Read Talaud 1 SAMUEL 16 Bible Online

1 SAMUEL 16 - Talaud bible

1 SAMUEL 16

¹Manga pira tempo wua'udde MAWU nabbisara si Samuel, “Ta'e sangkura lai al᷊annune i'o massusa ana waugu i Saul? Wal᷊inewe i tou tate nia'u naola'a sangkatou ratun Israel? Orassa indi, panganute lanan zaitun wuṛṛu roote watukku Betlehem, ringannu sangkatou aranne i Isai, ana waugu suwallattu sangkatou anangnge buatte Ta'u nipile maola'a ratu.”

²Arawe i Samuel naiwal᷊o, “Ereapa ṛinone ta'u olaanna? Amungkangu hatto indi aringiṛṛanni Saul, ya'u sarun pateanni tou!” MAWU sinumimbakka, “Apira'e sapi anangnge sambau, wuṛṛu wal᷊oa'a su tumana'u soa manungku i'o inai poiaroddi mangonggollu sasamba su MAWU.

³Ana see wal᷊oite paranta'a i Isai su darohan pangangonggollu sasamba udde. I Ya'u sarun mamasingkatta apa apan ṛinone olaannu. Taumata apan Ta'u nita'e si'o, ṛinone itenegu maola'a ratu.”

⁴I Samuel tinumuṛṛutte wisaran MAWU. Napawe i tou na'omate su Betlehem, manga piaṛṛa'u soa nanal᷊oho ringannu niṛṛumindu'a wuṛṛu naiwal᷊o, “Darantan Papa ini uaapiddu al᷊amatta?”

⁵I Samuel sinumimbakka, “Ore, atonna. I ya'u nirumanta mangonggollu sasamba su MAWU. Ne paawaresite watanganni yamiu tadea'u wotongnge maaranta su darohan sasamba udde.” Isai wuṛṛu manga anangnge lai nirolokka niapawaresi watanganne sambau-sambau wuṛṛu niaparanta su daroha udde.

⁶Napawe i mangitou naammulle wuṛṛu i Samuel naasilo si Eliab ana'i Isai, i tou naṛṛingidda, “Asinungka i tou indi sarun pileannu MAWU.”

⁷Arawe MAWU nabbisara si Samuel, “Arie i'o umanggangu al᷊aṛṛamage wuṛṛu wadangnge mal᷊angkassa; wal᷊ine i tou Ta'u pileanna. I Ya'u tawe ma'ellega wa'ikke, arawe i Ya'u ma'ellega naungnge.”

⁸Wua'udde Isai namago si Aminadab, anangnge, ana see nirolokka niapasaruanna si Samuel. Arawe i Samuel nabbisara, “I tou lai tawe niapilen MAWU.”

⁹Ana see i Syama nirolokki Isai niapasaruanna si Samuel arawe i Samuel nabbisara, “I tou lai tawe niapilen MAWU.”

¹⁰Etearoddi i Isai nandolokku siri pitu anangnge ualal᷊ol᷊ossa sinumaruanna si Samuel arawe i Samuel nabbisara si tou, “I mangitou tawe niapilen MAWU.”

¹¹Ana see i Samuel naiwal᷊ote si tou, “Tumba'u indi anangngu esakka?” I Isai sinumimbakka, “Ta'e pia sangkatou lai, iapa ṛembonne, arawe i tou tantal᷊anna uariaga domba.” I Samuel nabbisara, “Doloṛṛa'a pawaggoa'a i tou, ana waugu i ite taambe umanna amungkangu i tou taambe nirumanta.”

¹²Ana see i Isai nandolokken sangkatou niapawago ana'a udde. Wutte'e i tou sangkatou saṛṛen tumuwo apan matohassa wuṛṛu tawe sangkulle, wuṛṛu matane maṛṛansangnga. Ana see MAWU nabbisarate si Samuel, “Ete i tou indi; teneha'e i tou!”

¹³I Samuel lapiddu nanganu lanan zaitun wuṛṛu nanenegi Daud ringannu darohan pallal᷊ana su saruannu manga iaangnge. Su orassa udde lai i Daud niintaṛṛoannu Ghaṛṛahon MAWU. Nanattakka allo udde wuṛṛu su allo addantane Ghaṛṛahon MAWU sidutu uarundinganna si tou. Wua'udde i Samuel napul᷊ete watukku Rama.

¹⁴I Saul linantangngu Ghaṛṛahon MAWU, wuṛṛu orassa indi i tou assansarannu ghaṛaho lal᷊eo apan nirolokku MAWU.

¹⁵Ana waugu udde allangngi Saul nabbisara si tou, “Yami masingkatta manungku ghaṛaho lal᷊eo apan nirolokku MAWU manansara si Tuangnga.

¹⁶Amungkangu i Tuangnga mappulu, yami uasaddiate maddea'a sangkatou apan pande mannalangnga kecapi. Napawe Tuangnga sansarannu ghaṛaho lal᷊eo, taumata udde wotongnge mannalangnga kecapine, ne i Tuangnga maapendampe al᷊al᷊uassa apia.”

¹⁷Ana see i Saul nandolokki mangitou, “Paddea'e sangkatou apan pande mannalangnga musikka, wuṛṛu apira'e i tou inawarendi.”

¹⁸Naaringikka udde sangkatou allangnge nabbisara, “Isai, sangkatou taumatan Betlehem pia sangkatou ana'a esakka apan pande mannalangnga musikka. I tou waṛṛani wuṛṛu sangkatou taumata apan mapia. Wuṛṛu i tou lai matohassa see lai pande mabbisara, wuṛṛu MAWU sidutu mantul᷊ungngi tou.”

¹⁹Ne i Saul nandolokku daroloṛṛanna inai ringanni Isai uaapiddu tanata indi, “Doloṛṛa'a anangngu i Daud, apan uariaga manga dombanu udde sumaruanna si ya'u.”

²⁰Wua'udde i Isai nandiahi sambau keledai, ana see i tou nallurannu sambau ana'u ambinga, roti wuṛṛu pato'a wuassu pisi niloṛṛoannu anggore na'oman sara napene. Sarangkanambone udde niapaapidda si Daud iapaonggolla si Saul.

²¹Etearoddi i Daud nirumanta ringanni Saul wuṛṛu naola'a mangangimbene. I tou lembon arangnguanni Saul wuṛṛu nipile naola'a mangangapiddu ahidde.

²²Wua'udde i Saul napaapiddu tanata indi si Isai, “I ya'u marangngu si Daud. Wala'awe i tou sidutu matana'a isindi wuṛṛu mangngimbe si ya'u.”

²³Nanattakka orassa udde, napawe i Saul rantannu ghaṛaho lal᷊eo, i Daud lapiddu mannalangnga kecapine. Ne i Saul maapendampe matammudda wuṛṛu mal᷊uasse apia, ana waugu tinantangke ghaṛaho lal᷊eo udde.