Read Talaud SONDAPPA 4 Bible Online

SONDAPPA 4 - Talaud bible

SONDAPPA 4

¹Wua'udde ya'u naasomba aellega lai. I ya'u naasilo sambau ngara nawu'a su surga. Wua'udde inaringikka lai tingikka apan paarorone suete nabbisara si ya'u ere tingikku trompeta. Tingikka udde nabbisara, “Wette rangante isindi. I Ya'u sarun mamasingkata si'o apa apan sarun mariaddi murine.”

²I ya'u lapiddu niintaṛṛoannu Ghaṛṛahon Ruata. See i ya'u naasilo su surga pia sambau adderan araratuanna, wuṛṛu pia sangkatou ua'ianna su adderan araratuanna udde.

³Hatin taumata udde lullansiangnga naal᷊ihidda permata baiduri pandan wuṛṛu permata delima. Sambau randipakka ere zamrud uapal᷊iwutta adderan araratuanna udde.

⁴Sulal᷊ummu atokke mal᷊imbulunna apan uapal᷊iwutta adderan araratuanna udde, pia ruam pul᷊o appata adderan araratuanna waine. Isudde ua'ianna ruam pul᷊o appata piaṛṛange apan uapedettu mawira, wuṛṛu ual᷊uṛṛen araposa wul᷊awanna.

⁵Wuassu adderan araratuanna udde lukkena semakku sawallo wuṛṛu sinumabanga tingikku rallu'a mappose. Wuṛṛu su saruannu adderan araratuanna udde pia pitu sol᷊o lukkenggama; eteudde pitu Ghaṛṛaho Ruata.

⁶Pia lai isudde su saruannu adderan araratuanna sambau apan aellehanna ere tahal᷊oangnga kaca, matilangnga ere kristal. Uapal᷊iwutta adderan araratuanna, suapan sandiṛṛane, pia appata riadianna, apan su saruanne wuṛṛu su liudde napene mata.

⁷Riadianna paarorone aellehanna naal᷊ihida singa, aruane naal᷊ihida sapi esakka. Atallune hatine naal᷊ihida hatin taumata. Aiappane aellehanna naal᷊ihida manu'a rajawali tantal᷊anna tuttalla'a.

⁸Siri appata riadianna udde, sambau-sambau pia papaidde annuma, wuṛṛu su ahewallu wadange, wuṛṛu sulal᷊umme napene mata. Allo ṛabbi manga riadianna udde tawe illol᷊one mangngantari, “Susi, susi, susi arannu Mawu, Ruata Lembon Taṛṛino; apan nirumanta, suete nirumanta, wuṛṛu nirumantate sarangkal᷊o'engnge.”

⁹Siri appata riadianna udde mangngantari antarin daralo, addata wuṛṛu a'adiangkamanna si Tou apan ua'ianna su adderan araratuanna udde, eteudde i Tou apan wiakka saran mal᷊annu-l᷊annu. Wuṛṛu su tempo manga riadianna udde mangngantari,

¹⁰sire ruam pul᷊o appata piaṛṛange udde uaaruutta su saruannu taumata apan ua'ianna su adderan araratuanna udde, see massubba si Tou apan wiakka saran mal᷊annu-l᷊annu. Wua'udde i mangitou nanuntungngu manga araposan araratuanni mangitou su saruannu adderan araratuanna udde lapiddu nabbisara,

¹¹“O Mawu, O Ruatang kami! Tumba'u I'o sassane apan wotongnge manengkama daralo, addata wuṛṛu taṛṛino. Ana waugu ete I'o apan na'ola'a sarangkanambone, wuṛṛu wuassu apulu-Nu lai sarangkanambone udde suete nariaddi wuṛṛu wiakka.”