Read Talaud SONDAPPA 3 Bible Online

SONDAPPA 3 - Talaud bible

SONDAPPA 3

¹“Su mala'ekattu jamaatta su Sardis, woṛṛetta'a arendi: Ete indi tanata wuassi Tou apan uatahuanna pitu ghaṛṛaho wuassu Ruata wuṛṛu anumpitanna pitu udde. I Ya'u masingkata apa apan a'olaanni yamiu. Unni Tou i yamiu wiakka, wutte'e nate!

²Ana waugu udde apu'ote, wuṛṛu panohasse apa apan ta'e pia si yamiu tantal᷊anna udde taambe nate abbi. Ana waugu i Ya'u naaratingnga manungku inolaanni yamiu, taambe saran sambau apan nasuungnga su saruannu Ruata.

³Nariaddi, naungete apia-apa apan suete niaṛṛa'a si yamiu rorone wuṛṛu apa apan suete niaringiṛṛani yamiu. Ola'e udde wuṛṛu awal᷊ute wuassu manga rosanu. Amungkangu i yamiu tawe maatimpu'o, i Ya'u sarun rumanta ringanni yamiu ere sangkatou taṛṛa ta'o; wuṛṛu i yamiu wagga tingngerate tempone i Ya'u rumanta.

⁴Arawe su pattangngani yamiu su Sardis ta'e pia taumata uariaga tadea'u laungnge sidutu waresi. I mangitou udde sarun umamatta suadio'a ringang-Ku ringaannu uapedettu mawira, ana waugu i mangitou su ṛinone mappaattu udde.

⁵Si mangitou apan naauntunga sarun luṛṛeannu jubah mawira. Aranni mangitou tawe Ta'u pappasanna wuassu Wuken Taumata Wiakka. Wuṛṛu su saruannu Iamang-Ku wuṛṛu manga mala'ekan-Ne i Ya'u sarun manga'u manungku i mangitou udde pussa'a-U.

⁶Isai-sai wotongnge maaringikka, ṛinone manutukka apa apan niapaasingkatu Ghaṛṛahon Ruata su manga jamaatta!”

⁷“Su mala'ekattu jamaatta su Filadelfia, woṛṛetta'a arendi: Ete indi tanata wuassi Tou apan susi wuṛṛu tutune. Ete i Tou uaaggasa a'unsi apan tatahuananni Daud; amungkangu i Tou mamu'a, tawe saran sangkatou wotongnge maaṛṛu'uda, wuṛṛu amungkangu i Tou maṛṛuuda, tawe saran sangkatou wotongnge maawu'a.

⁸I Ya'u masingkatu apa a'olaanni yamiu. I Ya'u masingkata manungku i yamiu tawe tumaniten matohassa; i yamiu suete tinumuṛṛuta al᷊aṛṛa-U wuṛṛu matuṛṛuta si Ya'u. Si yamiu suete Ta'u niwu'a sambau ngara, apan tawe iaṛṛu'udi sai-sai lai.

⁹Naungete indi: Manga taumata apan naola'a walahannu Setanna udde, manga taṛṛa awusu apan mangnga'u watanganne Yahudi wutte'e wal᷊ine, sarun Ta'u olaanna ma'oman sara i mangitou rumanta umal᷊intudda su saruannu. Wuṛṛu i mangitou sarun maasingkata manungku i Ya'u marangngu si yamiu.

¹⁰Ana waugu i yamiu suete tinumuṛṛuta parenta-U tadea'u mangngimanna, i Ya'u lai sarun manillumma si yamiu wuassu tempon asasusa apan sarun mariaddi su ahewallu runia. Olangnge udde sarun mariaddi ipamono'a anambon taumata su runia.

¹¹I Ya'u mal᷊ihakke rumanta! Paariagai paapia-pia apa apan tatahuananni yamiu, tadea'u tawe saran sangkatou mangaṛṛo lal᷊antaku auntungannu.

¹²Taumata apan naa'untunga, sarun Ta'u olaanna ere sambau diṛṛi sulal᷊ummu Wal᷊e Susi Ruata-U, wuṛṛu i tou sarun matana'a su tampa udde saran mal᷊annu-l᷊annu. Arannu Ruata-U, wuṛṛu arannu soan Ruata-U — eteudde Yerusalem wakku apan sarun umonto'a wuassu surga, wuassu Ruata-U — sarun Ta'u iwoṛṛeta su wadangu taumata udde. Wuṛṛu lai arang-Ku apan wakku sarun Ta'u iwoṛṛeta su waddange.

¹³Isai-sai wotongnge maaringikka, ṛinone manutukka apa apan niapa'asingkatu Ghaṛṛahon Ruata su manga jamaatta!”

¹⁴“Su mala'ekattu jamaatta su Laodikia, woṛṛetta'a arendi: Ete indi tanata wuassu Awantuhanne Amin, Mattatiala apan matammuda wuṛṛu naṛṛino, punnu al᷊awo'u sarannapa apan niola'u Ruata.

¹⁵I Ya'u masingkatu apa a'olaanni yamiu; i Ya'u masingkata i yamiu tawe masunge wuṛṛu lai tawe lai mal᷊oso. Ṛinone i yamiu sambau su wallatu darua udde!

¹⁶Arawe i yamiu ma'ihamma; tawe mal᷊oso, tawe lai masunge. Ana waugu udde i yamiu sarun Ta'u imuta iapaasabanga wuassu lal᷊ummu moṛṛong-Ku.

¹⁷I yamiu mabbisara, ‘I yami ala wuṛṛu al᷊awo'a mangke pia; i yami tawe urangnge apa-apa.’ Arawe i yamiu wagga aroddi aasiangnge wuṛṛu aroddi maasusa ririnu! I yamiu asiangnga, tantol᷊e wuṛṛu wuta.

¹⁸Ana waugu udde i Ya'u manantiro si yamiu tadea'u mamalli wul᷊awanna wuassia-U, eteudde wul᷊awanna apan apianne, tadea'u i yamiu maola'a ala. Pamallite lai laubba mawira wuassia-U tadea'u i yamiu pia peddeta wuṛṛu ipami'unte wadangi yamiu apan tantol᷊e wuṛṛu ma'asili. Wuṛṛu pamallite lai undama ipamuṛṛa matanu tadea'u i yamiu wotongnge maasilo.

¹⁹Manga taumata apan arangnguang-Ku, ete i mangitou apan Ta'u tagguanna wuṛṛu wabbal᷊anna. Ana waugu udde ṛinone i yamiu maṛṛimadda mammanara, wuṛṛu awal᷊ute wuassu manga rosanu.

²⁰Pa'ellega! I Ya'u uarisikka su saruannu ngara wuṛṛu manengkela. Amungkangu pia taumata apan naaringikka tingi-U, wuṛṛu namu'a ngara, i Ya'u sarun sumutta maisasomban tou; i Ya'u sarun umanna suadio'a ringanni tou wuṛṛu i tou umanna suadio'a ringang-Ku.

²¹I mangitou apan naauntunga, sarun Ta'u iwala uma'ianna su adderan araratuang-Ku su sambau ringang-Ku, ere i Ya'u sassane lai suete na'auntunga wuṛṛu orassa indi ua'ianna suadio'a ringannu Iamang-Ku su adderan araratuan-Ne.

²²Isai-sai wotongnge maaringikka, ṛinone manutukka apa apan niapaasingkatu Ghaṛṛahon Ruata su manga jamaatta!”