Read Talaud MAL᷊AṚṚUUNGNGA 3 Bible Online

MAL᷊AṚṚUUNGNGA 3 - Talaud bible

MAL᷊AṚṚUUNGNGA 3

¹Su ipa'annamma manga taumatan Israel apan tawe naatemma pangalo su Kanaan, MAWU namalan manga pira walahanna natana'a su wanua udde.

²MAWU na'ola'a udde tumba'u ringannu pandumma ipanantiro al᷊awo'u taumatan Israel mapapangalo, nipangillembote lai si mangitou apan tawe naatemma napapangalo.

³Manga walahanna apan ta'e uatana'a su wanua udde eteudde: walahanna apan uatana'a su lima soa Filistin, anambon walahannu Kanaan, walahannu Sidon, wuṛṛu Hewi apan uatana'a su panenteannu Libanon, manattakka wuassu Wowon Baal-Hermon maddatingngu lal᷊anna apan mattuddan Hamat.

⁴I mangitou uatana'a poiaroddi naola'a sasal᷊u'attu walahannu Israel. Ringannu aroddi wotongnge asingkatanna atanne walahannu Israel tuttuṛutta manga parenta apan buatte nionggolu MAWU su iupungngu al᷊amonan mangitou wuassi Musa.

⁵Ana waugu udde manga taumatan Kanaan, Het, Amori, Feris, Hewi wuṛṛu Yebus sidutu uatana'a su wanua udde suadio'a ringannu walahannu Israel.

⁶Walahannu Israel naawingken manga walahanna udde, wuṛṛu massubbate lai manga monganni mangitou.

⁷Walahannu Israel narosate su MAWU, Ruata mangitou. I mangitou naabul᷊iten MAWU na'oman sara i mangitou nassubbate manga paal᷊uanni Baal wuṛṛu Asyera.

⁸Ne MAWU nasa'u su taumatan Israel, wuṛṛu namalan mangitou niwaddon Ratu Kusyan-Risyataim wuassu Mesopotamia. Ual᷊u tonna al᷊annune ratu udde uaparenta si mangitou.

⁹Wua'udde walahannu Israel sinumal᷊ande maiontolla su MAWU, ana see MAWU nangonggoli Otniel mapasabbangngi mangitou. (I Otniel eteudde ana'i Kenas, tuarin Kaleb.)

¹⁰Ghaṛaho MAWU uataṛino si Otniel na'oman sara i tou naola'a piaṛa'u walahannu Israel. I tou inaite napapangalo, ana see MAWU napaauntungngi tou su ratun Mesopotamia udde.

¹¹Ne wanua udde matammude appatu pul᷊o su tonnane al᷊annune. Wua'udde i Otniel natete.

¹²Walahannu Israel na'ola'e rosa apia su lantakku hatin MAWU, na'oman sara MAWU na'ola'a si Eglon, ratun Moab, nabbal᷊i mattohasanna wuassu Israel.

¹³Ratu Eglon naammulu walahannu Amon wuṛṛu Amalek, ana see namaddon taumatan Israel, wua'udde nangaṛṛo Yerikho, soan kurma udde.

¹⁴Mapul᷊o ual᷊u su tonnane walahannu Israel paparentanni Eglon.

¹⁵Arawe sutempo walahannu Israel sinumal᷊ande maiontolla su MAWU, I Tou nangonggoli Ehud tadea'u mapasabbangngi mangitou. I Ehud sangkatou taumata apan matohassa limane aiṛṛi; i tou ana'i Gera wuassu ruanganni Benyamin, wuṛṛu ete i tou lai apan masokka manguntudda si Ratu Eglon wose apan ṛinone waeṛannu walahannu Israel.

¹⁶Su allo sambau i Ehud nanassalla hal᷊ele sammata ṛorone ruamba'a, al᷊o'engnge appatu rango. I tou nametan hal᷊ele udde su lawanne samba'a aikatanna sulal᷊ummu laungnge,

¹⁷ana see inaite nanantillu wose walahannu Israel si Ratu Eglon. Ratu udde tumaniten matawa.

¹⁸Napawe buatte nanantillu wose udde, Ehud nandolokku manga taumata apan uapasanna roitta wul᷊awanna udde niapawelengnga.

¹⁹Arawe i Ehud sassane napawe nattaalla sutempo na'omate su manga watu ni'uitta maranin Gilgal, i tou nabelengnga pia ringanni Eglon. Sutempo udde i Eglon sulal᷊ummu wabbo'a apan masunge su ṛengkenne aruane su wal᷊en araratuanne. Unni Ehud si Eglon, “Tuangku Apan Mawantuga! Allangu uaapiddu watti'a apan ia'adappinga si Tuangku.” Ne ratu nabbisara, “Paṛṛaddo asuene,” ana see i tou nandolokku manga allangnge niasabbanga wuṛṛu nanatangngi tou wuṛṛu i Ehud sassane. Wua'udde, i Ehud nangundanin ratu apan tantal᷊anna ua'ianna ana see nabbisara, “Pia batti'a wuassu Ruata si Tuangku!” Naaringikka udde, ratu dirumarisikka.

²¹I Ehud lapiddu nanawutta hal᷊ele ringannu limane aiṛṛi wuassu lawassa aikkatanne, ana see niusu'a malal᷊umma su tiannu ratu. Al᷊o'engngu hal᷊ele udde na'oman sara pul᷊une nawul᷊ussa sara su manga tawan tiannu ratu udde, na'oman sara nallapassa su liudde. I Ehud nanantangngu hal᷊ele udde isudde,

²³ana see sinumabbangnga lapiddu nakkuudda wuṛṛu namal᷊e ngaran wabbo'a udde,

²⁴ana see napul᷊ete. Su tempo manga allangngu ratu nirumanta wuṛṛu naaratingnga manga ngaran wabbo'a udde uapal᷊e, i mangitou massunna manungku ratu ta'e sulal᷊umme wuṛṛu namassal᷊iu.

²⁵Napawe tumaniten mal᷊annu ual᷊aṛaddo ne ratu tawe lai mamu'a ngara, i mangitou tinumiangngate ana see nanganute aunsi wuṛṛu namu'a ngara udde. Niasingkatannawe manungku ratun mangitou uatattere natete su rapappakku wal᷊en.

²⁶Tantal᷊anna i mangitou ta'e ual᷊aṛaddo, i Ehud tinumal᷊angke watukku Seira sinumabbi manga watu ni'uitta.

²⁷Napawe na'omate su panenteannu Efraim, i tou nattiuppa trompeta nipamago taumatan Israel inai mapapangalo. I mangitou nirumantate ana see i tou namiaṛa'i mangitou sinumossokka wuassu panenteanna udde.

²⁸“Tantalongke si ya'u,” wisarane si mangitou, “MAWU buatte namaddon manga taumatan Moab, seretti yamiu udde.” Ne su al᷊ungngu piaṛa'i Ehud, manga taumatan Israel sinumossokke wuassu panenteanna. I mangitou namal᷊iaṛo tampa lallewesannu taumatan Moab su Sal᷊ukku Yordan. Tawe saran sangkatou wuassu seetta udde niwala lumewessa ringannu sal᷊amatta.

²⁹Sulal᷊ummu pangalo udde i mangitou namate iraṛangngo 10.000 su atoune tantaran Moab apan apianne; taweddu pia sangkatou apan naatal᷊angnga.

³⁰Allo udde Moab nawaddo su Israel, ne wanua udde matammudde ual᷊un pul᷊o su tonnane al᷊annune.

³¹Piaṛṛangnge manansunna eteudde Samgar ana'i Anat. I tou lai napapangalo wuṛṛu namallossu taumatan Israel. Ringannu ta'inna nipamiaṛṛa'u sapi, i tou namate 600 taumatan Filistin.