Read Talaud 1 SAMUEL 18 Bible Online

1 SAMUEL 18 - Talaud bible

1 SAMUEL 18

¹Napawe i Saul wuṛṛu i Daud buatte naggahatto, i Daud nitenegi Saul maola'a mammamanarane wuṛṛu nanattakka allo udde i tou tawe niwala mapul᷊e su wal᷊en hagurangnge. I Yonatan esakka ana'i Saul, naaringikka hatto udde. I tou lai ninumemman Daud, wuṛṛu nandangngu ere lai watanganne sassane.

³Ana waugu udde i Yonatan nassalu sarun maggawe Daud saran mal᷊annu-l᷊annu.

⁴I Yonatan nalluatta laungnge ana see nionggolla si Daud, see lai laubbu pangalone lapiddu hal᷊elene, anaanne wuṛṛu wawa'issu lawanne.

⁵I Daud mammanara ringannu mapia al᷊awo'u manara apan nionggolli Saul si tou. Ana waugu udde i tou nitenegi Saul naola'a piaṛṛa'u tantarane, wuṛṛu i Daud nia'un anambon tantara wuṛṛu manga allangngi Saul.

⁶Sutempo i Daud nabelengnga wuassu namaddon Goliat taumatan Filistin udde, wuṛṛu manga tantara apan uawarissa sumutta watukku soa, manga wawine sinumabbangnga wuassu anambon soa su Israel tadea'u manal᷊oho si Ratu Saul. I mangitou mangngantarin aantarin lal᷊uassa wuṛṛu massal᷊aingnga ringannu manalangnga rebana wuṛṛu kecapi.

⁷Lapiddu massal᷊aingnga manga wawine udde mangngantari arendi, “I Saul namate seetta suṛṛiwune, arawe i Daud su pul᷊o ṛiwune.”

⁸Naaringikka aantari udde i Saul mangke nasa'u. Ana waugu i tou naṛṛingidda, “I Daud buatte namate su pul᷊o ṛiwune, arawe ya'u tumba'u su ṛiwune. Tate mal᷊annu lai asinungka i tou olaanna ratun mangitou!”

⁹Nanattakka allo udde i tou maddantinten Daud.

¹⁰Tiṛṛabbine allo i Saul sulal᷊ummu wal᷊ene tantal᷊anna uaagassa sambeangnga wuṛṛu inaṛṛombanganne i tou nirantannu ghaṛaho lal᷊eo apan nirolokku Ruata, na'oman sara i tou mandona naal᷊ihidda taumata wewa. Tempo udde i Daud tantal᷊anna mannalangnga kecapi ere mamiallo.

¹¹“Sambeangnga indi ta'u ipansakka sambeangnga indi si Daud ma'oman sara mallapassa su darandungnga!” ṛingiddi Saul, ana see i tou namanta'u sambeangnga udde paarua si Daud, arawe i Daud ma'al᷊inda'a.

¹²I Saul naapendamma manungku i Daud rariagannu MAWU, ewe'e i tou sassane tinantangngu MAWU. Ana waugu udde i tou matta'utti Daud.

¹³Ne i tou namambangnga si Daud wuassu lal᷊ummu wal᷊en araratuanna, wuṛṛu i tou nipile naola'a tembonannu tantara saṛṛiwu su atoune. Ringannu aroddi i Daud uapiaṛṛa'u tantarane su al᷊awo'u pangalo.

¹⁴I tou mammanara ringannu mapia, ana waugu MAWU mantul᷊ungngi tou.

¹⁵Napawe i Saul naasilo manungku i Daud sidutu ma'ola'a manarane, ne i tou lembon matta'utta.

¹⁶Arawe ahewallu Israel wuṛṛu Yehuda marangngu si Daud ana waugu i tou piaṛṛa'a apan manambo inasaharanne.

¹⁷I Saul manggol᷊aga tadea'u i Daud pateannu taumatan Filistin sulal᷊ummu pangalo ana see wal᷊ine i tou apan namate. Nariaddi su allo sambau i Saul nabbisara si Daud, “I Merab ana'u maṛṛuala pahul᷊une, ta'u iṛṛino si'o, sawal᷊iate i'o mamasilon awawaṛṛaninu sul᷊ummu pangalo ana waugu MAWU.”

¹⁸Daud sinumimbakka, “Isai allangngu indi, wuṛṛu apate amonannu iamangngu allangngu su Israel, na'oman sara allangngu maola'a mananambon datu?”

¹⁹Arawe sutempo nia'omante tempone i Merab iawingngi Daud, inauranna maṛṛuala udde niawingken Adriel wuassu Mehola.

²⁰I Mikhal ana'i Saul maṛṛuala waine pian naungnga si Daud. Napawe i Saul naaringikka olangnge udde, i tou naapul᷊ute lai.

²¹I tou maṛṛingidda, “Mapianne i Mikhal ta'u iṛṛino si Daud tadea'u i Daud aratinganna wuṛṛu pateannu taumatan Filistin.” Nariaddi su aruane i Saul nabbisara si Daud, “Orassa indi i'o wotongnge maola'a mananambo'u.”

²²Wua'udde i tou nandolokku manga mammamanarane tadea'u iapawal᷊o si Daud ringannu mal᷊anna-l᷊annabba, arendi, “i Tuangnga marangngu si'o aroddi lai manga mammamanarane; nariaddi ete orassa indi tempone apan mapia si'o ma'awingngu anangnge maṛṛuala udde.”

²³Arawe sutempo i mangitou namasingkattu tatantiro udde si Daud, i tou sinumimbakka, “Supahin kamiu mal᷊uassa maola'a mananambon ratu? I ya'u indi taumata asiangnga wuṛṛu tawe gunane!”

²⁴Manga mammamanarane udde namasingkatta si Saul sasimbakki Daud udde,

²⁵ana see i Saul nandolokki mangitou niapawal᷊o si Daud, arendi, “Apan pappandumanni tuangnga maola'a wansan awingnga tumba'u 100 su waune pentakku pisi tawun taumatan Filistin, maola'a sambau wawal᷊issa su seetti tuangnga.” (Indi hol᷊agi Saul ipamate si Daud tadea'u isondo su taumatan Filistin.)

²⁶Manga mara mamanaran Saul namasingkattu tanata indi si Daud, ne i Daud nanengkamma darorongngu ratu. Ana waugu udde, tantal᷊anna panginsueannu tempo taambe nappussa, i tou inaite ringannu tantarane watukku leta'u Filistin. I tou namate 200 su atoune taumatan Filistin, ana see i tou nanganu pisin tawun mangitou, ana see nionggolli tou si Saul ringannu tawe nahaingnga saran sambau. Wua'udde i Saul nangawingngi Mikhal si Daud.

²⁸Etearoddi i Saul naatutukka manungku i Daud lal᷊u'arannu MAWU see lai i Mikhal ana'i Saul maṛṛuala marangngu si tou.

²⁹Ne i tou lembon matta'utti Daud ne i tou maddantinten Daud su al᷊o'engngu pabbiaṛṛanne.

³⁰Mangke masokka napawe tantaran Filistin rumanta mamangalo, i Daud sidutu maauntungnga mamate si mangitou wuassu manga tembonannu tantaran Saul apan waine. Ne i Daud lembon tinumelengke.