Read Talaud MAL᷊AṚṚUUNGNGA 9 Bible Online

MAL᷊AṚṚUUNGNGA 9 - Talaud bible

MAL᷊AṚṚUUNGNGA 9

¹Su allo sambau i Abimelekh ana'i Gideon inaite watukku soa Sikhem atatanaannu tuṛangngu ianangene. Poiaroddi i tou uahahatton mangitou, wisarane,

²“Iwal᷊oi'o su anambon tumana'u soan Sikhem, suapa mappianne: Paparentannu siri pitu pul᷊o ana'i Gideon, ara'e tumba'u sangkatou? Paasingkata'a si mangitou lai manungku i ya'u ta'e pia amputtu pusidda ringanni mangitou.”

³Ne ṛuangannu inangngi Abimelekh inaite ringannu manga taumatan Sikhem wuṛṛu namasingkattu tanatan Abimelekh si mangitou. Ana see tumana'u Sikhem udde nakkawessa, manungku i mangitou tumantalongnga si Abimelekh, ana waugu tumuṛutti mangitou, i tou ta'e daṛṛa sambau ringanni mangitou.

⁴Wua'udde i mangitou nangonggolu pitu pul᷊o roitta sal᷊a'a apan nianu wuassu wal᷊en passubbanna su Baal-Berit. Ringannu roitta udde i Abimelekh nanewa sangkammul᷊anna manga taumata taṛṛa wawul᷊o maammulla ringanni tou,

⁵ana see inaite watukku ampungngu iamange su Ofra. Poiaroddi i tou namate siri pitu pul᷊o tuṛangnge su wowon sambau watu. Arawe i Yotam ana'i Gideon ṛembonne tawe niapate ana waugu i tou na'imbuni.

⁶Ne taumatan Sikhem wuṛṛu Bet-Milo na'amulle, ana see inaite watukku punnu alu terpentin apan maṛaubba su Sikhem. Poiaroddi i mangitou nanenegi Abimelekh naola'a ratu.

⁷Napawe i Yotam naaringikka ola'u hatto udde, i tou inaite dirumarisikka su puiddu Wowon Gerizim, ana see inumui su manga taumata udde, “Paddaringikka si ya'u, ei manga taumatan Sikhem, tadea'u MAWU Ruata lai maddaringikka si yamiu!

⁸Pia sambau watti'a, su paassa na'ammule manga aaluanna mamile ratun mangitou. Ne i mangitou nabbisarate su alun zaitun, ‘Ariadite ratun kami.’

⁹Sasimbakku alu zaitun, ‘Ah, i ya'u maddiri. Ana waugu amungkangu i ya'u mabbal᷊i ratu, i ya'u ṛinone mangillol᷊on paaola'a lanan zaitun apan ippappaata ipangaddata manga monganna wuṛṛu taumata.’

¹⁰Ana see unnu manga aaluanna udde su alu ara, ‘I'ote maola'a ratun kami.’

¹¹Arawe alu ara sinumimbakka, ‘I ya'u maddiri, ana waugu napawe naola'e ratu, i ya'u ṛinone mangillol᷊on pabbawua wua ara apan matemanga.’

¹²Wua'udde manga aaluanna udde nabbisarate su alun anggore, ‘Ne ete i'o maola'a ratun kami!’

¹³Arawe alu anggore sinumimbakka, ‘Tawe mariaddi ya'u iapaillol᷊o mabbuan anggore apan maal᷊uassa naungngu manga mongannu taumata, tumba'u ana see maola'a ratunu!’

¹⁴Ana waugu anambon aaluanna udde nabbisarate su aputta ṛoaanna, ‘I'ote maola'a ratun kami.’

¹⁵Aputta ṛoaanna udde sinumimbakka, ‘Amungkangu i yamiu atonna-tonna maapulu i ya'u maola'a ratunu, wette passirungke su al᷊ungku. Amungkangngu i yamiu maddiri, ne wuassu manga ranna'u apan pia ṛoangnge indi sarun sumabbanga putungnga apan mangepoddu manga aaluanna aras su Libanon, ma'oman sara masue.’ ”

¹⁶“Ne,” i Yotam nanassukku wisarane, “Apa ringannu manenegi Abimelekh maola'a ratu, i yamiu buatte na'ola'a manara mapia wuṛṛu naungnga mal᷊uassa? Apa i yamiu piate inolaanna mapia si Gideon, iamangku, wuṛṛu ṛuanganne? Apa i yamiu buatte nabbal᷊issa manga sahaddu iamangku

¹⁷apan buatte napapangalo ana waugu i yamiu? Naunge, niawane buatte naola'a wataṛu ana waugu ipamallosi yamiu wuassu parentan manga taumatan Midian.

¹⁸Arawe orassa indi yamiu nallobossa amonannu iamangku. Manga al᷊aṛanangnge sarangkanambone buatte nipaten kamiu — siri pitu pul᷊o mangke paassa nipate su wowon sambau watu. I Abimelekh ana'u iamangku wuassu allange. Arawe i yamiu nanenegi tou naola'a ratun Sikhem, tumba'u ana waugu i tou ta'e pia amputtu pusidda ringanni yamiu.

¹⁹Amungkangu inolaannu udde allo indi su saruannu iamangku wuṛṛu amonanne udde ringannu naungnga mal᷊uassa, roote lalluassa ringanni Abimelekh, wuṛṛu wala'e i tou lulluassa ringanni yamiu.

²⁰Arawe amungkangu tawe aroddi olangnge, doronganna wuassi Abimelekh sumabbanga putungnga apan manutungnga wuṛṛu manginsue tumana'u Sikhem see lai Bet-Milo. Wuṛṛu doronganna wuassu tumana'u Sikhem see lai Bet-Milo sumabbanga putungnga apan manutungnga si Abimelekh.”

²¹Wua'udde i Yotam tinumal᷊angke ana see natana'e su Beer, ana waugu i tou matta'utti Abimelekh, tuṛangnge udde.

²²Tallu tonna al᷊annune i Abimelekh uaparenta su Israel.

²³Ana see Mawu nandantan pasaseetta suwallati Abimelekh wuṛṛu manga taumatan Sikhem, na'oman sara i mangitou nilumawangnga si tou.

²⁴Olangnge indi nariaddi tadea'u awal᷊isante al᷊al᷊eon Abimelekh wuṛṛu manga taumatan Sikhem apan namono'a si tou iapapate siri pitu pul᷊o al᷊aṛana'i Gideon.

²⁵Manga taumatan Sikhem udde napaariagan taumata su manga puiddu wowone tadea'u iapasametta si Abimelekh. Suapan taumata sumabbi isudde saranapane anuannu manga mandariaga udde. Ne olangnge udde niapasingkatta si Abimelekh.

²⁶Su tempo udde i Gaal ana'i Ebed nirumantate suadio'a ringannu manga tuṛangnge inai matana'a su Sikhem; wuṛṛu manga taumatan Sikhem mangngimanna si tou.

²⁷I mangitou inaite nani'o anggore su manga wawail᷊annu anggore, ana see niola'a ua'en anggore wuṛṛu na'ola'e andeangnga. I mangitou u'anna, ma'inumma su tampa passubbanna monganni mangitou lapiddu mantal᷊an Abimelekh.

²⁸“I ite indi isai, na'oman sara i ite ṛinone massuṛubbawa si Abimelekh?” unni Gaal. “I tou udde isai mangal᷊ene? Wal᷊inewe i tou udde ana'i Gideon apan ringanni Zebul tepellene udde naola'e allangngi Hemor, iamangi Sikhem, al᷊amonan kite!”

²⁹“Unnu wisara i ya'u uapiaṛa'u manga taumatan Sikhem indi, mangke atonna nasuete watti'i Abimelekh udde! Sarun ta'u iwal᷊o si tou, ‘Otte inawarendite! Apira'e tantaranu wuṛṛu wette sabbangke mapapangalo!’ ”

³⁰I Zebul, tembonannu soan Sikhem, mangke nasa'u napawe naaringikka wisaran Gaal udde.

³¹I tou nandolokku daroloṛanna ringanni Abimelekh su Aruma iapapasingkattu tanata indi, “i Gaal ana'i Ebed suadio'a ringannu manga tuṛangnge nirumantate su Sikhem wuṛṛu mammono'a tumanangnge tadea'u lumawangnga si'o.

³²Ana waugu udde, ṛinone i'o wuṛṛu manga taumatanu inai ma'imbuni su wailla su tempo alloarane.

³³Tiṛabbi marua allo napawe matannallo sumabbangke, pangaloite soa udde ringannu paṛindu'anna. Wuṛṛu amungkangu i Gaal wuṛṛu manga taumatane sumabbanga lumawangnga si'o, eteudde tempone ipamangalo si tou!”

³⁴Ne i Abimelekh ringannu anambon tantarane niumamatte alloarane. I mangitou nisal᷊iawukka naola'a appatu wageangnga ana see inaite na'imbuni namal᷊iwutta soan Sikhem.

³⁵Tawe nal᷊annu napawe i Abimelekh wuṛṛu manga taumatane naasilo si Gaal sinumabbanga wuṛṛu dirumarisikka su ngaran pasallangannu soa udde, i mangitou sarangkanambone sinumabbanga wuassu pa'imbunianni mangitou.

³⁶I Gaal naasilo si mangitou, ana see nabbisara si Zebul, “Pa'ellege! Pia taumata sinumossoka inawarendi wuassu manga puiddu wowone!” “Ah, udde wal᷊ine taumata!” sasimbakki Zebul, “udde tumba'u manga lintau su wowone.”

³⁷Ana see unni Gaal apia; “Atonna! Pia taumata sinumossokka wuassu wawal᷊annu wuidda, wuṛṛu sambageanganna lai tantal᷊anna mattudda inawarendi wuassu punnu alu terpentin apan pia taṛinone udde.”

³⁸I Zebul nabbisarate si Gaal, “Ne, suapate moṛongu apan mal᷊oangnga udde? Dorone i'o nabbisara, ipa'ura i ite massuṛubbawa si Abimelekh udde? Ete manga taumata apan lallobosannu. Otte inaite orassa indi pamangalo si mangitou!”

³⁹Ana see i Gaal sinumabbangke wuṛṛu nangapiddu manga taumatan Sikhem wuṛṛu namangalote si Abimelekh.

⁴⁰Arawe i Abimelekh namangalo si tou na'oman sara i tou tinumal᷊angnga. Manambo taumata nate naddatingngu ngara pasallangannu su soa udde.

⁴¹Panginsueanne i Abimelekh nabelengke watukku Aruma, wuṛṛu namanuate poiaroddi lai.

⁴²Tiṛabbine manga taumatan Sikhem mannattakke mannantangu soa, inaite watukku wailla wuṛṛu olangnge udde niapasingkatta si Abimelekh.

⁴³Ana see i Abimelekh nangammulu manga taumatane, wuṛṛu i mangitou nitahia naola'a tallun kawageanganna, ana see i mangitou inaite na'imbuni su manga wailla. Su tempo i tou naasilo tumana'u soa udde mattuddan bailla, i tou sinumabbangnga wuassu pa'imbunianne ana see namate si mangitou.

⁴⁴Tantal᷊anna i Abimelekh wuṛṛu tantaṛanne inai masasaṛawutta mamangalo su ngaran soa, darua wageangngu tantarane waine nangenggena wuṛṛu mamate manga taumata apan tinumal᷊angnga watukku manga wailla.

⁴⁵I Abimelekh sidutu uapapangalo su al᷊o'engngu allo wuṛṛu namanua su soa udde; tumanangnge nipate, ana see soane niṛimunsa'a wua'udde nisal᷊iawuṛannu asimma.

⁴⁶Su tempo manga taumata apan uatana'a sulal᷊ummu tanda'a watun Sikhem naaringikka ola'u hatto udde, i mangitou sinumutta sulal᷊ummu loṛangnga su al᷊ungngu kuil El-Berit nadea'a pattillummanna.

⁴⁷Ana see taumata namasingkatta si Abimelekh manungku manga taumata su tanda'a watun Sikhem udde naammule poiaroddi.

⁴⁸Ana waugu udde, i Abimelekh ringannu manga taumatane inaite watukku Wowon Zalmon. Poiaroddi i tou namonggo'a manga rannan kalu ringannu wal᷊iungnga, ana see namasanna manga rannan kalu udde su wambangnge, wua'udde nandolokku manga taumatane lai mal᷊iha-l᷊ihakka niapatanno ereapa apan buatte niolangnge.

⁴⁹Ne i mangitou sangkatou-sangkatou namonggo'e manga rannan kalu, ana see niumamatte uatantalongnga si Abimelekh. Anambon rannan kalu udde niombo mangitou su mamoṛongannu loṛangngu kuil udde, ana see tinutungnga, tantal᷊anna manga taumatan Sikhem udde ta'e sulal᷊umme. Ana waugu tumana'u Sikhem sarangkanambone natete, iraṛangngo saṛiwu su atoune esakka wuṛṛu wawine.

⁵⁰Wua'udde i Abimelekh inaite watukku Tebes. I tou namangalo soa udde ana see namanuate isudde.

⁵¹Su pattangngannu soa udde pia sambau candi apan matohassa. Ne anambon tumana'u soa udde tinumal᷊angnga poiaroddi. I mangitou sinumutta sulal᷊ummu candi udde wuṛṛu namal᷊en ngarane, ana see niumawitta rosone.

⁵²Wua'udde i Abimelekh nirumantate isudde namangalo su candi. Napawe i tou na'omate su ngaran candi udde wuṛṛu manutungke,

⁵³sangkatou wawine nangema'u watun gahilinganna su puane, na'oman sara napesangnga tanggilal᷊an puane udde.

⁵⁴Abimelekh mal᷊iha l᷊ihakka namago umbasanna apan uapasanna lutangnge wuṛṛu nabbisara, “Sawutte hal᷊elenu wuṛṛu patete i ya'u; i ya'u maddiri isaggon taumata manungku i ya'u nipaten bawine.” Ne umbasanna udde nangusu'a si tou na'oman sara nate.

⁵⁵Napawe taumatan Israel naasilo manungku i Abimelekh natete, i mangitou sarangkanambone napul᷊ete.

⁵⁶Etearoddi olangnge MAWU Ruata nabbal᷊issa si Abimelekh su ola'u al᷊al᷊eo apan buatte niolangnge su saruannu iamange, su tempo i tou namate siri pitu pul᷊o su atoune manga tuṛangnge.

⁵⁷Ne Mawu nakkuumannu lai manga taumatan Sikhem ana waugu al᷊al᷊eon mangitou. Olangnge udde naṛino ere lai buatte niapasingkatti Yotam ana'i Gideon su ola'i mangitou su tempo i tou nassalun mangitou.