Read Talaud MAL᷊AṚṚUUNGNGA 15 Bible Online

MAL᷊AṚṚUUNGNGA 15 - Talaud bible

MAL᷊AṚṚUUNGNGA 15

¹Manga pira tempo wua'udde, su tempon pangangitinga gandumma, i Simson inaite mattembo awingnge. I tou nangapiddu sambau ambinga ionggola su awingnge. I Simson nabbisarate la'iananne, “I ya'u maapulu sumutta su wabbo'a maisasomban awingku.” Arawe la'iananne tawe namala.

²Wisarane si Simson, “Aringkane i'o atonna-tonna maddirin tou, nariaddi, i tou buatte ta'u nionggola su hawenu. Arawe i'o wotongnge manganu tuarine. I tou makkamahanna.”

³Nabbisarate i Simson, “Apa apan sarun ta'u olaanna su saruannu taumatan Filistin paassa indi, wal᷊inewe pasasal᷊a'u!”

⁴Ana see i tou inaite nanametta tallu ṛasutta serigala. Tol᷊en manga serigala udde niamputta paddarua. Supentakku sasamputa udde, nieleannu sol᷊o.

⁵Ana see manga sol᷊o udde nire'omanne, wuṛṛu manga serigala udde nipallossa watukku waillu manga taumatan Filistin. Ne nasoṛobbe ahewallu waillu gandumma apan a'itinganna poiaroddi. Ewe'e sinuananna gandumma wuṛṛu manga waillu anggore nasoṛobba lai.

⁶Manga taumatan Filistin inaite namarikissa tanne isai na'ola'a olangnge udde. Ana see taumata namasingkatta si mangitou manungku ete i Simson apan pia inolaanne udde, ana waugu la'iananne su Timna buatte nangonggolu awingngi Simson su sangkatou hawen Simson. Ana waugu udde manga taumatan Filistin nanoṛobba wawine udde wuṛṛu amonannu iamangnge na'oman sara nasue.

⁷Ana see i Simson nabbisara su manga taumatan Filistin udde, “Oh, aroddi olangnge i yamiu makkuumanna? I ya'u massalu, tawe mallannaba amungkangu i ya'u taambe naawal᷊issa olangnge indi si yamiu!”

⁸Wua'udde i tou namangalo si mangitou ringannu maṛagissa wuṛṛu suwallati mangitou manambo apan nipate. Wua'udde, i tou inaite natana'a sulal᷊ummu loṛangnga susambau wuidda watu su Etam.

⁹Ne taumatan Filistin nirumanta watukku wageangngu leta'u Yehuda ana see naddasante isudde, wua'udde namangalote soan Lehi.

¹⁰Taumatan Yehuda naiwal᷊o taumatan Filistin, “Anio i yamiu namangalo si yami?” I mangitou sinumimbakka, “Yami nirumanta manametta si Simson, tadea'u yami wotongnge mamarikka si tou ere lai i tou namarikka si yami.”

¹¹Naaringikka udde 3.000 su atoune taumatan Yehuda inaite watukku loṛangngu wuidda watu su Etam. Poiaroddi i mangitou nabbisara, “Simson, apa i'o wagga manungku taumatan Filistin uaparenta si ite? Apate indi niolangngu su saruanni yami!” I Simson sinumimbakka, “I ya'u tumba'u mabbal᷊issa inolaanni mangitou si ya'u.”

¹²Unni mangitou, “Yami nirumanta isindi tumba'u makkapussa wuṛṛu manantillu su taumatan Filistin.” I Simson nabbisara, “Pa'irete asuene manungku i yamiu sassane tawe mamate si ya'u.”

¹³“Ore,” unni mangitou, “atonna yami tumba'u makkapussa wuṛṛu manantillu su taumatan Filistin. Yami tawe mamate si'o.” Ana see i mangitou nakkapusse si Simson ringannu ruan bua tal᷊i apan ta'e wakku, wuṛṛu nangapiddi tou inai wuassu loṛangnga udde.

¹⁴Napawe i Simson niapidde su Lehi, manga taumatan Filistin tuttatal᷊angnga mattuddan tou lapiddu uiui. Inaṛombanganne i tou nabbal᷊i matohassu taṛinon MAWU. Manga tal᷊i apan uaṛapussa limane udde niwassunne ringannu tawe sahadden naal᷊ihidda namassuta tal᷊i natutungnga.

¹⁵Wua'udde i tou naasangkalla sambau duṛṛin ol᷊an keledai apan ta'e wakku. I tou namurutta duṛṛi udde, ana see nipaatta pinamuulla 1.000 su atoune na'oman sara nate.

¹⁶Ne i Simson nangantarite, “Ringannu ol᷊an keledai, ta'u nipate saṛiwu su atoune; ringannu ol᷊an keledai, ta'u niombo winal᷊unanni mangitou.”

¹⁷Wua'udde, nirammeten tou duṛṛin ol᷊a udde. Ana waugu udde tampa udde nisaggo Ramat-Lehi.

¹⁸Wua'udde i Simson mangke naapendamma marou, na'oman sara i tou sinumalande MAWU. I tou nabbisara, “MAWU, wakkute tanginna I'o nangonggolu auntunganna si ya'u. Orassa indi ya'u ṛinone mate ana waugu marou, na'oman sara sametannu manga taumatan Filistin indi apan tawe maailal᷊a Si'o?”

¹⁹Ne Ruata namu'a loṛangngu wuiddu watu su Lehi udde, ana see sinumabbangke ua'e wua' isudde. I Simson na'inumpe, ana see naapendampe matohassa apia. Ana waugu udde al᷊imatan ua'e udde nisaggo Al᷊imatan Ua'en Hakor. Al᷊imatan ua'e indi ta'e pia sara orassa indi su Lehi.

²⁰Ruan pul᷊o su tonnane al᷊annune i Simson uapiaṛa'u walahannu Israel su tempo i mangitou paparentannu taumatan Filistin.