Read Talaud MAL᷊AṚṚUUNGNGA 14 Bible Online

MAL᷊AṚṚUUNGNGA 14 - Talaud bible

MAL᷊AṚṚUUNGNGA 14

¹Su allo sambau i Simson inaite watukku Timna, wuṛṛu naasilo sangkatou maṛualan Filistin poiaroddi.

²Ana see i tou napul᷊ete wuṛṛu nabbisara su hagurangnge, “I ya'u niumanggangu sangkatou maṛualan Filistin su Timna. I tou maddorongnga iamanga wuṛṛu inangnga inai mangono'u si tou.”

³Arawe hagurangnge nabbisara, “Anio i ite ṛinone inai ringannu taumatan Filistin tadea'u maasomba sawa, wuṛṛu i mangitou tawe nasutta al᷊aṛana'u MAWU? Apa sulal᷊ummu ṛuanganni ite sassane ara'e suwallatu pabbawalagi ite tawe maṛuala naṛino su naungngu?” I Simson sinumimbakka iamangnge, “Arawe tumba'u maṛualan Filistin udde ipaapulu'u. Ne i ya'u mangantimma iamanga mangono'u si tou.”

⁴Hagurangngi Simson wagga manungku eteudde MAWU apan nagal᷊oren Simson ma'ola'a inolanna udde. Ana waugu MAWU, maddea'a lal᷊anne mamangalo taumatan Filistin. Su tempo udde taumatan Filistin uaparenta taumatan Israel.

⁵Ne i Simson inaite watukku Timna suadio'a ringannu hagurangnge. Tantal᷊anna i mangitou sinumabbi santampa waillu anggore, i Simson naasangkalla sambau singa saṛentumuwo. Singa udde mammassinga,

⁶wuṛṛu inaṛombanganne i Simson nabbal᷊i natohassu taṛinon MAWU. Ana see i tou namaṛṛu singa udde ringannu limane, ereola'u winatangnga udde naal᷊ihidda ambinga. Olangnge udde tawe niwatti'a su hagurangnge.

⁷Wua'udde i Simson nattembo maṛuala udde lapiddu naggahatton tou, ne i Simson mangke maapulun maṛuala udde atonna.

⁸Napawe manga pirate tempo al᷊annune, i Simson inaite apia ma'awingngu maṛuala udde. Sulal᷊ummu amatanne, i tou nabbeṛo ana waugu ma'ellega singa apan nate nipatene udde. Napawe i tou na'omate isudde niasiloanna manambo atonna attimpua sulal᷊ummu singa nate udde, wuṛṛu pia lai pul᷊ane.

⁹I tou nangoenga pula udde ringannu limane, ana see nasal᷊a naiumanna wuṛṛu lapiddu na'inumma pul᷊a udde lai. Wua'udde i tou inaite ringannu hagurangnge ana see nangonggolu sambageanganna wuassu pula udde si mangitou, ne i mangitou niumante. Arawe i Simson tawe namasingkatta manungku pula udde nial᷊appa wuassu singa apan natete udde.

¹⁰Napawe iamangngi Simson inaite watukku wal᷊en maṛuala udde, i Simson na'ola'a andeangnga poiaroddi, ana etearoddi inanaramannu manga taumata umbasanna.

¹¹Sutempo taumatan Filistin naasilo si tou, i mangitou namile sire tallu pul᷊o umbasanna iapaammunga si tou.

¹²Ana see i Simson nabbisara si mangitou, “I ya'u pia ao'o. Amungkangu i yamiu maasi'atta, i yamiu sangkatou-sangkatou ta'u onggol᷊annu samparassa mal᷊aṛenessa linen apan al᷊ussa wuṛṛu samparassa laubba apan mapia. I yamiu ta'u onggol᷊annu tempo pitu allo al᷊annu andeangngu awingnga indi, ipani'attu ao'o udde.

¹³Arawe amungkangu i yamiu tawe naasi'atta, i yamiu sangkatou-sangkatou sarun mangonggola si ya'u mal᷊aṛenessa linen al᷊ussa wuṛṛu samparassa laubba apan mapia.” Ana see manga taumatan Filistin udde nabbisara, “Wotongnge! Orassa indi wal᷊oa'e ao'o udde.”

¹⁴Ne i Simson nabbisara, “Wuassu iapa niumanna, sinumabbanga apa apan nianna; wuṛṛu wuassiapa matohassa, sinumabbanga apa matemangnga.” Napawe nal᷊iute tallu allo i mangitou lai taambe naasomba sasi'attu ao'o udde.

¹⁵Nariaddi su allo aiappanne i mangitou nabbisarate su awingngi Simson, “I'o ṛinone massal᷊o'u awingngu tadea'u i tou mamasingkatta si yami sasi'attu ao'o udde. Amungkangu tawe, yami sarun manuntungnga si'o wuṛṛu amonannu iamangngu. Al᷊imangke i'o namaggo si yami tadea'u manginsue darotongngi yami!”

¹⁶Ana waugu udde, awingngi Simson inaite ringanni Simson lapiddu lulluai, ana see nabbisara, “I ya'u masingkatta i'o tawe mandangngu si ya'u. Anio i'o nangonggolu ao'o su manga hawe'u, arawe i'o tawe namasingkattu sasi'attu ao'o udde si ya'u? Asinungka i'o maddantingku!” Unnu Simson, “Paaṛangatta asuene! Su hagurangku sassane lai, ya'u tawe namasingkatta, anio i'o ṛinone pasingkatanna?”

¹⁷Su al᷊annune pitu allo andeangnga udde, awingngi Simson sidutu lulluai. Wuṛṛu ana waugu i tou sidutu mattanonge, ne su allo appitune, i Simson namasingkattu sasi'attu ao'o udde si tou. Ana see awingngi Simson udde namasingkatta su manga taumatan Filistin.

¹⁸Nariaddi su allo appitune tantal᷊anna matannallo taambe umattupa, manga taumata udde nabbisara si Simson, “Apa mattemanganne wuassu pula? Wuṛṛu apate lai apan mattohasanna wuassu singa?” I Simson sinumimbakka, “Amungkangngu i yamiu tawe napaattu awingku, i yamiu tawe masi'attu ao'o udde!”

¹⁹Inaṛombanganne i Simson nabbal᷊i natohassu taṛinon MAWU, ana see i tou inaite watukku Askelon. Poiaroddi i tou namate tallun pul᷊o esakka apan ual᷊uṛen laubba mangkapia. I tou nanganu laubbi mangitou udde wuṛṛu nionggola su siri tallun pul᷊o apan buatte nani'attu ao'one udde. Wua'udde i tou napul᷊ete su wal᷊ene ringannu naungnga mappau.

²⁰Ana see la'iananne nanantillu awingngi Simson udde su taumata apan naola'a mallal᷊aṛenggenni Simson su tempo i tou naawingnga.