Read Talaud SONDAPPA 9 Bible Online

SONDAPPA 9 - Talaud bible

SONDAPPA 9

¹See mala'ekatta al᷊imane nattiuppa trompeti tou, wuṛṛu i ya'u naasilo sambau anumpitanna nanawo wuassu langitta su wowon runia.

²Anumpitanna udde nionggol᷊annu a'unsin rampisu papate. Ne anumpitanna udde namu'a rampisu papate udde, see timbula sinumabbanga wuassu lal᷊umme ere timbula wuassu sunggila apan wahewalla. Matannallo wuṛṛu winalanganna nabbal᷊i maranduma ana waugu timbula wuassu rampisa udde.

³See wuassu lal᷊ummu timbula udde sinumabbangke manga saṛṛappalanna apan sinumossoka watukku runia. Manga saṛṛappalanna udde nionggol᷊annu taṛṛino apan uasul᷊ungnga ere lai nionggolla su kalajengking.

⁴I mangitou isassingadda umanna nannal᷊o, ara'e aaluanna ara'e manga sinuananna waine. I mangitou tumba'u wotongnge mangenggena manga taumata apan su pakkane tawe segele wuassu Ruata.

⁵Manga saṛṛappalanna udde tawe wotongnge mamate manga taumata udde, ewe'e tumba'u manansara si mangitou lima wul᷊anna al᷊annune. Taddu'a apan ni'uittu manga saṛṛappalanna udde naal᷊ihidda taddu'a ni'uittu kalajengking.

⁶Al᷊annune lima wul᷊anna udde, manga taumata maddea'a tadea'u mate, arawe i mangitou tawe mate; i mangitou ma'apulu mate arawe papate marau wuassi mangitou.

⁷Awa'u saṛṛappalanna udde naal᷊ihidda awal᷊o apan uasaddia inai mappangalo. Su pua mangitou aellehanna pia sambau naal᷊ihidda araposan aratuanna wul᷊awanna. Hati mangitou naal᷊ihidda hatin taumata.

⁸Uta'i mangitou naal᷊ihidda uta'u wawine, wuṛṛu isi mangitou naal᷊ihidda isin singa.

⁹Sabba'i mangitou lal᷊indumannu sambau sarannapa naal᷊ihidda laubba atta'a. Tingikku papaiddi mangitou naal᷊ihidda ammul᷊annu roda wawol᷊engannu awal᷊o apan tantal᷊anna inai mapapangalo.

¹⁰I mangitou pia tol᷊ene wuṛṛu pia a'uinne naal᷊ihidda kalajengking. Wuṛṛu sulal᷊ummu tol᷊e mangitou udde pia atatohassi mangitou ipanansara taumata al᷊annune lima wul᷊anna.

¹¹I mangitou pia ratu apan uaparenta si mangitou, wuṛṛu ratu udde eteudde mala'ekatta apan uatahuanna rampisu papate. Aranne sulal᷊ummu wisaran Ibrani Abadon; wuṛṛu sulal᷊ummu wisaran Yunani Apolion (atappasanne “Manggahohakka”).

¹²Silaka apan paarorone nal᷊iute. Nasue udde pia darua lai silaka apan sarun dumanta.

¹³Wua'udde mala'ekatta ai'annume nattiuppa trompeti tou. Ne i ya'u naaringikka tingikka nirumanta wuassu appatu pabbuuannu Mezbah wul᷊awanna apan uaraddo su saruannu Ruata.

¹⁴Tingikka udde nabbisara su mala'ekatta aiannume udde, “Pallosa'a sire appata mala'ekatta apan raṛṛapusanna su Sal᷊ukku Efrat udde!”

¹⁵See sire appata mala'ekatta udde nipallose. I mangitou suete nisaddia mandiaga orassa, allo, wul᷊anna wuṛṛu tonna, udde hunane ipamate sepertiga wuassu anambon taumata.

¹⁶I ya'u niwal᷊oanna manungku reengannu tantara uasa'e awal᷊o udde dua ṛasutta su jutane anambone.

¹⁷Wuṛṛu sulal᷊ummu aellega, i ya'u naasilo manga awal᷊o udde wuṛṛu manga sumasa'ene. Manga sumasa'ene ual᷊uṛṛen laubba atta'a maṛṛamu lukkenggama, ma'elomma naal᷊ihidda watu nilam, wuṛṛu maririkka naal᷊ihidda belerangnga. Pua manga awal᷊o udde naal᷊ihidda puan singa, wuṛṛu wuassu moṛṛonge sussabbanga putungnga, timbula, wuṛṛu belerangnga.

¹⁸Sepertiga wuassu anambon taumata, nipaten tatallu asasusa udde; eteudde putungnga, timbula, wuṛṛu belerangnga apan sinumabbanga wuassu moṛṛongu manga awal᷊o udde.

¹⁹Atatohassu manga awal᷊o udde uaraddo su moṛṛonge wuṛṛu lai su tol᷊ene. Manga tol᷊ene naal᷊ihidda atoanna pia puane. Ringannu tol᷊ene udde, manga awal᷊o mannansara taumata.

²⁰Arawe lambem walahannu taumata apan tawe nipate manga asasusa udde, tawe lai manantangngu lanna'u lima mangitou sassane. I mangitou tawe illol᷊one massubba manga ghaṛṛaho lal᷊eo wuṛṛu manga paal᷊uanna wul᷊awanna, sal᷊a'a, witu'a, watu wuṛṛu alu apan tawe maasilo wuṛṛu tawe maaringikka, ara'e lai maa'amatta.

²¹I mangitou lai tawe manantangngu manga inolaanni mangitou apan lal᷊eo, eteudde pamamate, wal᷊iimmata, pasasandaga wuṛṛu panana'o.