Read Talaud MAL᷊AṚṚUUNGNGA 5 Bible Online

MAL᷊AṚṚUUNGNGA 5 - Talaud bible

MAL᷊AṚṚUUNGNGA 5

¹Su allo udde i Debora wuṛṛu i Barak ana'i Abinoam nangantarite. Arendi wisarane:

²Paddalote MAWU, ana waugu manga awaṛaniannu Israel buatte nabbaidda inai mapapangalo, wuṛṛu tumanangnge ringannu naungnga mal᷊uassa inai mapapngalo.

³Paddaringikke manga ratu wuṛṛu parinsi, i ya'u mangngantari maddalo Ruatan Israel, eteudde MAWU.

⁴Su tempo I'o manantangken Seir, oh MAWU, wuṛṛu I'o nanantangngu wageangngu leta'u Edom, runia niumio'a, manga sasal᷊ossoga su langitta lai nawu'a, wuṛṛu manga winabbawa nanossokku ua'ene.

⁵Manga wowone niumio'a su saruannu tembonannu Sinai, su saruannu MAWU, Ruatan Israel.

⁶Su tempo i Samgar, ana'i Anat, wuṛṛu lai su tempon Yael, tawe kafilah su wanua, tawe ummaamatta su lal᷊anna wahewalla.

⁷Manga soa su Israel tawe tumatanangnge, mal᷊anna-l᷊annaba na'oman sara i'o nirumanta, Debora; darantanu naal᷊ihidda inangnga apan arangnguanna.

⁸Su tempo Israel mannatakke massubba monganna, pangalo napesangke su wanuan mangitou; suwallatu 40.000 awaṛaniannu walahanna, tawe saran sangkatou apan namasanna lutangnga.

⁹Su manga tembonannu tantaran Israel apan naiwawal᷊in batanganne ringannu naungnga mal᷊uassa, i ya'u mamasingkattu aadiangkamangku manambo-nambo. Paddalote MAWU!

¹⁰Ore i yamiu apan uasa'e keledai mawira, i yamiu apan ua'ianna su permadani, wuṛṛu i yamiu sarangkanambone apan u'amattu ledda, wattia'e watti'u auntunganna indi!

¹¹Su maranin manga paṛṛihi niaringikka taumata lullala'a mangngantari, masokka-sokka mabbatti'u auntungannu MAWU, auntungannu Israel, al᷊aṛana'u MAWU. Ne i mangitou nabbarisse mattuddan ngaran pasallangannu soa.

¹²I Debora dirumarisikke, wuṛṛu nangantarite. Darisikke Barak, wuṛṛu apira'e manga taumata apan niasametta!

¹³Taumata awaṛanianne apan lambene nirumanta ringannu piaṛange, i mangitou nirumanta, wuṛṛu nariahite mapapangalo ana waugu i Tou.

¹⁴I mangitou niumamatta wuassu Efraim watukku wawal᷊anne, uatantalongnga tantaran Benyamin apan uawarissa su saruanni mangitou. Wuassu Makhir nirumantate manga tembonannu tantara, ara'e panglima wuṛṛu wuassu Zebulon nabbuatte manga piaṛa'u tantara, ara'e perwira.

¹⁵Manga matatimmadi Isakhar nirumanta suadio'a ringanni Debora, ore, Isakhar nirumanta, wuṛṛu i Barak tinumantalonga lai; i mangitou tinumantalonmga si tou sinumossokka su wawal᷊anne. Arawe ruanganni Ruben tawe maatantunnu apulun naungnge ana waugu suwallati mangitou tawe pa'a'aukku wisara.

¹⁶Anio i mangitou uatana'a suwallatu manga domba? Tumba'u ana see maddaringikka mallal᷊u'adda mammago winatangnga papadul᷊iananne? Atonna ruanganni Ruben tawe maatantunnu apulune ana waugu suwallati mangitou tawe pa'a'aukku wisara.

¹⁷Tantal᷊anna i Zebulon wuṛṛu i Naftali mangke mattinsahadda uapapangalo, ruanganni Dan uawanua su apalla, wuṛṛu ruanganni Gad sidutu uatana'a su Yordan samba'a ra'i, wuṛṛu ruanganni Asyer matammudda wuṛṛu maddiri massal᷊iu wuassu tampan mangitou su al᷊o'engngu apanne.

¹⁹Su Taanakh, maranin sal᷊ukka su Megido, manga ratu uapapangalo, manga ratun Kanaan mattinsahadda, arawe tawe napangapiddu sal᷊a'a maola'a saranapa niaaṛo.

²⁰Manga anumpitanna lai mattinsahadda mando'appa si Sisera, wuassu tampa a'amatanni mangitou su winalanganna.

²¹Sal᷊ukku Kison nammanawanga nangelekku ro'appa. Inai, inaite ringannu matohassa, ei niawa'u!

²²Ringannu mal᷊ihakka tatal᷊angngu manga pal᷊addu leddan awal᷊o apan niapatal᷊angngu sumasa'ene.

²³“Niawontohante i Meros, wuṛṛu tumatanangnge,” unnu Mala'ekattu MAWU “ana waugu i mangitou tawe nirumanta nangonggolu sumbala maola'a atumannaṛanne apan mattinsahadda hunane su MAWU.”

²⁴Naauntungke i Yael, awingngi Heber taumatan Keni; wuassu anambon taumata uatana'a su rasanna, ete i tou apan lembon nial᷊amatanna.

²⁵Si Sisera naddorongnga ua'e, arawe i tou nangonggolu susu si tou, i tou nanarun susu sulal᷊ummu mangko apan ṛinone ipanaru manga ratu.

²⁶Ringannu pasa'a wuṛṛu darupa su limane i Yael namuulla si Sisera na'oman sara naṛimunsa'a puane.

²⁷Su leddan Yael i tou naṛṛa'a tawe sasangngone uatattere su leta'a naddatingannu papatene.

²⁸Wuassu manga taralin jendela, inangngi Sisera uwiala, wuṛṛu nabbisara, “Anio keretane taambe nirumanta, anio tawe aringiṛanna tingikku leddan awal᷊one?”

²⁹Apan apandeanne suwallatu manga mangangimbene nangoinggollu sasimbakka apan niasingkatante sassane sulal᷊ummu naungnge;

³⁰“I mangitou tantal᷊anna mattahia saranapa apan niaaṛṛo, su tantara sangkatou, nionggola sangkatou ara'e ruan katou maṛuala. Wageangngi Sisera, mal᷊aṛenessa a'olanna laubba apan lembon maarega, su ratu, wawine selendanga apan hahambarannu al᷊awo'u kalure.”

³¹Antimanna manga seen-Nu, oh MAWU, mate ere i Sisera, arawe anambon manga hawe-Nu mabbal᷊i wahewalla naal᷊ihidda matannallo su winalanganna! Wua'udde, wanua udde matammude appatu pul᷊o su tonnane al᷊annune.