Read Talaud SONDAPPA 11 Bible Online

SONDAPPA 11 - Talaud bible

SONDAPPA 11

¹Wua'udde i ya'u nionggol᷊annu alu sampaddi apan lihidde ere tatumma'inna auukka, see nirolokka, “Roote panguukka Wal᷊e Mawu wuṛṛu Mezbah. Reenga'a pira anambon taumata apan mattaṛṛamawu sulal᷊umme.

²Arawe arie manguukka rallaka su samba'an liuddu Wal᷊e Mawu udde, ana waugu wageangnge udde suete tinantilla su manga taumata apan tawe maaillal᷊a Mawu. I mangitou sarun maṛṛinda soa apan susi udde appatu pul᷊o dua su wul᷊anne al᷊annune.

³I Ya'u sarun mandolokku ruang katou tiala-U apan ual᷊uṛṛem peddeta ilallal᷊o, wuṛṛu i mangitou sarun mamasingkatu watti'u Ruata al᷊annune 1260 su allone.”

⁴Ruang katou tiala udde, eteudde ruam bua alun Zaitun wuṛṛu ruam bua leddan sol᷊o apan uaraddo su saruannu Mawu ul᷊ilimpati'uppa.

⁵Amungkangu taumata ma'annama ma'ola'a inolaanna apan lal᷊eo si mangitou, ne wuassu moṛṛongi mangitou sumabbangke putungnga apan maapate manga seenne. Ringannu olangnge aroddi, anambon taumata apan ma'apulu mannansara si mangitou sarun iapate.

⁶I mangitou pia taṛṛino ipanutubba langitta tadea'u tawe manguranna tantal᷊anna i mangitou mammasingkatu watti'u Ruata. I mangitou uatahuanna lai taṛṛino su anambon al᷊imatan ua'e, ipamal᷊u ua'e mabbal᷊i ṛaṛṛa. Wuṛṛu i mangitou uatahuanna lai taṛṛino ipamuulla runia ringannu al᷊awo'u hating kasasusa, suapan tempo ipaapulu mangitou.

⁷Napawe i mangitou suete nabbatti'u watti'i mangitou, winatangnga apan sinumabanga wuassu rampisu papate sarun lumawanna si mangitou.

⁸Wuṛṛu winal᷊unanni mangitou sarun iapatal᷊allada su amatannu soa wahewalla, suapa Mawu mangitou niarussa. Aranna sasanato'u soa udde, eteudde Sodom ara'e Mesir.

⁹Manga taumata wuassu anambon araratuanna, walahanna, wahasa sarun maasilo winal᷊unanni mangitou, tallu allo mattangnga al᷊annune, wuṛṛu tawe mamalam binal᷊unanna udde ilabbinga.

¹⁰Tumana'u runia sarun lumuassa ana waugu inapateannu tiala darua udde. I mangitou sarun maddamea wuṛṛu sarun ma'a'agilu aonggola, ana waugu ruang katou nabi udde suete nandantan anambon asasusa su anambon taumata su runia.

¹¹Napawe tallute allo mattangnga, nirumantate sasangngo ipabbiakka wuassu Ruata wuṛṛu sinumutta apia sulal᷊ummu nabi darua udde. Ne i mangitou nabbuatte dirumarisikka, na'oman sara taumata apan naasilo si mangitou nata'utta atonna.

¹²Wua'udde ruang katou nabi udde naaringikka tingikka ma'ikkatta namago si tarua wuassu surga, “Wette rangante isindi!” See su saruannu aellegu seetti mangitou, itarua nirumangante su surga, aoopannu winabbawa.

¹³Ne su tempo udde nariaddite linukka apan masaddata. Sepermapul᷊o wuassu soa udde naṛṛimunsa'a, wuṛṛu pitu ṛiwu taumata nate ana waugu linukka udde. Manga taumata waine lembon matta'utta, see i mangitou nadalote awawantugu Ruata su surga.

¹⁴Silaka aruane nal᷊iudde. Arawe pa'ellege! Silaka atallune ete tal᷊ang kadio'a lai sarun manansuna.

¹⁵See mala'ekatta appitune nattiuppe trompeti tou, ne su surga niaṛṛingiṛṛante manga tingikka ma'ikkatta apan mabbisara, “Taṛṛino ipamarenta runia orassa indi sulal᷊ummu lima Mawung kite wuṛṛu Ratum Punnu Sal᷊amatta apan suete pina'ire-Ne. I Tou sarun mamarenta saran mal᷊annu-l᷊annu!”

¹⁶Ne sire ruam pul᷊o appata piaṛṛange apan ua'ianna su adderan araratuanni mangitou su saruannu Ruata, inumaruutta wuṛṛu nassubba Ruata.

¹⁷I mangitou nabbisara, “Mawu, Ruata Lembon Taṛṛino, apan nirumanta, wuṛṛu nirumantate! I yami ma'adiangkamanna Si'o ana waugu I'o suete nappa'attu taṛṛino-Nu apan bahewalla, wuṛṛu nanattakke mammarenta!

¹⁸Manga taumata apan tawe maaillal᷊a Mawu, mammangalo ana waugu temponete I'o mapaasabangu asasa'u-Nu, wuṛṛu temponete lai I'o mamarikissa manga taumata nate. Ete indi tempone ipangonggolu lal᷊antake su manga allang-Ngu, manga nabi, wuṛṛu su anambon pabbawala-Gu, eteudde anambon taumata apan mattaṛṛamawu Si'o, timmade ara'e dario'a Ete indi tempone ipaṛṛimunsa'a manga taumata apan naṛṛimunsa'a runia!”

¹⁹Ne, nawu'ate Wal᷊en Ruata su surga, wuṛṛu niasiloante Wantalu Pa'aire sulal᷊umme. See nariaddite sawallo ma'ilatta wuṛṛu tingikku rallu'a mappose wuṛṛu ruddallu'a, see lai linukka wuṛṛu uranna eissa apan masassaga.