Read Talaud MAL᷊AṚṚUUNGNGA 4 Bible Online

MAL᷊AṚṚUUNGNGA 4 - Talaud bible

MAL᷊AṚṚUUNGNGA 4

¹Napawe i Ehud natete, walahannu Israel na'ola'e rosa apia su MAWU.

²Ne MAWU namalan mangitou niwaddon Yabin, ratun Kanaan apan uatana'a su soan Hazor. Tembonannu tantaran pangalone eteudde i Sisera apan uatana'a su Haroset-Hagoyim.

³I Yabin uatahuanna 900 keretan pangalo wuassu atta'a. Ruan pul᷊o su tonnane al᷊annune i tou uaparenta taumatan Israel ringannu maṛaggissa. Wua'udde i mangitou sinumal᷊ande maiontolla su MAWU.

⁴Su tempo udde uapiaṛa'u walahannu Israel eteudde sangkatou nabi wawine aranne i Debora, awingngi Lapidot.

⁵I Debora inanaramanmne ua'ianna su al᷊ungngu punnu alu kurma, suwallatu Rama wuṛṛu Betel, su wageangngu panenteannu Efraim. Wuṛṛu ete isudde manga taumatan Israel nirumanta madorongnga tatantiro si tou.

⁶Su allo sambau i tou nandolokku taumata niapawago si Barak, ana'i Abinoam, wuassu soan Kedes su wageangngu leta'i Naftali. Ana see i tou nabbisara si Barak, “Indi parentan MAWU, Ruatan Israel, si'o; ‘Ammul᷊a'a 10.000 su atoune esakka wuassu ruanganni Naftali wuṛṛu i Zebulon, wuṛṛu apira'e i mangitou watukku Wowon Tabor.

⁷Paṛaddote si Ya'u mandolokki Sisera, tembonannu tantaran Yabin, rumanta ringanni yamiu su Sal᷊ukku Kison ringannu tantarane wuṛṛu manga keretan pangalone mamangalo si yamiu. Arawe i Ya'u sarun mangonggolu auntunganna si yamiu sulal᷊ummu pangalo udde.’ ”

⁸I Barak nabbisara si Debora, “Amungkangngu i'o tumantalongnga, i ya'u lai inai. Arawe amungkangngu tawe, i ya'u lai maddiri inai.”

⁹I Debora sinumimbakka, “Ore, i ya'u tumantalongnga! Arawe naunge, wal᷊inewe i'o apan sal᷊immurine maasomba awawantuga. Ete sulal᷊ummu sangkatou wawine MAWU sarun mamaddon Sisera.” Ne i Debora inaite suadio'a ringanni Barak watukku Kedes.

¹⁰Ne i Barak nangapiddu ruanganni Zebulon wuṛṛu Naftali watukku Kedes. Ingana'a uatantalongnga si Barak wuṛṛu si Debora su tempo udde 10.000 su atoune.

¹¹Su tempo udde i Heber, sangkatou taumatan Keni, buatte nattingkaṛaen batanganne wuassu walahanne. (Walahannu Keni udde papapulunni Hobab, ipagi Musa.) I Heber buatte napararisikku manga rasanne maranin manga aaluanna terpentin su Zaanaim, tawe marau wuassu Kedes.

¹²Tawe nal᷊annu napawe i Sisera naaringikka manungku i Barak inaite watukku Wowon Tabor,

¹³i tou nangammulu sio ṛasutta keretan pangalone apan niola'a wuassu atta'a udde, su sambau ringannu anambon tantarane ana see nangapiddi mangitou wuassu Haroset-Hagoyim watukku Sal᷊ukku Kison.

¹⁴Ana see i Debora nabbisara si Barak, “Wette, inaite! Ete MAWU apan mamiaṛangngu. Allo indi i Tou nangonggollu auntunganna si yamiu wuassi Sisera.” Ne i Barak sinumossokke wuassu Wowon Tabor suadio'a ringannu mapul᷊o ṛiwu taumatane,

¹⁵wua'udde i Sisera namangalote. Wuṛṛu MAWU nangul᷊a'ukku anambon tantaran Sisera wuṛṛu manga keretan, pangalone, na'oman sara i Sisera sinumossokka wuassu keretane, ana see tinumal᷊angngu watanganne ringannu niumamattu ledda.

¹⁶I Barak nangenggenna manga keretan pangalo wuṛṛu tantaran seetta udde naddatingngu Haroset-Hagoyim ana see anambon tantaran Sisera udde nipate; tawe saran sangkatou apan niwala wiakka.

¹⁷Tantal᷊anna udde i Sisera tinumal᷊angke watukku rasanni Yael, awingngi Heber, taumatan Keni. Ana waugu i Ratu Yabin wuassu Hazor uahahawen amonanni Heber udde.

¹⁸Su tempo i Sisera nirumanta, i Yael nanal᷊oho si tou wuṛṛu nabbisara, “Wette Tuanga, suttate sulal᷊ummu rasangku indi; arie paata'utta.” Ne i Sisera sinumuttate sulal᷊ummu rasanna udde ana see tinaapanni Yael nasa pampele tadea i tou uawuni tawe asiloanna.

¹⁹Unni Sisera si Yael, “I ya'u tul᷊unga'a onggol᷊en addio'a ua'e inumanna; i ya'u marou.” Ne i Yael namu'a pato'a pisi, tampa aradoannu susu, ana see niapa'inumma si Sisera, wua'udde tinaapannu pampele udde apia.

²⁰Ana see i Sisera nabbisara si Yael, “Roote darisikka su saruannu ngaran rasanna. Amungkangngu pia taumata rumanta wuṛṛu maiwal᷊o si'o, pia taumata isindi, wal᷊oa'a tawe taumata.”

²¹I Sisera mangke tumaniten nal᷊otakka na'oman sara i tou niamatiil᷊anna ringannu mal᷊angnga. I Yael nanganu sambau darupa wuṛṛu sambua pasa'u rasanna, ana see ringannu mal᷊anna-l᷊annaba i tou nangundanin Sisera. Wua'udde i tou namansakku pasa'a udde su pappi'ane na'oman sara nallappasa su leta'a. Etearoddi i Yael namate si Sisera.

²²Su tempo i Barak nirumanta maddea'a si Sisera, i Yael nanal᷊oho si Barak wuṛṛu nabbisara si tou, “Wette, i ya'u sarun mamantingidda si'o, taumata apan raddeaannu udde,” i Barak sinumuttate suadio'a ringanni Yael, ana see naasilo si Sisera natete, uatattere su leta'a ringannu pasa'u rasanna uapansakka su pappi'ane.

²³Allo udde Mawu nangonggolu auntunganna su taumatan Israel si Yabin, ratun Kanaan.

²⁴Ratu udde mallannu lembon a'allangannu taumatan Israel na'oman sara panginsueanne i tou nate.