Read Talaud SONDAPPA 7 Bible Online

SONDAPPA 7 - Talaud bible

SONDAPPA 7

¹Wua'udde, i ya'u naasilo sire appata mala'ekatta uarisikka su appata pabbuuannu runia. I mangitou mannaṛṛanga anginna appata su runia tadea'u tawe anginna apan tumiuppa su ammaranne, ara'e su tahal᷊oangnga, ara'e su manga aaluanna.

²See i ya'u naasilo sangkatou mala'ekatta waine nilumapputa wuassu samba'an ra'i. I tou uaapiddu segele wuassu Ruata apan biakka. Ringannu tingikka ma'ikkatta mala'ekatta udde namaggo sire appata mala'ekatta apan suete naasomba taṛṛino Ruata ipanggohakku ammaranne wuṛṛu tahal᷊oangnga.

³Mala'ekatta udde nabbisara, “Paal᷊iwue'o manggohakku ammaranne ara'e tahal᷊oangnga, ara'e manga aaluanna amungkangu yami taambe nangonggolu tatiala segele su pakkanu manga allangngu Ruatang kite.”

⁴See i ya'u niwal᷊oanna manungku reenganne 144.000 su atoune apan nionggol᷊annu tatialan segelu Ruata su pakkani mangitou. Manga taumata udde nianu wuassu sire mapul᷊o dua walahannu Israel;

⁵wuassu walahanna sambau, 12.000 su atoune. Eteudde wuassu walahanni: Yehuda, i Ruben, i Gad,

⁶i Asyer, i Naftali, i Manasye,

⁷i Simeon, i Lewi, i Isakhar,

⁸i Zebulon, i Yusuf wuṛṛu i Benyamin.

⁹Wua'udde i ya'u na'ellega apia, see niasiloanna taumata tumanite manambo — tawe saran sangkatou taumata apan wotongnge maareengngu anambone. I mangitou udde manga taumata wuassu al᷊awo'u walahanna, ṛuanganna, araratuanna, wuṛṛu wahasa. Ringannu uapeddetu jubah mawira-wira wuṛṛu ringannu uaaggasa manga rannang kalu palem su limane, manga taumata manambo udde dirumarisikka sinumaruanna adderan araratuanna wuṛṛu sinumaruanna Ana'u Domba udde.

¹⁰See ringannu tingikka ma'ikkatta i mangitou u'ui, “Asasal᷊amatti ite darantane wuassu Ruatang kite, apan ua'ianna su adderan araratuanna, wuṛṛu wuassu Ana'u Domba udde!”

¹¹Anambon mala'ekatta uarisikka uapal᷊iwutta adderan araratuanna wuṛṛu manga piaṛṛange see sire appata riadianna udde. Manga mala'ekatta udde uaruutta su saruannu adderan araratuanna see nassubba Ruata.

¹²I mangitou u'ui, “Amin! Dalo su Ruatang kite apan mawantuga wuṛṛu pande. I Tou ṛinone onggol᷊annu al᷊awo'u aadiangkamanna wuṛṛu addata. I Tou uataṛṛino wuṛṛu matohassa saran mal᷊annu-l᷊annu! Amin.”

¹³Sangkatou wuassu wallatu manga piaṛṛange udde naiwal᷊o si ya'u, “Manga taumata apan ual᷊uṛṛen juba mawira indi, isai i mangitou wuṛṛu wuassuapa i mangitou nirumanta?”

¹⁴“I ya'u wagga Tuangnga. I Tuangnga sassane masingkata,” sasimba'u. Ne i tou nabbisara si ya'u, “Ete indi manga taumata apan suete ringannu sal᷊amatta naralukka wuassu pananansara apan wahewalla. I mangitou suete nabbansala jubah mangitou wuṛṛu niola'i mangitou nabbal᷊i mawira ringannu ṛaṛṛan Ana'u Domba udde.

¹⁵Ana waugu udde i mangitou uarisikka su saruannu adderan araratuannu Ruata, wuṛṛu mattaṛṛamawu si Tou allo ṛabbi su Wal᷊e Mawu. Wuṛṛu i Tou apan ua'ianna su adderan araratuanna udde sarun masemodda ringanni mangitou wuṛṛu manirungnga si mangitou.

¹⁶I mangitou tate maapendama mal᷊unussa ara'e marou; matannallo ara'e paddisa mapal᷊atta tate maal᷊oso si mangitou,

¹⁷ana waugu Ana'u Domba apan ua'ianna su pattangngannu adderan araratuanna udde sarun maola'a mallal᷊u'addi mangitou. I Tou sarun mangehetta si mangitou watukku al᷊imatan ua'em pabbawiakka. Wuṛṛu Ruata sarun mamedda al᷊awo'u allo mata wuassu mata mangitou.”