Read Talaud MAL᷊AṚṚUUNGNGA 17 Bible Online

MAL᷊AṚṚUUNGNGA 17 - Talaud bible

MAL᷊AṚṚUUNGNGA 17

¹Pia sangkatou esakka aranne i Mikha. I tou uatana'a su panenteannu wageangngu leta'i Efraim.

²Su allo sambau i tou nabbisarate su inangngene, “Su inangnga niawul᷊iannu saṛiwu maṛasutta roitta sal᷊a'a, i ya'u naaringikka inangnga mantal᷊an manana'one. Indete Inangnga, roinne! Ete i ya'u nanna'o.” Inangngene sinumimbakka, “Antimanna i'o al᷊amatannu MAWU, ana'u!”

³I Mikha napawelengngu roitta udde su inangnge, ana see inangnge mabbisara, “Atadea'u i'o, ana'u, mal᷊iu wuassu tatal᷊a apan buatte niwisara'u udde, i ya'u mangonggolu sal᷊a'a udde indi su MAWU, ipaatta ipa'ola'a paal᷊uanna alu apan pi'unannu sal᷊a'a. Nariaddi roitta udde iapaapidda apia si'o.”

⁴Ne napawe i Mikha napawelengngu roitta udde su inangnge, i tou nanganu rua ṛasutta su waune wuassu roitta udde, ana see nionggola su sangkatou ma'aola'a sal᷊a'a. Ana see i tou nandolokku ma'aola'a udde niapal᷊anginnu alu wuṛṛu nipi'unnu sal᷊a'a udde. Wua'udde paal᷊uanna niaddo su wal᷊en Mikha.

⁵I Mikha sassane piate sambau tampa pasasubbanna. I tou nallanginnu manga pira paal᷊uanna sassubbanna wuṛṛu samparassa efod ana see nanenegu sangkatou anangnge esakka maola'a imam.

⁶Sutempo udde walahannu Israel taambe datu; suapan taumata apan ma'ola'a al᷊awo'u manarane tumuṛuttu ṛingiranne udde naṛino.

⁷Su tempo udde lai pia sangkatou umbasanna wuassu ṛuanganni Lewi. Dorone i tou uatana'a su Betlehem su leta'u Yehuda.

⁸Arawe su tempo indi i tou nanantangken soa udde wuṛṛu tantal᷊anna u'amatta maddea'a tampa atatanaanna waine. Sulal᷊ummu amatanne udde i tou na'omate su wal᷊en Mikha su panenteannu wageangngu leta'i Efraim.

⁹I Mikha naiwal᷊o si tou, “Tuṛangnga taumata wuassuapa?” Taumata udde sinumimbakka, “I ya'u taumatan Lewi wuassu Betlehem su Yehuda. I ya'u tantal᷊anna maddea'a tampa atatanaanna.”

¹⁰I Mikha nabbisara, “Atana'e isindi ringangku, tadea'u i'o wotongnge maola'a mananantirou wuṛṛu imamma si yami. Ya'u mallantakka si'o mapul᷊o roitta sal᷊a'a suapan tonna, wuṛṛu lai laubba ana see anna.”

¹¹Umbasannu Lewi udde nappulu, ana see i tou nitenegi Mikha naola'a imam. I tou utana'a su wal᷊en Mikha wuṛṛu nareengnga ere lai ana'i Mikha sassane.

¹³Ne unni Mikha, “Ne orassa indi ya'u mangimanna MAWU sarun ma'ola'a mapia si ya'u ana waugu piate sangkatou taumatan Lewi apan naola'a imam si ya'u.”