Read Talaud RUT 3 Bible Online

RUT 3 - Talaud bible

RUT 3

¹Manga pira tempo wua'udde, i Naomi nabbisara si Rut, “I ya'u ṛinone maṛṛingidda tadea'u i'o wotongnge pia pamamanua apia wuṛṛu tadea'u su al᷊al᷊uassa.

²I'o mammanara suadio'a ringannu manga wawine su wailli Boas, are? Ne, i Boas udde tuṛṛangngi ite. Nariaddi paddaringikka! Ṛabbi indi i tou sarun inai maṛṛinda ganduma su wawail᷊anne.

³Orassa indi pandenote i'o, pamuṛaten manga lana mawangngi, wuṛṛu luṛṛea'e laungngu apan apianne. Ana see roote su tampan Boas tantal᷊anna mammanara mannontongngu gandumma wuassu raene. Paṛṛadote isudde ma'oman sara i tou nasute niumanna wuṛṛu na'inumma, arawe arie ma'oman sara i tou maasingkata manungku io lai poiaroddi.

⁴Paatutuṛṛe su tampa suapa i tou inai matiilla. Amungkangngu i tou niamatiil᷊ante, inaite isudde wuṛṛu luatte nasane, ana see atiille maranin leddane. I tou sarun mamasingkata si'o apan ṛinone sarun olaannu.”

⁵“Ore, Mama,” sasimbakki Rut, “i ya'u sarun tumuṛṛutta sarangkanambone apan niwal᷊on Mama.”

⁶Ne i Rut inaite watukku tampan taumata mammanara mannontongu watun ganduma wuassu raene. Poiaroddi i tou na'ola'a sarangkanambone apan nirolokku la'iananne.

⁷Napawe i Boas buatte niumanna wuṛṛu na'inumma, i tou naapendamma aaul᷊e wuṛṛu mal᷊uassa naungnge. Ana see i tou inaite matiilla maranin gandumma ua'ombo. Ringannu mal᷊anna-l᷊annabba i Rut nirumanta wuṛṛu namu'a nasan Boas, wua'udde natiilla maranin leddane.

⁸Ṛabbi mattangnga inaṛṛombanganne i Boas napu'o wuṛṛu nabbilingnga. I tou niṛṛumoro naasilo pia sangkatou wawine mattiilla maranin leddane.

⁹“Isai i'o?” aiwal᷊on Boas. “I ya'u i Rut, Papa!” sasimbakki Rut. “Papa udde tuṛṛangngi yami ṛepessa apan ṛinone mamadul᷊i si ya'u. Doronganna i Papa mappulu'u olaanna awingngi Papa.”

¹⁰“Antimanna MAWU mangal᷊amatta si'o, ana'u,” unni Boas. “Isumandingnga ringannu sarangkanambone apan buatte niolangngu su la'ianannu, ne pallal᷊agunu orassa indi napal᷊iatta'u darangngu apan maggewal᷊anna lai. I'o mangke ta'e wotongnge maddea'a awingngu ta'e dario'a suwallatu taumata ala ara'e lai taumata asiangnga, arawe udde tawe niolangngu.

¹¹Ana waugu udde arie passinggawanga, Rut. Sarangkanambone apan nirorongannu udde sarun ta'u olaanna; ana waugu anambon taumata su soa indi masingkate manungku i'o sangkatou wawine apan mapia pallal᷊agune.

¹²Udde atonna, i ya'u ṛinone pia paaellega su wiakku, ana waugu i ya'u udde tuṛṛangngu ṛepessa. Arawe ta'e pia sangkatou lai waine apan ṛinone pia pa'aellega su ola'u wiakku. I tou uddewe tuṛṛangnga apan maddanianna wuassia'u.

¹³Ṛabbi indi i'o atana'e isindi asuene. Tiṛṛabbi marua'allo i ya'u maiwal᷊o tanne i tou mappulu mappaamattu manarane udde si'o ara'e maddiri. Amungkangngu mappulu, apianne; arawe amungkangngu i tou maddiri, ne i ya'u maddiandi sulal᷊ummu arannu Ruata apan biakka, i ya'u sarun mapaamattu manara udde. Orassa indi atiille isindi ma'oman sara marua allo.”

¹⁴Ne i Rut natiille isudde maranin leddan Boas. Tiṛṛabbine marua allo maṛṛanggapa, i Rut napu'ote tadea'u tawe asiloannu taumata. Ana waugu i Boas maddiri pia sangkatou apan maasingkatta manungku i Rut nirumanta su tampa udde.

¹⁵I Boas nabbisarate si Rut, “Pallosa'e aumbaingngu wuṛṛu ampaṛṛa'e isindi.” Ne i Rut namallosu aumbaingnge wuṛṛu niampakke. I Boas nalal᷊inna sulal᷊ummu aumbaingnga udde iraṛṛangngo ruan pul᷊o su kilone ganduma. Ana see i tou nanduitta su wambangngi Rut. Wua'udde i Boas inaite watukku soa.

¹⁶Napawe i Rut na'omate su wal᷊en, la'iananne naiwal᷊o, “Ereapa olangnge, ana'a?” Ne i Rut nabatti'u sarangkanambone apan niola'i Boas si tou.

¹⁷“Wuṛṛu” ana see unni Rut, “ewe'e ete i tou lai apan nangonggolu anambon ganduma indi si ya'u, ana waugu wisarane i ya'u tawe wotongnge mapul᷊e ringanni Mama ringannu lima tawe loṛṛone.”

¹⁸Ana see unni Naomi, “Ṛaddoite ana'a, ma'oman sara i'o maasilo ereapa olangnge indi pia pangudusanne. I Boas tawe matana'a mal᷊annaba tantal᷊anna i tou taambe nanginsue hatto indi allo indi lai.”