Read Talaud SONDAPPA 6 Bible Online

SONDAPPA 6 - Talaud bible

SONDAPPA 6

¹Wua'udde i ya'u naasilo Ana'u Domba udde namesangnga segele paarorone su wallatu segele pitu udde. See ya'u naaringikka sambau su wallatu riadianna udde nabbisara, “Wette!” Tingikke naal᷊ihidda ere tingikku rallu'a.

²Ne i ya'u naasilo, see niasiloanna sambau awal᷊o mawira. Sumasa'ene uaaggasa sambau anaanna wuṛṛu i tou nionggol᷊annu sambau mahkota. I tou u'amatta ere sangkatou apan naauntunga inai mangaṛṛo auntunganna.

³Wua'udde Ana'u Domba udde namesangnga segele aruane, wuṛṛu ya'u naaringikka riadianna aruane nabbisara, “Wette!”

⁴See awal᷊o waine sinumabanga lai. Awal᷊o udde maṛṛamu wambul᷊une. Sumasa'ene nionggol᷊annu taṛṛino ipammul᷊im paddarame su wowon runia, tadea'u taumata mapapate. Ne i tou nionggol᷊annu hal᷊ele wahewa sammata.

⁵See Ana'u Domba udde namesangnga segele atallune. Wuṛṛu i ya'u naaringikka riadianna atallune nabbisara, “Wette!” I ya'u na'ellega, ne niasiloangku sambau awal᷊o ma'itumma sumasa'ene uaaggasa sampare tatimbanganna su limane.

⁶Wuṛṛu i ya'u naaringikka sambau apan niaringiṛṛana ere tingikka apan u'ui wuassu pattangngannu sire appata riadianna udde. Tingikka udde nabbisara, “Salliteṛṛe gandumma apan mapia, aregan lal᷊antaku allo massallo, wuṛṛu tallun liteṛṛe gandumma paṛṛalane aregane ere lal᷊antaku allo massallo lai. Arawe imbaṛṛanga mandal᷊eo manga alun Zaitun wuṛṛu waillu anggore!”

⁷Wua'udde Ana'u Domba udde namesangnga segele aiappane. Wuṛṛu i ya'u naaringikka riadianna aippane nabbisara, “Wette!”

⁸I ya'u na'ellega, see niasiloangku sambau awal᷊o hatine namillosa. Sumasa'ene aranne Papate. Wuassu liudde, i tou tatantalongannu Runiam Papate marani-rani. Taṛṛino su wageangnge aiappane su runia indi tinantilla si mangitou, tadea'u i mangitou wotongnge mamate sulal᷊ummu pangalo, sulal᷊ummu ṛutumma, ara'e al᷊aṛṛusa'itta wuṛṛu wuassu manga winatangnga mal᷊aṛṛaga.

⁹Wua'udde Ana'u Domba udde namesangnga segele al᷊imane. Ne i ya'u naasilo su al᷊ungngu meddan sasamba pia ṛimuuddu manga taumata nate nipate ana waugu mannohassa tanatan Ruata sulal᷊ummu tiala mangitou.

¹⁰I mangitou u'ui ringannu tingikki mangitou apan ma'ikkatta, “Oh Mawu Lembon Taṛṛino, apan susi wuṛṛu naṛṛino! Pirang katempo lai al᷊annune I'o mamarikissa lal᷊oṛṛon runia wuṛṛu maṛṛuumanni mangitou ana waugu suete namate si yami?”

¹¹I mangitou sangkatou-sangkatou nionggol᷊annu jubah mawira sambau. See i mangitou nirolokka niapaillol᷊o tal᷊ang kadio'a lai, ma'oman sara masuungnga reengannu manga hawe sangkamanaranna wuṛṛu manga tuṛṛangi mangitou apan sarun pateanna lai ere i mangitou.

¹²See i ya'u naasilo Ana'u Domba udde namesangnga segele aiannume. Nariaddite linukka apan masaddata. Matannallo nabbal᷊i ma'itumma ere mal᷊aṛṛenessa ma'itumma hal᷊agga, wuṛṛu wul᷊anna nabbal᷊i maṛṛamu ere ṛaṛṛa.

¹³Manga anumpitanna mannawo wuassu langitta su wowon runia naal᷊ihidda wuang kalu ara apan taambe nal᷊aha napul᷊idda wuassu alune su tempo niio'u anginna ma'ikkatta.

¹⁴Langitta nawul᷊i naal᷊ihidda ere suratta nilul᷊unna, wuṛṛu anambon bowone wuṛṛu manga taṛṛanusa niingkata wuassu tampane.

¹⁵See manga ratun dunia, manga tembonanne, manga tembonannu tantara, manga taumata ala wuṛṛu taumata pia taṛṛino, wuṛṛu manga taumata waine lai, mapia allangnga ara'e tawe allangnga, sarangkanambone na'imbunim batanganne sulal᷊ummu manga liangnga ara'e su wallatu watu su wowone.

¹⁶Su manga wowone wuṛṛu su manga watu udde, i mangitou u'ui, “Aema'e si yami! Wunia'awe i yami wuassu aellegi Tou apan ua'ianna su adderan araratuanna, wuṛṛu wuassu asasa'un Ana'u Domba udde!

¹⁷Allo ma'asansara nirumantate, orassa indi i mangitou napaasabangu asasa'un mangitou, wuṛṛu tawe saran sangkatou apan wotongnge sumaruanna si mangitou!”