Read Talaud SONDAPPA 17 Bible Online

SONDAPPA 17 - Talaud bible

SONDAPPA 17

¹Wua'udde sangkatou wuassu sire pitu mala'ekatta apan uaggasa cawanna pitu udde nirumanta ringangku wuṛṛu nabbisara, “Wette, i ya'u sarun manta'e si'o ereapa sumasandaga apan wahewalla udde sarun iṛṛuumanna, eteudde soa wahewalla apan niapararisikka su winggi manga sal᷊ukka.

²Manga ratun runia ma'ola'a al᷊al᷊eo ringanni tou, wuṛṛu tumana'u runia nabbal᷊i wu'anna ana waugu na'inumma anggoru sasandage.”

³See Ghaṛṛahon Ruata nangintaṛṛo si ya'u, wuṛṛu mala'ekatta udde nangapi'u watukku wadda'a. Poiaroddi ya'u naasilo sangkatou wawine ua'ianna su wowon sambau winatangnga wambul᷊une maṛṛamu uaitumma, wuṛṛu napenem boṛṛetta ringannu manga aranna aal᷊uandaga su Ruata. Winatangnga udde puane pitu wuṛṛu tatandunge mapul᷊o.

⁴Wawine udde ual᷊uṛṛen laubba ungu wuṛṛu maṛṛamu uaitumma, see lal᷊ogaṛṛanu wul᷊awanna, manga permata, wuṛṛu mutiara. Su limane i tou uaaggasa sambau mangko wul᷊awanna napenen inolaanne apan maarantina wuṛṛu lal᷊eo, hessin sasandage.

⁵Su pakkane uawoṛṛetta sambau aranna apan ia'addappinga. Aranna udde eteudde, “Babel Apan Wahewalla, inangngu manga sumasandaga wuṛṛu taumata lal᷊eo su runia.”

⁶See i ya'u naasilo manungku wawine udde niwu'annu ṛaṛṛam walahannu Ruata wuṛṛu ṛaṛṛa manga taumata apan nipate ana waugu matuṛṛuta Mawu Yesus. Su tempo i ya'u naasilo wawine udde, ya'u tinumiangnga.

⁷See mala'ekatta udde nabbisara si ya'u, “Anio i'o tinumiangnga? Mappianne i ya'u mamasingkata si'o addapingu wawine udde wuṛṛu addapingu winatangnga apan sasa'eanne, eteudde winatangnga pitu puane wuṛṛu mapul᷊o tatandunge.

⁸Winatangnga udde rorone suete nabbiakka, arawe orassa indi tate mabbiakka apia. Ete adio'a lai tou sumabbanga wuassu rampisu papate wuṛṛu inai mattudan tampam papatene. Manga taumata apan mabbiakka su runia, apan aranne tawe uawoṛṛetta sulal᷊ummu Wuken Taumata Wiakka tantal᷊anna runia taambe niriaddi sarun tumiangnga napawe maasilo winatangnga udde. Ana waugu winatanga udde rorone suete nabbiaka. Orassa indi i tou tate nabbiaka lai, arawe i tou sarun rumanta apia.

⁹Su olangnge indi ṛinone pia apande wuṛṛu pasasunna. Pua pitu udde eteudde pitu wuidda; eteudde manga wuidda tampam bawine udde ua'ianna. Wuṛṛu pitu pua udde lai, eteudde sire pitu ratu:

¹⁰sire lima wuassi mangitou nanawote, sangkatou ta'e uaparenta, wuṛṛu sangkatou lai taambe nirumanta. Amungkangu i tou rumantate, i tou tumbau mamarenta tal᷊ang kadio'a.

¹¹Wuṛṛu winatangnga apan rorone suete nabbiakka, arawe tempo indi tate nabbiakka lai; eteudde ratu aual᷊une. I tou udde sangkatou wuassu wallatu sire pitu ratu udde lai, apan orassa indi tantal᷊anna mattudan tampa apateanne.

¹²Mapul᷊o tatandu'a apan aellehanna udde, eteudde sire mapul᷊o ratu apan taambe nanattakka mamarenta. Arawe i mangitou sarun onggol᷊annu taṛṛino mamarenta maola'a sangkatou ratu su sambau ringannu winatangnga udde sulal᷊ummu sangkaorassa al᷊annune.

¹³Sire mapul᷊o ratu udde sarangkanambone pia pandumanne apan uasul᷊ungnga; i mangitou sarangkanambone nanantillu atatohassa wuṛṛu taṛṛino mangitou su winatangnga udde.

¹⁴I mangitou sarun mamangalo lumawanna Ana'u Domba udde. Arawe Ana'u Domba udde wuṛṛu mallal᷊aṛṛenggen-Ne apan matuṛṛuta apan suete niwagoan-Ne wuṛṛu nipile-Ne udde sarun mapaarugi manga ratu udde, ana waugu ete i Tou Mawun al᷊awo'u tuangnga, wuṛṛu Ratun al᷊awo'u ratu.”

¹⁵Mala'ekatta udde nabbisara lai, “Ua'e apan aellehannu udde, tampan aianannu sumasandaga udde, eteudde manga walahanna, manga tumana'u soa, manga araratuanna wuṛṛu manga wahasa.

¹⁶Mapul᷊o tatandu'a apan aellehannu udde wuṛṛu winatangnga udde sarun marantinu sumasandaga udde. I mangitou sarun mangaṛṛo al᷊awo'u sarannapa apan tatahuananne, wuṛṛu mapaatantol᷊en tou. I mangitou sarun uminassa ṛemessi tou wuṛṛu mamate si tou ringannu putungnga.

¹⁷Ana waugu Ruata suete nangal᷊ore naungngi mangitou mapaamattu pandumannu Ruata. Ruata suete na'ola'a si mangitou sangkire ipanantillu taṛṛino mangitou su winatangnga udde, tadea'u winatangnga udde mamarenta ma'oman sara matipussa apa apan suete niapaasingkatu Ruata.

¹⁸Wawine apan niasiloannu udde, eteudde soa apan wahewalla apan uaparenta manga ratu su runia.”