Read Talaud SONDAPPA 13 Bible Online

SONDAPPA 13 - Talaud bible

SONDAPPA 13

¹Wua'udde i ya'u naasilo sambau winatangnga nilumapputa wuassu lal᷊ummu tahal᷊oangnga. I tou pia tatandunge mapul᷊o wuṛṛu puane pitu. Suapan tatandunge pia araposan araratuanna, wuṛṛu suapan puane uawoṛṛetta sambau aranna aal᷊uandaga su Ruata.

²Winatangnga apan ta'u niasiloanna udde olangnge naal᷊ihidda ere macan tutul, wuṛṛu leddane naal᷊ihidda beruangnga, wuṛṛu sasumigge naal᷊ihidda sasumiggu singa. See winatangnga udde nionggol᷊annu naga atatohassi tou sassane, wuṛṛu adderan araratuanne, wuṛṛu taṛṛinone apan bahewalla.

³Sambau wuassu wallatu pitu puam winatangnga udde aellehanna ere lessa apan wahewalla, arawe lessa udde napiate. Ahewallu runia uatantalongnga winatangnga udde ringannu tuttiangnga.

⁴Wuṛṛu i mangitou maddalo naga udde ana waugu i tou suete nangonggolu taṛṛinone su winatangnga udde. Wuṛṛu i mangitou massubba winatangnga udde lai. I mangitou nabbisara, “Tawe sul᷊ungnge winatangnga indi! Tawedu wotongnge mamangalo lumawanna si tou!”

⁵Winatangnga udde niwala mabbisara manga inolaanna apan ipammunga wuṛṛu ipangngal᷊uandaga Ruata. I tou niwala mammarenta appatu pul᷊o dua su wul᷊anne al᷊annune.

⁶See i tou mannattakke mangangal᷊uandaga Ruata, wuṛṛu arannu Ruata. Aroddi lai tampa atatanaannu Ruata, wuṛṛu sarangkanambone apan uatana'a su surga lai nial᷊uandahanne.

⁷I tou niwala lai lullawanna walahannu Ruata lapiddu mandugi si mangitou. Wuṛṛu taṛṛino su al᷊awo'u walahanna, araratuanna, wahasa, wuṛṛu walahanna nionggolla si tou.

⁸Winatangnga udde sarun subbannu anambon taumata apan mabbiakka su wowon runia indi, tabbene'e manga taumata apan aranne niwoṛṛeta tantal᷊anna runia indi taambe nariaddi, sulal᷊ummu wuken taumata wiakka pussa'an Ana'u Domba apan suete nipototta.

⁹Ana waugu udde, amungkangu i yamiu wotongnge maddaringikka, paddaringikke watti'a indi:

¹⁰“Taumata apan ṛinone iṛṛuumanna, atonna i tou sarun iṛṛuumanna. Wuṛṛu taumata apan ṛinone pateannu hal᷊ele, atonna i tou sarun pateannu hal᷊ele. Ana waugu udde walahannu Ruata ṛinone matammuda wuṛṛu matuṛṛuta.”

¹¹See i ya'u naasilo sambau winatangnga waine sinumabbanga wuassu lal᷊ummu runia. I tou pia tatandunge darua ere tatandu'u ana'u domba. Tingikke ere tingikku naga.

¹²Su saruannu winatanga apan paarorone udde i tou nappaattu taṛṛino apan wahewalla apan niasombanganne wuassu winatangnga udde lai. Ahewallu runia wuṛṛu anambon apan uatana'a su wowone, niwata'a massubba winatangnga paarorone udde, apan lessane wahewalla napiate.

¹³Winatangnga aruane udde na'ola'a manga al᷊aṛṛindu'a apan wahewalla. Su saruannu awada'alla i tou na'ola'a putungnga niumonto'a wuassu langitta watukku runia.

¹⁴Wuṛṛu anambon taumata apan mabbiakka su runia niawusuanne ringannu manga al᷊aṛṛindu'a apan botongnge olaanne su saruannu winatangnga apan paarorone udde. Wuṛṛu i mangitou sarangkanambone nirolokka mandarisikku sambau paal᷊uanna wuassu winatangnga apan suete nilessan hal᷊ele, arawe ta'e wiakka.

¹⁵Winatangnga aruane udde niwala mangonggolu singangu su paal᷊uanna udde, na'oman sara paal᷊uanna udde wotongnge mabbisara wuṛṛu mamate anambon taumata apan maddiri massubba si tou.

¹⁶Anambon taumata, timmade wuṛṛu dario'a, ala wuṛṛu asiangnga, allangnga wuṛṛu tawe allangnga, niwata'u winatangnga udde iapasengkama tatiala su lima aikkatanni mangitou ara'e su pakkani mangitou.

¹⁷Tawe saran sangkatou wotongnge mamalli ara'e mabbal᷊u'u sarannapa, amungkangu i tou tawe tatiala udde, eteudde arannu winatangnga udde sassane, ara'e woṛṛetta papasingkatu aranna udde.

¹⁸Isindi ṛinone pia apande. Taumata apan masiṛṛongnga wotongnge mandeengngu atappasanne wuassu anambon winatangnga udde, ana waugu reenganna udde, eteudde arannu sangkatou taumata. Reenganne eteudde 666.