Read Talaud MAL᷊AṚṚUUNGNGA 13 Bible Online

MAL᷊AṚṚUUNGNGA 13 - Talaud bible

MAL᷊AṚṚUUNGNGA 13

¹Taumatan Israel na'ola'e rosa apia su MAWU, ana see MAWU namalaten taumatan Filistin uaparenta si mangitou appatu pul᷊o su tonnane al᷊annune.

²Su tempo udde pia sangkatou esakka su soan Zora. Aranne i Manoah, wuassu ruanganni Dan. Awingnge tinna.

³Arawe su allo sambau mala'ekattu MAWU naipasilon batanganne si tou wuṛṛu nabbisara, “Al᷊annunete indi i'o tawe naasomba ana'a, arawe tate mal᷊annu lai i'o sarun piate illoṛo, wuṛṛu maasomba sangkatou ana'a esakka.

⁴Ana waugu udde paariagaite watangannu mapia-pia. Imbaṛangnga ma'inumma anggore ara'e ua'e ma'awu'anna, ara'e umanna sambau anna apan ipappalli.

⁵Napawe anangngu udde niasungkangke, imabaṛangnga utangnge pol᷊oanna, ana waugu ro'en sulal᷊ummu illoṛo i tou buatte nitantunna maola'a taumatan pa'aire. Ete i tou apan mangesakku ipamallossu walahannu Israel wuassu parentan taumatan Filistin.”

⁶Wua'udde awingngi Manoah inaite ringannu awingnge wuṛṛu nabbisara, “Papa, pia daroloṛannu Ruata nirumanta ringangku; al᷊imangke naal᷊ihidda mala'ekattu MAWU Ruata, na'oman sara i ya'u nata'utta. I ya'u tawe naiwal᷊o wuassuapa i tou nirumanta, wuṛṛu i tou lai tawe namasingkattu aranne si ya'u.

⁷Araware i tou nabbisara manungku i ya'u sarun pia illoṛo wuṛṛu maasomba sangkatou ana'a esakka. I tou lai nabbisara manungku imbaṛangnga i ya'u ma'inumma anggore ara'e ua'e ma'awu'anna, ara'e umanna anna ipappalli, ana waugu ana'a udde ṛinone itantilla su Ruata maola'a sangkatou ana'u pa'aire su al᷊o'engngu pabbiaṛanne.”

⁸Naaringikka udde, i Manoah niumal᷊iomante su MAWU, arendi, “MAWU, antimanna I'o mandolokku allangngu udde apia ringanni yami iapapasingkatta apa apan ṛinone olaanni yami su ana'a udde napawe i tou niasungkangke.”

⁹Ruata naddaringikka darorongngi Manoah. Mala'ekattu MAWU udde nirumanta apia, su tempo awingngi Manoah tantal᷊anna ua'ianna su wailla. Su tempo udde awingnge esakka tawe isudde.

¹⁰Nariaddi, i tou inaite tinumal᷊angnga namasingkattu olangnge udde su awingnge, “Pahul᷊u'u, pa'ellege, taumata apan dorone nirumanta ringangku, nirumantate apia!”

¹¹I Manoah mal᷊iha-l᷊ihakka tinumantalonga awingnge. I tou nangundanin taumata udde wuṛṛu naiwal᷊o, “Ete i Tuanga apan uaapiddu watti'a su awingku?” “Atonna,” sasimbakke.

¹²Ana see i Manoah naiwal᷊o, “Amungkangu apa apan niwal᷊on Tuanga udde nariaddite, apate ṛinone olaannu ana'a udde? Wuṛṛu ereapa pabbiaṛanne su allo sal᷊immurine?”

¹³Mala'ekattu MAWU udde sinumimbakka, “Awingngu imbaṛangnga ma'inumma anggore ara'e ua'e ma'awu'anna, wuṛṛu lai imbaṛangnga umanna saranapa apan niola'a wuassu punnu alu anggore, ara'e wiakka apan ipappalli. I tou ṛinone sarun tumuṛutta al᷊awo'u tanata'u si tou, wuṛṛu mallu'adda tadea'u taweddu saran sambau apan tawe tinuṛutanne.”

¹⁵Ana see unni Manoah si Tou, “Wotongngewe i Tuanga, maaṛangatta tal᷊angkadio'a. Yami mallaha asuene ana'u ambinga iapaanna si Tuanga.”

¹⁶Arawe mala'ekattu MAWU udde nabbisara, “Salaiwe i ya'u uaṛaddo isindi mal᷊annu, i ya'u tawe umanna panarunu. Arawe amungkangu i'o mangke maapulu manaru, ola'e udde maola'a sambau sasamba itattambunna wuṛṛu onggol᷊a'e su MAWU.” I Manoah taambe naatutukka manungku uahahatton tou udde mala'ekattu MAWU. Nariaddi i tou nabbisara, “Amungkangu aroddi, antimanna i Tuanga mamasingkattu aranni Tuanga, tadea'u amungkangu manga wisaran Tuanga udde mariaddite, yami wotongnge mangonggolu aadatti yami si Tuanga.”

¹⁸Mala'ekattu MAWU udde naiwal᷊o, “Anio i'o mangke ma'apulu ma'asingkatta arangku? Arangku udde aranna apan ma'atiangnga.”

¹⁹Ne i Manoah nanganute sambau ambinga anangnge ringannu gandumma addio'a, ana see niaddo su wowon batu wuṛṛu nionggola su MAWU, eteudde MAWU apan ma'ola'a manga inolaanna apan ma'aṛindu'a.

²⁰Tantal᷊anna putungnga lukkenggamma sussal᷊oi wuassu mezbah udde, i Manoah wuṛṛu awingnge naasilo mala'ekattu MAWU udde niumawitta sulal᷊ummu ṛenggammu putungnga udde, mattuddan langitta. Wakkute udde i Manoah naatutukka manungku udde mala'ekattu MAWU; ne i tou wuṛṛu awingnge niumal᷊intudate nassubba. Tate saran paassa i mangitou naasilo mala'ekatta udde apia.

²²Ana see i Manoah nabbisara awingnge, “Iaddua sarun mate ana waugu iaddua buatte naasilo Ruata!”

²³Awingnge sinumimbakka, “Amungkangu MAWU maapulu mamate si ite, i Tou maddiri manengkamma sasamba apan nionggoli ite i Tou udde; i Tou lai tawe mapal᷊iatta'u sarangkanambone indi si ite ara'e mamasingkattu manga inolaanna udde si ite.”

²⁴Manga pira wul᷊anna wua'udde awingngi Manoah nanungkangngu sangkatou ana'a esakka wuṛṛu aranne nisaggo i Simson. Ana'a udde naola'a wahewalla wuṛṛu nial᷊amatannu MAWU;

²⁵wuṛṛu napawe i tou uatana'e su paddasanannu ruanganni Dan, apan addone suwallatu Zora wuṛṛu Esytaol, Ghaṛṛahon MAWU mannattake mangngonggolu atatohassa si tou.