal᷊ukku Arnon. I mangitou naddasanna poiaroddi, arawe tawe tinumumbe sal᷊ukka udde, ana waugu leta'a udde ta'e nasutta leta'u taumatan Moab.

¹⁹Wua'udde ruangannu Israel nandolokku sangkatou lai ringanni Sihon, ratun Amori su Hesybon iaparoronga tadea'u wotongnge sumabbi leta'u Amori, ana waugu i mangitou inai su leta'i mangitou sassane.

²⁰Arawe i Sihon tawe namalan mangitou ana waugu i tou tawe mangimanna manungku i mangitou tumba'u sumabbi. Ewe'e i tou lai napasossoku tantaran pangalone ana see nandiagate su Yahas wua'udde namangalote Israel.

²¹Arawe MAWU, Ruatan Israel, nangonggolu auntunganna su walahannu Israel wuassi Sihon wuṛṛu tantaran pangalone. Etearoddi ruangannu Israel naasomba anambon manga leta'u taumatan Amori apan uatana'a su wanua udde.

²²Leta'u Amori apan niwanuanni mangitou nanattakka wuassu Arnon samba'a timukka, naddatingngu samba'an sawannakku Sal᷊ukku Yabok, wuṛṛu wuassu wadda'u anne su samba'an ra'i, maddatingngu Yordan su samba'an waṛṛata.

²³Nariaddi MAWU, Ruatan Israel, udde nallimbuakka manga taumatan Amori tadea'u hunane tumba'u su walahannu MAWU.

²⁴Wuṛṛu orassa indi, udde anuannu apia? Leta'a apan nionggoli Kamos, mongannu udde, si'o wotongngete sidutu tatahuananni yamiu. Arawe apa apan buatte nionggolu MAWU, Ruatan kami si yami, udde sarun tahuananni yami.

²⁵Unnu pahinu i'o mappianne wuassi Balak ana'i Zipor, ratun Moab? I Balak taambe saran paassa nilumawangnga ara'e napapangalon kami.

²⁶Tallu ṛasutta su tonnane al᷊annune Israel uatana'a su Hesybon wuṛṛu Aroër wuṛṛu manga ampunga uapal᷊iwutta isudde, wuṛṛu anambon manga soa su winggin Sal᷊ukka Arnon. Wuṛṛu anio al᷊annunete udde i'o tawe mangul᷊e leta'a udde apia?

²⁷Tawe, yami tawe nassal᷊a si'o. Ete i'o apan nassal᷊a si yami ana waugu i'o namangalo si yami. Ete MAWU mallaṛuunga apan allo indi makkawessu hatto indi suwallatu walahannu Israel wuṛṛu walahannu Amon.”

²⁸Arawe ratun Amon tawe naddaringikka tanata wuassi Yefta udde.

²⁹Wua'udde Ghaṛṛahon MAWU nangintaṛo si Yefta. Ne i Yefta inaite nattembo leta'u Gilead wuṛṛu Manasye wua'udde nabelengnga watukku Mizpa su Gilead. Wua' isudde i tou nanassukku amatanne watukku leta'u walahannu Amon.

³⁰I Yefta na'ola'a pa'aire indi su MAWU, “Amungkangngu MAWU mamala'u mamaddon taumatan Amon,

³¹wuṛṛu i ya'u mabelengnga ringannu sal᷊amatta, ne isai-sai apan paarorone sinumabbanga wuassu wal᷊e'u manal᷊oho si ya'u, sarun ta'u ionggola maola'a sasamba itattambunna su MAWU.”

³²Ana see i Yefta tinumumbete Sal᷊ukku Yordan inai mamangalo taumatan Amon, wuṛṛu MAWU nangonggolu auntunganna si tou.

³³I Yefta namangalo si mangitou na'oman sara nasue wuassu Aroër naddatingngu leta'a maranin Minit — sarangkanambone ruam pul᷊o soa — wuṛṛu araune na'oman sara Abel-Karamim. Manamabo atonna taumatan Amon apan nate, na'oman sara i mangitou narugite su taumatan Israel.

³⁴Su tempo i Yefta nabelengnga watukku Mizpa, ana'i tou maṛuala nirumanta nanal᷊oho si tou ringannu massal᷊aingnga lapiddu mannengkela rebana. Anangnge tumba'u sambau.

³⁵Aroddi i Yefta naasilo, i Yefta mangke nasusa na'oman sara i tou nanggesa'a laungnge, lapiddu nabbisara, “Uare ana'u, naungku natuno! Anio ete i'o napaasusan naungku? I Ya'u buatte nassalu su MAWU, wuṛṛu i ya'u tate maapangul᷊en bisara'u apia!”

³⁶Ana see maṛuala udde nabbisara si Yefta, “i Papa buatte nassalu su MAWU, wuṛṛu MAWU buatte namalan papa nabbal᷊issa al᷊al᷊eo manga taumatan Amon, seetti papa udde. Nariaddi apa apan buatte nipa'iren papa ṛinone iapaamatti papa.”

³⁷“Tumba'u” wisaran maṛuala udde lai, “I ya'u maddorongnga sambau inolaanna: i ya'u onggol᷊eten tempo rua wul᷊anna umamatta su manga wowone suadio'a ringannu manga hawe'u. Poiaroddi ya'u sarun lumuain batangangku ana waugu i ya'u mate ta'e maṛuala.”

³⁸Iamange namalan tou wua'udde i tou nirolokke. Maṛuala udde wuṛṛu manga hawene inaite watukku panenteanna massusa poiaroddi, ana waugu i tou sarun mate tantal᷊anna taambe na'awinga wuṛṛu taambe ana'a.

³⁹Napawe nal᷊iute rua wul᷊anna, i tou nabelengke ringannu iamange, ana iamange napaamattu sarangkanambone apan buatte nipa'irene su MAWU. Ne maṛuala udde natete su tempo ta'e perawanna. Eteudde al᷊amonane anio su tangngan taumatan Israel, inanaramanne

⁴⁰manga ana'a maṛuala mannatangngu wal᷊en al᷊annune appatu pul᷊o su allone suapan tonna tadea'u mannaungnga ana'i Yefta su Gilead.