Read Talaud SONDAPPA 15 Bible Online

SONDAPPA 15 - Talaud bible

SONDAPPA 15

¹Wua'udde i ya'u naasilo su langitta sambau apan maatiangnga wuṛṛu tawe sul᷊ungnge. Pia sire pitu mala'ekatta wuṛṛu pitu asasusa apan panginsueanne. Ete indi panginsueanne Ruata mappaarantan asasa'u-Ne.

²Napawe wua'udde i ya'u naasilo sambau apan aellehanna naal᷊ihidda tahal᷊oangnga kaca ual᷊al᷊o'an putungnga. I ya'u naasilo lai manga taumata apan suete naauntunga su winatangnga wuṛṛu paal᷊uanne, wuṛṛu naauntunga su manga taumata apan aranne nitialannu woṛṛetu angka ara'e reenganna. Manga taumata apan naa'untunga udde uarisikka su winggin tahal᷊oangnga kaca lapiddu uaaggasa kecapi apan nionggolu Ruata si mangitou.

³Wuṛṛu i mangitou mangantari antari Musa, allangngu Ruata, wuṛṛu antarin Ana'u Domba. Arendi tingikke, “Mawu, Ruata Lembon Taṛṛino, tumaniten wahewalla wuṛṛu ma'atiangnga manga inolaan-Nu! Ratun al᷊awo'u walahanna tumaniten matul᷊idda wuṛṛu tawe sal᷊ane manga inolaan-Nu!

⁴Isai apan tawe matta'uttu, Mawu? Isai maddiri mamasingkatu awawantu-Gu? Tumba'u I'o apan na'ukkassa. Al᷊awo'u walahanna sarun rumanta massubba Si'o ana waugu manga parenta-Nu apan matul᷊idda suete niaasiloannu anambon taumata.”

⁵Napawe wua'udde i ya'u naasilo Wal᷊e Mawu su surga nawu'a, wuṛṛu Rasannu Mawu udde sulal᷊umme.

⁶See sire pitu mala'ekatta wuṛṛu pitu asasusa udde sinumabbanga wuassu Wal᷊en Ruata. Peddeti mangitou wuassu linen apan waresi wuṛṛu sussal᷊endapa. Wuṛṛu i mangitou ual᷊uṛṛen lal᷊induma sabba'a apan niola'a wuassu wul᷊awanna.

⁷Wua'udde sambau wuassu wallatu riadianna appata udde nangonggola su sire pitu mala'ekatta udde pitum bau cawanna wul᷊awanna apan napenen asasa'un Ruata, — Ruata apan wiakka saran mal᷊annu-l᷊annu.

⁸Ne Wal᷊en Ruata udde napeneten timbulla wuassu awawantuga wuṛṛu taṛṛinon Ruata. Wuṛṛu tantal᷊anna pitu asasusa apan niapiddu sire pitu mala'ekatta udde taambe nasue, tawe saran sangkatou apan botongnge maasutta sulal᷊ummu Wal᷊en Ruata.