Read Talaud SONDAPPA 18 Bible Online

SONDAPPA 18 - Talaud bible

SONDAPPA 18

¹Napawe wua'udde i ya'u naasilo sangkatou mala'ekatta waine sinumossoka wuassu surga. I tou uatahuanna taṛṛino apan wahewalla, wuṛṛu awawantuge naaola'a ahewallu runia nabbal᷊i masemakka.

²Ringannu tingikka apan ma'ikkatta, i tou inumui, “Nanawote! Babel wahewalla nanawote! Orassa indi i tou nabbal᷊ite tampa manga setanna wuṛṛu manga ghaṛṛaho lal᷊eo. Sulal᷊umme mabbiakka al᷊awo'u hati manu'a apan lal᷊eo wuṛṛu ia'arantinu taumata.

³Ana waugu al᷊awo'u walahanna suete na'inumma anggoru apulum pasasandage. Manga ratu su runia sussandaga ringanni tou, wuṛṛu manga mabbawal᷊u'a su runia nabbal᷊i ala ringannu apulune apan tawe ia'ul᷊inna udde.”

⁴See i ya'u naaringikka tingikka waine wuassu surga nabbisara, “Sabbangke, al᷊aṛṛana-U! Sabbangke wuassu lal᷊umme! Imbaṛṛanga i yamiu tumantalongnga manga rosane, wuṛṛu tumuṛṛutta mamasanna ṛuumanne!

⁵Ana waugu rosane ua'ombo sara langitta, wuṛṛu Ruata uanaungnga al᷊al᷊eone.

⁶Ola'awe i tou su ereapa i tou suete na'ola'a si yamiu; wal᷊isete i tou paarua wuassu anambon pallal᷊agu apan suete niolangnge. Loṛṛoi mangkone ringannu ua'e inumanna apan paarua maattiṛṛana wuassu ua'e inumanna apan nasaddiate iapa'inumma si yamiu.

⁷Onggol᷊a'a si tou papaṛṛanga wuṛṛu asasusa apan anambone uasul᷊ungngu awawantuga wuṛṛu pa'a'ala apan nionggole su wadange sassane. Ana waugu i tou sidutu mabbisara su watanganne, ‘I ya'u indi ratu apan mammarenta: I ya'u wal᷊ine wawine wal᷊u; i ya'u sarun tawe mamendama asasusa!’

⁸Ana waugu ete olangnge udde, ne tumba'u sulal᷊ummu allo massallo i tou sarun maasomba silaka — radda'a, asasusa wuṛṛu al᷊aṛṛutumma. Wuṛṛu i tou sarun tutungannu putungnga, ana waugu Mawu Ruata piate taṛṛino ipakkuungngi tou udde.”

⁹Manga ratun runia apan suadio'a sulal᷊ummu inolaanne sussandaga wuṛṛu apulu naungngu wawine udde sarun lumuai wuṛṛu lumallun soa udde napawe i mangitou naasilo timbulla sussal᷊oi wuassu putungnga apan mannutungnga si tou.

¹⁰I mangitou sarun rumarisikka wuassu marau ana waugu i mangitou matta'uttu asasusane. I mangitou nabbisara, “Uare, wal᷊ine hampa silakane soa apan tinumelengke indi — soam Babel apan matohassa! Tumba'u sulal᷊ummu sangkaorassa ṛuumannu suete niapaamatta!”

¹¹Manga mabbawal᷊u'a su runia lai lulluai wuṛṛu lullal᷊o ana waugu wawine udde, ana waugu tate saran sangkatou lai apan mamalli manga sarannapa wal᷊u'anni mangitou.

¹²Tateddu mamalli wul᷊awanna, sal᷊a'a, permata, wuṛṛu mutiara mangitou; wuṛṛu lai mal᷊aṛṛenessa linen, ungu, sutera, wuṛṛu mal᷊aṛṛenessa maṛṛamu ua'itumma; alawo'u hating kalu apan mal᷊awa asombanganna, sarannapa wuassu gadinga wuṛṛu wuassu alu apan maarega, wuassu witu'a, atta'a, wuṛṛu pualam;

¹³pising kalu matemangnga, manga rampa, setanggi, mur, wuṛṛu amania; anggore wuṛṛu lana, taponna wuṛṛu gandumma; sapi wuṛṛu domba, awal᷊o wuṛṛu kereta, manga allangnga, see lai niawan taumata.

¹⁴Manga mabbal᷊u'a nabbisara su wawine udde, “Sarangkanambone apan ipa'apulunu maola'a pussaanu nawul᷊ite lai, wuṛṛu al᷊awo'u pa'a'alanu wuṛṛu araṛṛamagu nawul᷊ite. I'o tate maasomba apia!”

¹⁵Manga mabbawalu'a apan naalate ana waugu mabbal᷊u'a su soa udde sarun rumarisikka wuasu marau, ana waugu i mangitou matta'utta aṛṛinoannu asasusane. I mangitou sarun lumuai wuṛṛu lumal᷊o,

¹⁶see mabbisara, “Uare, wal᷊ine hampa silakane soa apan tinumelengke indi! Inanaramanne i tou ual᷊uṛṛem peddeta linen, mal᷊aṛṛenessa ungu wuṛṛu mal᷊aṛṛenessa maṛṛamu ua'itumma; inanaramanne i tou napenen lal᷊oggaka wul᷊awanna, permata wuṛṛu mutiara!

¹⁷Arawe tumba'u sulal᷊ummu sangka orassa, i tou niawul᷊iantem paa'alane udde!” Anambon apitenna, sumasa'ene, wuṛṛu masanaene, see anambon taumata apan manarane su tahal᷊oangnga, uarisikka wuasu marau.

¹⁸Wuṛṛu nangintul᷊i su tempo i mangitou naasilo timbula susapputta wuassu putungnga apan mannutungnga soa udde. I mangitou inumui, “Tawe saran paassa pia soa waine apan wahewalla ereindi!”

¹⁹Ne i mangitou nangalassen awu su pua mangitou maola'a tatiala lullal᷊o, see nilumuai wuṛṛu u'ui, “Uare, wal᷊ine hampa silakane soa apan wahewalla indi! Pa'a'alane suete naaola'a anambon taumata apan uatahuanna apalla su tahal᷊oangnga nabbal᷊i ala! Arawe tumba'u sulal᷊ummu sangkaorassa, i tou inawul᷊ianten al᷊awo'u sarannapa!”

²⁰Ei surga, lala'e ana waugu aṛṛaṛṛimunsa'u soa udde! Ei, al᷊aṛṛana'u Ruata, manga rasul, manga nabi, lala'e! Ana waugu Ruata suete naṛṛuumanni tou maola'a sambau bawal᷊issu sarangkanambone apan niola'i mangitou si yamiu!

²¹Napawe wua'udde, sangkatou mala'ekatta apan matohassa namengketa sambau watu — ere ahewallu watung gahilinganna apan wahewalla — see tinuntunga watukku tahal᷊oangnga lapiddu nabbisara, “Arendi olangnge soam Babel apan tinumelengke udde sarun iramme ringannu ma'ikkatta ma'oman sara tate asombanganna apia.

²²Tingikku musikka wuassu mananalangnga kecapi, wuassu manga taṛṛa antari, wuassu manalangnga wansi wuṛṛu wuassu mananiuppa trompeta, tate lai iaringikka wuassu lal᷊ummu soam Babel! Tate lai asombanganna sangkatou mammamanara apandeanne isudde, wuṛṛu tingikku watung gahilinganna lai tate aringiṛṛana.

²³Taumata tate lai maasilo semakku sol᷊o sulal᷊ummu soa; wuṛṛu tate aringiṛṛana lai ramea andeangngu awingnga isudde. Manga mabbawal᷊u'i yamiu eteudde manga taumata apan tinumelengke su runia, wuṛṛu ringannu manga apandem wal᷊i'immatanu i'o mangngawusu alawo'u walahanna su runia!”

²⁴Babel niṛṛuumanna ana waugu sulal᷊ummu soa udde suete niasombanganna ṛaṛṛa manga nabi, ṛaṛṛa manga al᷊aṛṛana'u Ruata — aunne ṛaṛṛan anambon taumata apan suete nipate su wowon runia indi.