Read Talaud MAL᷊AṚṚUUNGNGA 19 Bible Online

MAL᷊AṚṚUUNGNGA 19 - Talaud bible

MAL᷊AṚṚUUNGNGA 19

¹Sutempo Israel taambe ratu, pia sangkatou Lewi uatana'a su ul᷊une, su panenteannu Efraim. I tou uaapiddu sangkatou wawine wuassu Betlehem Yehuda niola'a awingnge su liudde.

²Arawe ana see wawine udde nandona si tou, na'oman sara i tou nabelengnga watukku wal᷊en iamange su Betlehem. Napawe wawine udde natana'e poiaroddi appatu wul᷊anna al᷊annune,

³taumatan Lewi udde inaite nattuṛutta si tou wuṛṛu nassal᷊o'a tadea'u mabelengnga apia ringanni tou. I tou inaite ringannu nangapiddu sangkatou allangnga wuṛṛu darua keledai. Napawe na'omate poiaroddi, wawine udde nangapiddi tou ringannu iamange. Sutempo iamangu wawine udde naasilo si tou, i tou nanal᷊oho ringannu lulluassa,

⁴wuṛṛu mammata'a tadea'u i tou tate mapul᷊e. Ana waugu i tou natana'a tallu allo al᷊annune wuṛṛu u'ante isudde see lai nanaṛabbite isudde ringannu awinge su liudde udde.

⁵Su allo aiappanne, itarua napu'o marua allo atonna ana see nandiahite inai mapul᷊e. Arawe iamangi wawine udde nabbisara su taumatan Lewi udde, “Ante asuene tadea'u matohassa. Wua'udde iraddua wotongngete inai mapul᷊e.”

⁶Ne taumatan Lewi udde niuma'iante ana see inumante wuṛṛu na'inumpe suadio'a ringannu iamangu wawine udde. Arawe napawe i tou rumarisikke ana waugu inaite, iamangu wawine udde nassal᷊o'a tadea'u lasa'e paapul᷊e. “Paatammude isindi asuene,” wisarane, “wuṛṛu panaṛabbite isindi.” Ne taumatan Lewi udde natana'e isudde saṛabbi lai.

⁸Su allo al᷊imane, marua allo atonna, napawe i tou inaite, iamangu wawine udde nabbisara apia, “Wette ante asuene, tal᷊angkadio'a wua'udde roote.” Ne itarua niumante suadio'a wuṛṛu ilalliwue na'oman sara matannallo umattupe.

⁹Wua'udde, napawe taumatan Lewi udde wuṛṛu sawane su liudde see lai allangnge inaite, iamange udde nabbisara, “Allo wawallote, tate mal᷊annu lai marandumpe. Mappianne panaṛabbite isindi wuṛṛu paatammude. Tiṛabbi yamiu wotongnge napu'o maṛanggapa inai mapul᷊e.”

¹⁰Arawe taumatan Lewi udde maddirite manaṛabbi lai isudde. I tou wuṛṛu awingnge su liudde mangke inaite, suadio'a ringannu allangnge wuṛṛu keledaine darua apan pia aiananne. Napawe allo maraniten maṛabbi, i mangitou na'omate maranin Yebus (eteudde Yerusalem) Ana see allangnga udde nabbisara tuange, “Tuanga, wette i ite umotongnga wuṛṛu manaṛabbi su soan taumatan Yebus indi.”

¹²Arawe mawune sinumimbakka, “Tawe! I ite tawe mangillol᷊o sutampa apan tumanangnge wal᷊ine taumatan Israel. Wette i ite manassukku amatanna addio'a lai wuṛṛu manaṛabbite su Gibea ara'e Rama.”

¹⁴Ana waugu udde i mangitou nasal᷊ate niumamatta wuṛṛu tawe niumotonga su Yebus. Matannallo nattupe sutempo i mangitou na'omate su Gibea su leta'a wageangngu ruanganni Benyamin.

¹⁵I mangitou niumotongnga isudde ana manaṛabbi, ana see sinumuttate su soa wuṛṛu niuma'iante su rallakka mal᷊alanga. Arawe taambe saran sangkatou apan nangahe si mangitou manaṛabbi su wal᷊ene.

¹⁶Tantal᷊anna i mangitou ua'ianna su rallakka mal᷊alanga su soa udde, nirumantate sangkatou timmade apan wakkute nawelengnga nammara su wailla. I tou darantane wuassu panenteannu Efraim arawe orassa indi uatana'e su Gibea. (Tumanangnge waine su Gibea eteudde taumatan Benyamin.)

¹⁷Napawe timmade naasilo taumatan Lewi udde su rallakka mal᷊alanga, i tou naiwal᷊o, “Tuṛangnga wuassuapa, wuṛṛu inai watukkuapa?”

¹⁸Taumatan Lewi udde sinumimbakka, “Yami wakkute nirumanta wuassu Betlehem su Yehuda, wuṛṛu tantal᷊anna su amatanna mapul᷊e watukku wal᷊en su ul᷊une panenteannu Efraim. I ya'u darantane wua poiaroddi. Tawe saran sangkatou wuassu tumana'u soa indi mapasaṛabbin kami su wal᷊ene.

¹⁹Yami tawe mappandumma manga apa waine, wal᷊unni yami manambo. Pia laṛami wuṛṛu annu keledain kami, pia roti wuṛṛu anggore maola'a wiakki yami wuṛṛu allangku.”

²⁰Ana see timmadde udde nabbisara, “Arie passinggawanga, i ya'u mantul᷊ungnga. Ariete panaṛabbi su rallaka mal᷊alanga indi.”

²¹Wua'udde i mangitou niapidden tou watukku wal᷊ene ana see napaannu manga keledain mangitou. Wuṛṛu napawe manga rahone udde buatte nangukkassa ledda, i mangitou niumante.

²²Tantal᷊anna i mangitou mallal᷊umanna'a, inaṛombanganna wal᷊en udde papal᷊iwutanten manga taumata lal᷊eo wuassu soa udde. I mangitou namu'a ngara wuṛṛu nabbisara timmade udde, “Tantil᷊a'e si yami esakka apan niapiddu su wal᷊enu. Yami mappulu mappaatti tou!”

²³Timmade udde sinumabbanga wuṛṛu nabbisara si mangitou, “Arie, manga tuṛangnga! I ya'u sumal᷊ande, arie pa'ola'a inolaanna apan lal᷊eo wuṛṛu ipaadiri ereudde, ana waugu i tou raho'u.

²⁴Mappianne i ya'u mangonggolu awingnge su liudde wuṛṛu ana'u maṛuala si yamiu. Wotongngete i yamiu malluassa naungngi yamiu ringanni mangitou. Arawe imbaṛangnga pia inolaanna apan lal᷊eo su raho'u indi!”

²⁵Arawe ana waugu manga taumata lal᷊eo udde mangke mammata'a, ne taumatan Lewi nanuṛuddu awinge su liudde nionggola si mangitou. Ana see i mangitou nassawate wawine udde ringannu tawe illol᷊one na'oman sara marua allo.

²⁶Napawe maraniten nallo wawine udde nabelengnga, arawe su saruannu ngaran wal᷊en timmade udde, sutampa awingnge nanaṛabbi, i tou nawantinga. Naddatingngu matannallo sinumabbanga i tou ta'e isudde.

²⁷Marua' allo udde, sutempo awingnge napu'o wuṛṛu namu'a ngara ana waugu inaite umamatta, i tou naasilo awingnge nawantinga su saruannu wal᷊en udde ringannu limane uaagassa ngara.

²⁸“Darisikke,” wisarane si tou, “wette i ite inaite.” Arawe wawine udde tawe sinumimbakka ana waugu natete. Ana see i tou nanal᷊uru wawine udde wuṛṛu niluranna su keledai, wua'udde inaite napul᷊e watukku wal᷊ene.

²⁹Napawe na'omate su wal᷊en, i tou sinumutta wuṛṛu nanganu lari'a wua'udde namonggo'a winal᷊unannu awingnge udde naola'a mapul᷊o dua su abbuwune. Wua'udde, i tou napaapidda iapaanggola manga abbuwune udde su mapul᷊o dua pabbawalagu Israel sambau-sambau sangkabuwu.

³⁰Anambon taumata apan naasilo udde nabbisara, “Taambe saran paassa olangnge indi nariaddi, ro'en walahannu Israel nasabbanga wuassu Mesir na'oman sara allo indi. I ite tawe wotongnge mal᷊annaba. I ite ṛinone mabbaidda su ipammanara olangnge indi!”