Read Talaud SONDAPPA 10 Bible Online

SONDAPPA 10 - Talaud bible

SONDAPPA 10

¹See i ya'u naasilo sangkatou mala'ekatta matohassa waine sinumossoka wuassu surga. I tou papi'unannu winabbawa wuṛṛu sambua randipakka arak naggial᷊o uapal᷊iwutta su puane. Hatine lullansiangnga naal᷊ihida matannallo, wuṛṛu leddane naal᷊ihidda pal᷊iaṛṛanu putungnga.

²Su limane pia sambau lul᷊unnu wuke adio'a apan wawu'anna. Ledda aikkatanne uaṛṛinda tahal᷊oangnga, wuṛṛu leddane aiṛṛi uaṛṛinda ammaranne.

³See i tou inumui ringannu tingikka ma'ikkatta naal᷊ihidda tingikku manga singa. Napawe mala'ekatta udde suete niumui, pitu rallu'a sinumibakka ringannu tingikka mappose.

⁴Aroddi pitu rallu'a udde nattingikka, i ya'u ma'apulu mamoṛṛettu apa niwisarane, arawe i ya'u naaringikka tingikka wuassu surga nabbisara, “Arie pabbattia'u apa apan niwal᷊om pitu rallu'a udde; arie pabboṛṛeta'a!”

⁵See mala'ekatta apan ta'u niasiloanna uaṛṛinda tahal᷊oangnga wuṛṛu ammaranne udde namatten lima aikkatanne watukku langitta.

⁶I tou nassalu ringannu arannu Ruata apan wiakka saran mal᷊annu l᷊annu, apan nandiaddi langitta wuṛṛu runia wuṛṛu tahal᷊oangnga see lai manga al᷊awo'a apan mabbiakka sulal᷊umme. Mala'ekatta udde nabbisara, “Tempone tate lai iasoṛṛota!

⁷Arawe napawe mala'ekatta appitune nattiuppa trompeti tou, Ruata sarun ma'ola'a ṛiin-Ne apan uawuni, ere suete niwatti'a su manga allang-Nge eteudde manga nabi.”

⁸Wua'udde tingikka apan ta'u niaringiṛṛana wuassu surga udde, nabbisara apia si ya'u. I tou nabbisara, “Roote panganu lul᷊unnu wuke apan wawu'anna su lima mala'ekatta apan uaṛṛinda tahal᷊oangnga wuṛṛu ammaranne udde.”

⁹Ne i ya'u inaite nattuda mala'ekatta udde wuṛṛu nadorongnga tadea'u i tou mangonggolu lul᷊unnu wuke adio'a udde si ya'u. I tou nabbisara, “Anute wuṛṛu ante indi. Sulal᷊ummu tiannu i tou sarun maola'a mapetta, arawe sulal᷊ummu moṛṛongu i tou matemangnga naal᷊ihidda pul᷊a.”

¹⁰I ya'u nanganu lul᷊unna adio'a udde wuassu limane see nianna. Sulal᷊ummu moṛṛonga pendamanna ere temangngu pul᷊a, arawe napawe ta'u niallupa, sulal᷊ummu tianna i tou nabbal᷊i mapetta.

¹¹Wua'udde i ya'u nirolokka, “Wattia'a paassa lai watti'u Ruata su ola'u manga walahanna, manga araratuanna, manga wahasa, wuṛṛu manga ratu.”