Read Talaud SONDAPPA 2 Bible Online

SONDAPPA 2 - Talaud bible

SONDAPPA 2

¹“Su mala'ekattu jamaatta su Efesus, woṛṛetta'a arendi: Ete indi tanata wuassi Tou apan uaagassa anumpitanna pitu su lima uanan-Ne, wuṛṛu u'amatta su wallatu pitu leddan sol᷊o wul᷊awanna udde.

²I Ya'u masingkatu apa apan a'olaanni yamiu: I yamiu mammanara maṛṛimadda wuṛṛu yamiu matammuda atonna. I Ya'u masingkata manungku i yamiu tawe mangonggolu naungnga su taumata lal᷊eo. Wuṛṛu manga taumata mangnga'u watanganne rasul, wutte'e wal᷊ine, suete niannamanni yamiu wuṛṛu niasombanganni yamiu, manungku i mangitou taṛṛa awusu.

³I yamiu masabare wuṛṛu i yamiu uatataṛṛanga ana waugu i Ya'u, wuṛṛu naungngi yamiu tawe maadio'a.

⁴Arawe indi sasimba-U si yamiu: I yamiu tate mandangngu si Ya'u ere rorone.

⁵Ana waugu udde, paanaungete tumaniten marau i yamiu nanawo! Awal᷊ute wuassu manga rosanu, wuṛṛu pa'ola'e ere inolaanni yamiu rorone. Amungkangu tawe, ne i Ya'u sarun rumanta ringanni yamiu wuṛṛu manawutta leddan sol᷊onu udde wuassu tampane.

⁶Arawe pia sambau apapia si yamiu, eteudde: I yamiu maddantinu pallal᷊agu mallal᷊aṛṛenggenni Nikolaus apan iaaranting-Ku lai.

⁷Isai-sai apan ma'aringikka, ṛinone manutukka apa apan iapaasingkatu Ghaṛṛahon Ruata su manga jamaatta! I mangitou apan naauntunga, sarun Ta'u iwala umanna wua wuassu punnu pabbawiakka apan tuttuwo su Waillu Ruata.”

⁸“Su mala'ekattu jamaatta su Smirna, woṛṛetta'a arendi: Ete indi tanata wuassi Tou apan paarorone wuṛṛu pangudusanne — apan natete wuṛṛu nabbiakka apia.

⁹I Ya'u masingkatu manga asasusanu; i Ya'u masingkata i yamiu asiangnga arawe wutte'e yamiu ala! I Ya'u masingkatu manga aal᷊uandaga apan ipangal᷊uandaga si yamiu wuassu manga taumata apan mangnga'u ririne Yahudi, wutte'e wal᷊ine; ete i mangitou udde walahannu Setanna!

¹⁰Arie matta'uttu asasusa apan tate mal᷊annu lai apendamanni yamiu. Paanaunge, Setanna sarun mantaṛṛon sangkawageanganna wuassi yamiu sulal᷊ummu tuttupanna, ana waugu ipamono'a si yamiu. I yamiu sarun matataṛṛanga mapul᷊o allo al᷊annune. Ṛinone i yamiu matuṛṛuta si Ya'u ma'oman sara mate, ne i Ya'u sarun mangonggola si yamiu wiakka tutune wuṛṛu saran mal᷊annu-l᷊annu apan maola'a sambau lal᷊antaku naauntunga.

¹¹Isai-sai apan botongnge maaringikka, ṛinone manutukka apa apan iapaasingkatu Ghaṛṛaho Ruata su manga jamaatta. I mangitou apan naauntunga, saran paassa tawe matataṛṛanga papate aruane.”

¹²“Su mala'ekattu jamaatta su Pergamus, woṛṛetta'a arendi: Ete indi tanata wuassi Tou apan uaagasa hal᷊ele maṛṛoro apan ṛorone ruam ba'a.

¹³I Ya'u masingkata suapa i yamiu uatana'a, eteudde su araratuannu Setanna. I yamiu matuṛṛuta si Ya'u. Ewe'e su tempo i Antipas, matatiala-U apan matuṛṛuta udde, nipate su saruannu su tampan Setanna, i yamiu tawe naddandila manungku i yamiu mangngimanna si Ya'u.

¹⁴Salaiwe aroddi pia manga pira inolaani yamiu apan tawe maal᷊uassa si Ya'u: Pia sangkadoanna taumata su wallatti yamiu apan mangngimanna al᷊aṛṛa'i Bileam. I Bileam nangaṛṛa'a si Balak ereapa mangema'u taumatan Israel su rosa; ringannu nassal᷊o'i mangitou umanna anna apan suete nionggolla su paal᷊uanna wuṛṛu ma'inolaanna sussandaga.

¹⁵Aroddi lai su wallatti yamiu pia manga taumata apan uaaggasa al᷊aṛṛa'u manga mallal᷊aṛṛenggenni Nikolaus.

¹⁶Ana waugu udde, awal᷊ute wuassu manga rosanu! Amungkangu tawe, tate mal᷊annu lai Ya'u sarun rumanta ringanni yamiu wuṛṛu mamangalo manga taumata udde ringannu hal᷊ele apan uaraddo su moṛṛong-Ku.

¹⁷Isai-sai apan maaringikka, ṛinone manutukka apa apan iapaasingkatu Ghaṛṛahon Ruata su manga jamaatta! I mangitou apan naauntunga, sarun Ta'u iwala umanna manna apan uawuni, wuṛṛu sambau-sambau sarun manengkama wuassia'u sambau watu mawira. Su watu udde uawoṛṛetta sambau aranna wakku, apan awagananni sai-sai, tumba'u taumata apan nanengkamma.”

¹⁸“Su mala'ekattu jamaatta su Tiatira, woṛṛetta'a arendi: Ete indi tanata wuassu Ana'u Ruata, apan mata-Ne lukkenggama naal᷊ihida putungnga, wuṛṛu ledda-Ne lukkena naal᷊ihidda witu'a nitambuna.

¹⁹I Ya'u masingkatu anambon apa apan a'olaanni yamiu — I Ya'u masingkata i yamiu mandangngu sansul᷊ungngu, yamiu matuṛṛuta, i yamiu mammanara, wuṛṛu i yamiu maaddana matataṛṛanga. I Ya'u masingkata i yamiu orassa indi mammanara mannamboanna wuassu paarorone.

²⁰Arawe indi sasimba-U si yamiu: I yamiu nangonggolu naungnga si Izebel, wawine apan mangnga'u watanganne daroloṛṛannu Ruata udde. Manambote manga allang-Ku niawusuanne wuṛṛu niaṛṛaanna sussandaga wuṛṛu u'anna anna apan suete pinassubba paal᷊uanna.

²¹Suete Ta'u nionggol᷊annu tempone i tou mawal᷊u wuassu manga rosane, arawe i tou maddiri mamallosu inolaanne sussandaga udde.

²²Paanaungete! I Ya'u sarun mangema'i tou ma'oman sara mataddu'a su tampa atatiil᷊anne. Isudde i tou wuṛṛu manga taumata apan sussandaga ringanni tou sarun matataṛṛanga atonna. Sarangkanambone udde Ta'u olaanna orassa indi — tabbene'e amungkangu i mangitou mangado manga inolaanna apan lal᷊eo su sambau ringanni tou.

²³Manga mallal᷊aṛṛenggenne sarun Ta'u pateanna lai tadea'u anambon jamaatta maatutukka manungku ete i Ya'u, i Tou apan masingkatu ṛingiranna wuṛṛu naungngu taumata. I yamiu sarun Ta'u wal᷊isanna tumuṛṛuttu inolaannu sangkatou-sangkatou.

²⁴Arawe i yamiu waine su Tiatira apan maddiri tumuṛṛutta al᷊aṛṛa'a lal᷊eo udde, wuṛṛu maddiri mangurumma al᷊aṛṛa'u Setanna. I Ya'u mabbisara manungku i Ya'u tawe manamba winabbawanu apan mawakkata.

²⁵Arawe ma'oman sara i Ya'u rumanta apia, ṛinone i yamiu sidutu tuttuṛṛuta apa apan suete niatahuananni yamiu.

²⁶I mangitou apan naauntunga, wuṛṛu saran pangudusanne ma'ola'a apa ipaapulu-U, sarun Ta'u onggol᷊annu taṛṛino apan uasul᷊ungnga ere Ta'u sinengkama wuassu Iamang-Ku. I mangitou sarun manengkama taṛṛino wuassia-U ipamarenta manga walahanna ringannu ta'inna atta'a, wuṛṛu ipakkimunsa'a manga walahanna udde ere urinna leta'a.

²⁸I mangitou sarun manengkama anumpitannu aṛṛusuallo wuassia-U.

²⁹Isai-sai wotongnge maaringikka ṛinone manutukka apa apan iwabbisara Ghaṛṛahon Ruata su manga jamaatta!”