Read Talaud SONDAPPA 8 Bible Online

SONDAPPA 8 - Talaud bible

SONDAPPA 8

¹Napawe Ana'u Domba udde namesangnga segele appitune, surga nabbal᷊i mal᷊annaba, al᷊annune iraṛṛangngo setengang ka'orassa.

²See i ya'u naasilo sire pitu mala'ekatta uarisikka su saruannu Ruata, wuṛṛu i mangitou nionggol᷊annu pitum bua trompeta.

³Sangkatou mala'ekatta waine, apan uaapiddu sambau pananutunganna amania wul᷊awanna, nirumanta wuṛṛu dirumarisikka su saruannu meddan sasamba. Si tou nionggol᷊annu manambo amania ipanguntudu manga aal᷊iomannu anambon walahannu Ruata wuṛṛu iaddo su meddan sasamba wul᷊awanna apan uaraddo su saruannu adderan araratuanna.

⁴Su sambau ringannu manga aal᷊iomannu walahannu Ruata, timbbulu dupa apan luṛṛenggama udde tuttimbula madduitta wuassu lima mala'ekatta apan uarisikka su saruannu Ruata udde.

⁵Wua'udde mala'ekatta nanganu pananutunganna amania udde, wuṛṛu niloṛṛoantem putungnga wuassu meddan sasamba, see tinuntunga su wowon dunia. Ne rallu'a naposete wuṛṛu sawallo ma'ilatte, wuṛṛu nariaddite linukka.

⁶Napawe wua'udde, sire pitu mala'ekatta apan uaaggasa trompeta udde uasasaddiate mattiuppa.

⁷Mala'ekatta paarorone nattiuppe trompeti tou, ne uranna eisse wuṛṛu putungnga lal᷊o'annu ṛaṛṛa nangansala su runia. Sepertiga wuassu runia nasue natutungnga; aroddi lai sepertiga wuassu manga aaluanna, wuṛṛu al᷊awo'u nannal᷊o apan ma'elomma.

⁸See mala'ekatta aruane nattiuppa trompeti tou, ne sambau apan tumanitem bahewalla niasiloanna naal᷊ihidda wowone apan lukkenggama niwontola su tahal᷊oangnga. See sepertiga wuassu tahal᷊oangnga, nawal᷊u nabbal᷊i ṛaṛṛa,

⁹wuṛṛu natete lai sepertiga wuassu al᷊awo'u winatangnga su tahal᷊oangnga; aroddi lai naṛṛimunsa'a sepertiga wuassu manga apalla.

¹⁰Wua'udde mala'ekatta atallune nattiuppa trompeti tou, ne sambau anumpitanna apan wahewalla, lukkenggama ere sol᷊o, nanawo wuassu langitta, see nema'a su sepertiga wuassu manga sal᷊ukka wuṛṛu al᷊imatan ua'e.

¹¹(Arannu anumpitanna udde “Mapetta”.) Ne sepertiga wuassu ua'e nabbal᷊i mapetta, wuṛṛu natete lai anambon taumata ana waugu na'inumma ua'e apan nabbal᷊i mapetta udde.

¹²See mala'ekatta aiappane nattiuppa trompeti tou. Ne niapuulle sepertiga wuassu matannallo, sepertiga wuassu wul᷊anna, wuṛṛu sepertiga wuassu manga anumpitanna, na'oman sara nawul᷊ite sepertiga wuassu semakki mangitou. Wuṛṛu lai sepertiga wuassu allo tawe maasemakka wuṛṛu aroddi lai sepertiga wuassu ṛabbi.

¹³Ana see i ya'u na'ellega, ne i ya'u naaringikka sambau manu'a rajawali tantal᷊anna tuttalla'a matanggakka su winalanganna, u'ui, “Silaka! Silaka! Nasilakate anambon taumata su runia napawe niaringiṛṛante sire tallu mala'ekatta waine apan mattiuppa trompenne murine!”