Read Talaud 1 SAMUEL 10 Bible Online

1 SAMUEL 10 - Talaud bible

1 SAMUEL 10

¹Wua'udde i Samuel nanganu awo'a apan lal᷊oṛṛoannu lanan zaitun, ana see lana udde nilal᷊inni Samuel su puan Saul, ana see i tou nangari'a si Saul lapiddu nabbisara, “MAWU buatte nanenegu maola'a ratun Israel walahan-Ne udde. I'o sarun mamarenta al᷊aṛṛanang-Nge wuṛṛu mangesakki mangitou wuassu manga seetti mangitou. Indi tatialane si'o manungku MAWU buatte namile si'o maola'a ratun al᷊aṛṛanang-Nge;

²Napawe i'o manantangkute su allo indi, i'o sarun massomban ruan katou esakka maranin labbingngi Rahel su Zelzah wageangngu leta'i Benyamin. Itarua sarun mabbal᷊o si'o, arendi: Manga keledai apan raddeaannu udde niasombangante. Orassa indi iamangngu tate suminggawanga su ola'u manga winatangnga udde, arawe sidutu ma'iwal᷊o apate ṛinone olaanne tadea'u maasangkalla si'o.”

³I Samuel nabbisara apia, “Wua' isudde i'o asal᷊ate amatta maddatingngu punnu alu patataṛṛamawuanna su Tabor. Poiaroddi i'o sarun massomban siri tallu esakka apan tantal᷊anna mattuda Betel inai mangonggollu sasamba su Ruata. Sangkatou ua'ehetta tatallu ana'u ambingnga, sangkatou lai uaapiddu tatallu su warene roti, wuṛṛu sangkatou lai uaapiddu pato'a wuassu pisi lal᷊oṛṛoannu anggore.

⁴I mangitou sarun mattabbea si'o wuṛṛu i'o sarun onggol᷊anni mangitoun tatallu roti wuṛṛu udde ṛinone sengkamannu.

⁵Wua'udde i'o ṛinone inai watukku wuiddu Ruata su Gibea, tampa paddasanannu taumatan Filistin. Su ngara suttanna su soa, i'o sarun massomban sangkammul᷊annu nabi apan sinumossokke wuassu wuidda pangangonggol᷊annu sasamba. I mangitou massal᷊aingnga wuṛṛu mangngintul᷊i, mannalangnga gambus, rebana, wansi wuṛṛu kecapi.

⁶Su orassa udde lai i'o sarun intaṛṛuannu Ghaṛṛahon MAWU wuṛṛu i'o lai sarun massal᷊aingnga wuṛṛu mangngintul᷊i, ana see i'o onggol᷊annu pallal᷊agu wakku na'oman sara maola'a taumata al᷊aṛṛaene.

⁷Napawe sarangkanambone udde matipusse, ola'e manara tumuṛṛuttu apendammu mapia, ana waugu Ruata uaṛundinganna si'o.

⁸Wua'udde i'o ṛinone inai watukku Gilgal wuṛṛu maṛṛaddo poiaroddi al᷊annune pitu allo. I ya'u sarun dumanta mangonggollu sasamba itattambunna wuṛṛu sasamban paddarame, see lai mamasingkatta si'o sarangkanambone apan ṛinone manarannu.”

⁹Tawe nal᷊annu napawe i Saul nanantangngi Samuel, i Saul nanengkamma pallal᷊aghu wakku wuassu Ruata. Wuṛṛu anambon watti'a apan niapasingkatti Samuel si tou nariaddi su allo udde lai.

¹⁰Sutempo i Saul wuṛṛu mangangimbene na'omate su Gibea, itarua nassomban ammul᷊annu nabi. Su orassa udde lai i Saul niintaṛṛoannu Ghaṛṛahon Duata, ne i tou nassal᷊aingnga wuṛṛu mangngintul᷊i suadio'a ringannu manga nabi udde.

¹¹Manga taumata apan masingkatti tou ro'en dorone, naasilo pallal᷊agune udde, ana see i mangitou ua'aiwal᷊ote, “Apate apan buatte nariaddi su ana'i Kish udde? Apa i Saul naola'a lai nabi?”

¹²Ana see sangkatou apan uatana'a isudde naiwal᷊o, “Ereapa ringannu manga nabi waine udde — tumuṛṛutta si yamiu isai iamangngi mangitou?” Eteudde panattaṛṛannu sasanato'a indi, “Apa i Saul maola'a lai nabi?”

¹³Napawe i Saul buatte nassal᷊aingnga wuṛṛu nangintul᷊i, i tou inaite watukku tampan sasamba su wowon buidda.

¹⁴Iamangnga tuari si Saul naasilo si tou wuṛṛu allangnge, i tou naiwal᷊o sitarua, “Wuassuapa iraddua?” I Saul sinumimbakka, “Maddea'a keledai apan nawul᷊i udde, ne napawe iambua tate maasomba, iambua inaite naisasomban Samuel.”

¹⁵“Wuṛṛu apate apan niwal᷊on Samuel si'o?” aiwal᷊on iamangnge tuari.

¹⁶I Saul sinumimbakka, “I tou namasingkatta manungku manga winatangnga udde niasombangante.” Arawe i Saul tawe nabbatti'a su iamangnge tuari manungku i tou buatte nitenegi Samuel naola'a ratu.

¹⁷Ne i Samuel namago tumana'u Israel tadea'u maammulla su Mizpa,

¹⁸wuṛṛu i tou nabbisara si mangitou, “Eteindi wisaran MAWU, Ruatan Israel, ‘I Ya'u buatte nangapiddi yamiu sinumabbangnga wuassu Mesir wuṛṛu namallossi yamiu wuassu taṛṛinon taumatan Mesir wuṛṛu al᷊awo'u walahanna waine apan mangngallangnga si yamiu.

¹⁹I Ya'u buatte namallossi yamiu wuassu anambon asansara wuṛṛu asasusa, arawe orassa indi Ya'u, Ruatanu nitol᷊a'i yamiu, ana waugu i yamiu maddorongnga tadea'u i Ya'u mangonggollu sangkatou ratu si yamiu. Ne aroddite, paammulle su saruang-Ku, Mawunu, tumuṛṛuttu walahanna wuṛṛu ṛuangannu.’ ”

²⁰Ana see i Samuel nandolokku anambon balahanna inai su saruanne wuṛṛu ruanganni Benyamin apan napile.

²¹Sutempo manga amonanna sulal᷊ummu walagi Benyamin udde nirolokka su saruanne, ne amonanni Matri apan napile. Panginsueanne inaite su saruanne manga esakka sulal᷊ummu amonanni Matri, wuṛṛu i Saul ana'i Kish apan napile. Ana see i mangitou naddea'a si Saul, arawe i tou tawe baddi'a.

²²Ana waugu udde manga taumata naiwal᷊o MAWU, “Oh MAWU, apa taumata udde isindite?” MAWU sinumimbakka, “i Saul uaimbuni su liuddu manga saranapa.”

²³Ana see ringannu mal᷊ihakka i mangitou nanal᷊oho si Saul wua isudde, wuṛṛu niapidda su pattangngannu tumana'u soa. Ne i Saul dirumarisikke suwallatti mangitou wuṛṛu ete i tou apan al᷊angkasanne; taumata waine tumba'u sara wambangnge.

²⁴Wua'udde i Samuel nabbisarate su tumana'u soa, “Eteindi taumata apan nipilen MAWU, taweddu panumandinganne suwallatti ite sarangkanambone.” Anambon walahanna udde hinumio, “Wiakke ratu!”

²⁵Wua'udde i Samuel nanal᷊a'a su walahanna udde su ola'u taṛṛino wuṛṛu manaran datu, ana see niwoṛṛetti tou sulal᷊ummu wuke apan niaddo su tampa susi. Wua'udde i Samuel nandolokku walahanna udde niapaapul᷊e su wal᷊en sangkatou-sangkatou.

²⁶I Saul napul᷊ete lai watukku wal᷊ene su Gibea, tatantalongannu manga pira taumata waṛṛani wuṛṛu naungnge buatte nial᷊ore MAWU.

²⁷Arawe manga pira taumata lal᷊eo nabbisara, “Ereapa wotongnge taumata indi pia gunane si ite?” I mangitou mangngadio'a si Saul wuṛṛu tawe mangapiddu aonggolla si tou. Arawe i tou mangngawusu wagga.