Read Talaud 2 YOHANES 1 Bible Online

2 YOHANES 1 - Talaud bible

2 YOHANES 1

¹Su Inangnga apan suete nipilen Duata, wuṛṛu su manga al᷊aṛṛana'u Inangnga. Suratta indi wuassi ya'u, piaṛṛa'u jamaatta apan atonna-tonna marangngu si yamiu. Wal᷊ine tumba'u i ya'u, arawe anambon taumata apan maaillal᷊a Ruata apan naṛṛino, marangngu si yamiu lai.

²Ana waugu Ruata uatana'a sulal᷊ummu naungngi ite, wuṛṛu sidutu uatana'a ringanni ite saran mal᷊annu-l᷊annu.

³Antimanna i ite onggol᷊annu al᷊amatta, aakkana wuṛṛu paddarame wuassu Ruata Iamangnga, wuṛṛu Yesus Kristus Ana'u Iamangnga udde. Antimanna sarangkanambone udde tatahuananni ite ringannu naungnga apan matul᷊idda wuṛṛu ringannu darangngu.

⁴I ya'u lembon lulluassa napawe naasingkatta manungku pia al᷊aṛṛana'u Inangnga apan mabbiakka tuttuṛṛuta al᷊aṛṛa'u Ruata, ere lai suete nirolokku Ruata Iamangnga si ite.

⁵Ana waugu udde, Inangku, i ya'u sumal᷊annde tadea'u i ite sarangkanambone uararangngu. Apa ta'u iwabbal᷊o indi wal᷊ine sambau tita apan wakku; tita indi suete nionggolla si ite ro'en i ite nanattakka mangngimanna.

⁶Mandangngu atappasanne mabbiakka tuttuṛṛuta manga parentan Duata. Wuṛṛu manga parenta apan suete niaringiṛṛani yamiu ro'en paarorone eteudde manungku i yamiu ṛinone mabbiakka uararangngu sangkatou ringannu sangkatou.

⁷Manambo taṛṛa wahia nassal᷊iawukke su ahewallu runia. I mangitou eteudde manga taumata apan tawe manga'u manungku Yesus Kristus nirumanta su runia indi naola'a sangkatou taumata. Taumata ereudde uddewe taṛṛa wahia, wuṛṛu Seetti Kristus.

⁸Ana waugu udde, paariaggaite arie ma'oman sara i yamiu awul᷊iannu apa apan suete nionggoli yami si yamiu. Paddea'e tadea'u i yamiu manengkamma lal᷊antake wuassu Ruata.

⁹Taumata apan tawe uaaggassa al᷊aṛṛa'i Kristus, arawe sinumewada wuassu apa apan niaṛṛa'i Kristus, taumata udde tawe maatuahanna Ruata. Taumata apan siddutu uatundeeta su al᷊aṛṛa'i Kristus, atappasanne uatahuanna Ruata Iamangnga aroddi lai Ana'a.

¹⁰Ana waugu udde, amungkangu pia taumata rumanta wuṛṛu mabbatti'a si yamiu al᷊aṛṛa'a apan tawe niaṛṛa'i Kristus, arie manarimmattu taumata udde sulal᷊ummu wal᷊enu ara'e mattabea si tou.

¹¹Ana waugu taumata apan mattabea su taumata ereudde suaddio'a lai i tou ma'ola'a al᷊al᷊eo ringannu taumata udde.

¹²Ta'e manambo atonna apan ta'u iwal᷊o si yamiu, arawe pendamanna apianne tawe sulal᷊ummu suratta. I ya'u mangantimma wotongnge maatembo wuṛṛu maggahaton kamiu, tadea'u naungngi ite atonna-tonna lulluassa.

¹³Manga al᷊aṛṛana'a wuassu tuṛṛangngu Inangnga wawine apan nipilen Duata lai, napaapiddu tabea su Inangnga.