Read Talaud 1 SAMUEL 12 Bible Online

1 SAMUEL 12 - Talaud bible

1 SAMUEL 12

¹Ana see i Samuel nabbisarate su anambon walahannu Israel, “I ya'u buatte nanuungngu anambon darorongngu wuṛṛu namile sangkatou ratu si yamiu.

²Manattakka orassa indi ete i tou apan mamiaṛṛa'i yamiu. Pa'ellege, ya'u indi timmadete wuṛṛu piate owanna. I ya'u mal᷊annute uapiaṛṛa'i yamiu — ro'en ya'u ta'e dario'a naddatingngu orassa indi. Tatialane manungku manga ana'u udde mangkatinggakke.

³Orassa indi, ya'u uarisikka su saruanni yamiu! Amungkangu ya'u buatte na'ola'a al᷊al᷊eo, ansilete ya'u su saruannu MAWU wuṛṛu su saruannu ratu apan nipile-Ne. Apa ya'u buatte nanna'o sapi ara'e keledain taumata waine? Apa ya'u buatte nallinga ara'e mannansara ara'e mannengkamma roitta aonggolla? Wal᷊oa'e, tadea'u sarangkanambone apan ta'u nianu wotongnge iapawelengku.”

⁴Manga taumata udde sinumimbakka, “Tawe, taambe saran paassa i Papa nanganu saranapan taumata.”

⁵Ana see i Samuel nabbisarate, “Su allo indi MAWU wuṛṛu ratu apan nipile-Ne maola'a tatiala manungku ya'u tawe sal᷊a'u sarangkadio'a.” “Ore, atonna, MAWU maola'a matatialang kite,” sasimbakki mangitou.

⁶Ana see i Samuel nabbisara apia, “Ete MAWU apan namile si Musa wuṛṛu si Harun, wuṛṛu nangapiddu al᷊amonanu sinumabbangnga wuassu Mesir.

⁷Orassa indi ariete inai dorone. I ya'u sarun mangalaen kamiu su saruannu MAWU. Paanaungete anambon aakkannu MAWU apan buatte niapal᷊iatta'a si'o wuṛṛu su al᷊amonanu.

⁸Sutempo i Yakub wuṛṛu amonanne nirumanta su Mesir, wuṛṛu taumatan Mesir mannansara si mangitou, al᷊amonanu sinumal᷊ande naiontolla su MAWU, ne MAWU nandolokki Musa wuṛṛu i Harun. Ruan katou taumata udde nangapiddu al᷊amonanu sinumabbangnga wuassu Mesir wuṛṛu nantul᷊ungngi mangitou namanua su wanua indi.

⁹Arawe wua'udde i mangitou naabul᷊in MAWU, Ruatan mangitou, ana waugu udde I Tou namalan mangitou nipangaloanna wuṛṛu niawaddon Sisera, tembonannu tantaran Hazor, wuṛṛu taumatan Filistin wuṛṛu ratun Moab.

¹⁰Wua'udde i mangitou niumal᷊iomanna su MAWU wuṛṛu nanga'u rosan mangitou; wisarane, ‘Yami narosate ana waugu tinumal᷊iudda Si'o, oh MAWU, wuṛṛu yami lai massubba manga paal᷊uannu Monganni Baal wuṛṛu Asytoret. Arawe, orassa indi, sal᷊amatewe yami wuassu manga seetti yami, ne yami sidutu mattaṛṛamawu Si'o!’

¹¹Wua'udde MAWU nandolokki Gideon, ana see i Barak, wua'udde i Yefta, wuṛṛu panginsueanne ya'u. Yami sambau-sambau buatte namallossi yamiu wuassu seennu, na'oman sara i yamiu wotongnge mabbiakka mal᷊angnganna.

¹²Arawe sutempo i yamiu naasingkatta manungku i yamiu pangaloanten Nahas ratun Amon, i yamiu nanol᷊a'u MAWU ratunu udde wuṛṛu nabbisara si ya'u, ‘Yami maapulu parentannu sangkatou ratu.’ ”

¹³“Orassa indi, pa'ellege, ete i tou indi, ratu apan buatte nipilen kamiu udde. I yamiu buatte naddorongnga, wuṛṛu MAWU buatte nangonggolla si yamiu.

¹⁴Lal᷊umanna'a si yamiu amungkangu i yamiu mangngaddatta MAWU wuṛṛu mattaṛṛamawu si Tou, lapiddu maddaringikka wuṛṛu tuttuṛṛutta parenta-Ne, nangillembo lai amungkangu i yamiu wuṛṛu ratunu udde sidutu tuttuṛṛutta MAWU Ruatanu.

¹⁵Arawe, amungkangu i yamiu tawe maddaringikka MAWU, ewe'e lai lullawangnga parenta-Ne, i yamiu wuṛṛu ratunu sarun ro'apannu MAWU.

¹⁶Orassa indi daringiṛṛe apia! Panutukka al᷊aṛṛindu'a wahewalla apan sarun olaannu MAWU su saruannu matanu.

¹⁷I ya'u sarun sumal᷊ande MAWU, wuṛṛu salaiwe orassa indi tempon paddissa, MAWU sarun manossokku rallu'a wuṛṛu uranna apan maola'a sasimbakku aal᷊iomanku. Sutempo udde, i yamiu sarun maatutukka aroddi ahewalle rosanu su saruannu MAWU ana waugu naddorongnga sangkatou ratu.”

¹⁸Ana see i Samuel inumal᷊iomante, ne su allo udde lai MAWU nanossokku rallu'a wuṛṛu uranna. Anambon walahanna udde nata'uttu MAWU wuṛṛu i Samuel.

¹⁹Ana see i mangitou nabbisarate si Samuel, “Tul᷊unga'a, Papa, al᷊iomana'a yami su MAWU Ruatanu, tadea'u yami tawe mate. Orassa indi yami naatutukke manungku wuassu rosan kami dorone, yami lai buatte na'ola'a rosa apia ana waugu naddorongnga sangkatou ratu.”

²⁰I Samuel sinumimbakke lai, “Arie mata'utta, salaiwe i yamiu buatte na'ola'a al᷊al᷊eo udde, imbaṛṛangnga manantangngu MAWU, ewe'e sidutu pattaṛṛamawu si Tou ringannu ahewallu naungngu.

²¹Imbaṛṛangnga tumantalongnga manga monganna apan tawe maatul᷊ungnga wuṛṛu maasal᷊amatta si yamiu, ana waugu i mangitou udde tawe baddi'a.

²²MAWU buatte nassalu, manungku i Tou sarun tawe manantangngi yamiu ana waugu i Tou buatte nakkawessa ma'ola'a si yamiu al᷊aṛṛanang-Nge sassane.

²³Su ola'u watangangku, doronganna ya'u tawe lai marosa su saruannu MAWU ana waugu tawe niumal᷊iomanni yamiu. Arawe mawal᷊i'a lai ya'u sidutu mangngaṛṛa'a si yamiu inolaanna apan mapia wuṛṛu naṛṛino.

²⁴Pangaddatte MAWU wuṛṛu pattaṛṛamawute si Tou ringannu matammudda wuṛṛu ringannu ahewallu naungngu. Naungete manga inolaanna wahewalla apan buatte niolang-Nge si yamiu.

²⁵Arawe amungkangu i yamiu sidutu ma'ola'a rosa, ne i yamiu wuṛṛu ratunu sarun mate.”