Read Talaud 1 SAMUEL 20 Bible Online

1 SAMUEL 20 - Talaud bible

1 SAMUEL 20

¹Ne i Daud tinumal᷊angke wuassu Nayot maranin Rama wuṛṛu inaite naisasomban Yonatan, ana see naiwal᷊o, “Apa pasasal᷊a'u? Al᷊al᷊eo apa apan buatte ta'u niola'a wuṛṛu apa rosa'u su saruannu iamangngu na'oman sara i tou maapulu mamate si ya'u?”

²I Yonatan sinumimbakka, “Arie pabbisara aroddi! Ringannu arannu MAWU, i'o tawe pateanna. Iamangku sidutu mammasingkattu pandumanne si ya'u, mawae udde ahunanne, aroddi lai tawe. Nariaddi tawe suṛṛinone iamangku mangaddappingngu pandumanne udde si ya'u. Ana waugu udde sarangkanambone apan iwabbisaranu udde wahia!”

³I Daud sinumimbakka, “Iamangngu masingkatta atonna manungku i'o marangngu si ya'u. Nariaddi i tou sarun tawe mamasingkattu olangnge udde si'o tadea'u i'o tawe masusa. Salaiwe ereapa, ringannu arannu MAWU apan biakka, mangke atonna wia'u indi naal᷊ihidda tallukka su pentakku tatandu'a!”

⁴Ana see i Yonatan nabbisarate, “Walate i'o maddorongnga, sarun ta'u tuṛṛutanna.”

⁵I Daud sinumimbakka, “Arendi, tiṛṛabbi uddewe Andeangngu Wul᷊anna Wakku, wuṛṛu ṛinone ya'u umanna su sambau ringanni Tuangnga. Arawe amungkangu i'o ma'apulu, ya'u sarun inai wuṛṛu ma'imbuni su wadda'a maddatingngu tillorega ṛabbine.

⁶Napawe iamangngu maiwal᷊o anio ya'u tawe nirumanta, wal᷊oa'e si tou, manungku ya'u lai buatte nabbal᷊o si'o inaite mapul᷊e su Betlehem, ana waugu poiaroddi ma'ola'a daroha sasamban tonna su anambon amonangku.

⁷Napawe ratu mabbisara, ‘Aroddite,’ ne ya'u sarun matammudda, arawe amungkangu i tou masa'u, ṛinone i'o masingkatta manungku i tou buatte nakkawessa manilaka si ya'u.

⁸I ya'u maitul᷊ungnga si'o, ana waugu iaddua buatte naddiandi su saruannu MAWU. Arawe amungkangu ya'u nassal᷊a, patete ya'u, arawe ya'u ari'e itantillu su iamangngu.”

⁹I Yonatan sinumimbakka, “Arie passinggawanga! Amungkangu ya'u maasingkatta ringannu atonna manungku iamangku pia naungnga manilaka si'o, ya'u sarun mamasingkatta si'o.”

¹⁰Wua'udde i Daud naiwal᷊o, “Isai sarun mamasingkatta si ya'u amungkangu unnuwisara iamangngu sinumimbakka ringannu maṛṛagissa?”

¹¹“Wette iaddua inaite watukku wadda'a,” wisaran Yonatan. Ne itarua inaite suadio'a watukku wadda'a.

¹²Ana see i Yonatan nabbisara si Daud, “Doronganna MAWU, Ruatan Israel maola'a matatialan kadua! Tiṛṛabbi marua'allo ara'e tillorega iraṛṛangngo tempone lai ere orassa indi, ya'u sarun mattinsahadda maddea'a maasingkatta lal᷊oṛṛon naungngu iamangku. Amungkangu i tou mapia si'o, ya'u sarun mapaapiddu watti'a si'o.

¹³Amungkangu i tou pia pandumma manilaka si'o, sarun ta'u iapasingkatta si'o lai tadea'u i'o wotongnge maapanal᷊amatta watangannu. Doronganna MAWU mamate si ya'u amungkangu olangnge udde tawe ta'u olaanna. Antimanna MAWU mantul᷊ungngu ere lai i Tou buatte nitul᷊ungngu lai!

¹⁴Wuṛṛu amungkangu ya'u ta'e wiakka, paanaunge paairen kadua su saruannu MAWU wuṛṛu paatuṛṛutta si ya'u; arawe amungkangu ya'u nawul᷊ite,

¹⁵papal᷊iatta'a'e tatuṛṛunnu su papapulungku saran mal᷊annu-l᷊annu. Wuṛṛu napawe MAWU mamate anambon seennu,

¹⁶ariewe pa'airen kadua indi mabbassutta. Amungkangu nabassutte, ete MAWU apan sarun makkuumannu.”

¹⁷Nariaddi su aruane i Yonatan nandolokki Daud naddiandi sarun mandangngu si tou, ana waugu i tou marangngu si Daud ere watanganne lai sassane.

¹⁸Wua'udde i Yonatan nabbisarate si tou, “Tiṛṛabbi Andeangngu Wul᷊anna Wakku. Sarun asingkatanna manungku i'o tawe nirumanta, ana waugu tampanu tawe loṛṛone su meddan kanna,

¹⁹nangillembote lai tillorega! Ana waugu udde, roote su tampa pa'imbunianna apan dorone udde, wuṛṛu pakkangatte su liuddu watu ua'ombo isudde.

²⁰Tillorega ya'u sarun mamiti'u tatallu su wuana anaanna watukku watu udde, paṛṛimaunapa ya'u mammiti'a isudde.

²¹Ana see ya'u mandolokku allangku iapapurutta manga anaanna udde, wuṛṛu amungkangu ya'u nabbisara si tou, ‘Ei, anaanna udde maddanianna inawarendi; anute,’ udde tatialane manungku i'o mal᷊angnganna wuṛṛu wotongngete sumabbangnga. I ya'u massalu ringannu arannu MAWU apan biakka manungku i'o tawe sulal᷊ummu asasilaka.

²²Arawe amungkangu ya'u mabbisara allangku, ‘Ei anaanna udde marau poiaroddi,’ udde atappasanne MAWU mandolokku massal᷊iu; nariaddi amatte.

²³Doronganna MAWU mallu'adda tadea'u i ite sarangkal᷊o'enge uaagassa paairen kadua.”

²⁴Ne i Daud na'imbunite su wadda'a. Su Andeangngu Wul᷊anna Wakku, i Ratu Saul nirumanta su andeangnga.

²⁵Ere lai su inanaramanne i tou ua'ianna maranin darandungnga; i Yonatan niuma'ianna su saruanne, i Abner uasamban si Saul, arawe adderan Daud sidutu tawe loṛṛone.

²⁶Arawe i Saul nangaitta olangnge udde su allo udde, ana waugu i tou maṛṛingidda, “Asinungka i tou pia limbanne, na'oman sara i tou tawe waresi tumuṛṛuttu titan agama.”

²⁷Su allo manansunna, eteudde allo aruane su Wul᷊anna Wakku, adderan Daud ta'e lai tawe loṛṛone, ana see i Saul naiwal᷊ote si Yonatan, “Anio na'aṛṛabbi wuṛṛu allo indi i Daud tawe nirumanta su andeangnga?”

²⁸I Yonatan sinumimbakka, “I tou buatte nabbal᷊o si ya'u inai su Betlehem.

²⁹Unni tou, ‘Wala'awe ya'u inai, ana waugu manga tuṛṛangku tantal᷊anna maddamea andeangngu sasamba su Betlehem, wuṛṛu ya'u niaparantan iaangku. Ana waugu udde, napawe iwalanu, ya'u sarun inai maisaomba manga tuṛṛangku.’ Ana waugu udde i tou tawe naaranta su andeangnga indi, Papa.”

³⁰Naaringikka udde i Saul mangke nasa'u si Yonatan wuṛṛu nabbisara si tou, “Ana'u palli! Orassa indi ya'u masingkatta manungku i'o uasamba'a si Daud wuṛṛu namansili si'o wuṛṛu si mamanu!

³¹I'o tawe maatutukka manungku su al᷊annunete i Daud mabbiakka, i'o tawe maola'a ratu su wanua indi? Orassa indi doloṛṛa'e taumata maddea'a si tou ana see apira'e inawarendi, ana waugu i tou ṛinone mate!”

³²I Yonatan sinumimbakka, “Anio i tou ṛinone pateanna? apate rosane?”

³³Naaringikka udde i Saul namanta'u sambeangnga ipamate si Yonatan. Ne i Yonatan masingkatte manungku iamangnge atonna-tonna pia naungnga mamate si Daud.

³⁴Ringannu nasa'u atonna i Yonatan nanantangngu meddan andeangnga tawe niumanna manga apa su allo aruane Andeangngu Wul᷊anna Wakku udde. I tou mangke maṛṛingiddi Daud apan buatte nial᷊uandahanni Saul iamangnge.

³⁵Tiṛṛabbine allo i Yonatan inaite watukku wadda'a maisasomban Daud ere buatte nipa'iren tarua suadio'a. I tou nangapiddu sangkatou ana'a esakka, allangnge

³⁶ana see nabbisara si tou, “Otte, purutte manga anaanna apan sarun ta'u ipiti'a.” Tantal᷊anna ana'a udde tuttal᷊angnga, Yonatan namiti'u sambau anaanna nanampal᷊iu ana'a udde.

³⁷Napawe ana'a udde na'omate sutampa niaemaannu anaanna udde, Yonatan niumui si tou, “Ei, anaanna udde marau poiaroddi!

³⁸Paal᷊ihakka addio'a, arie paṛṛingidda marau!” Ana'a udde namurutta anaanna ana see nabelengnga ringannu mawune.

³⁹I tou tawe naasunna pandumannu manga wisaran Yonatan udde, tumba'u i Yonatan wuṛṛu i Daud apan masingkatta.

⁴⁰Wua'udde i Yonatan nangonggollu papiti'a su ana'a udde ana see i tou nirolokka niapawelengnga apia watukku soa.

⁴¹Napawe ana'a udde napul᷊ete, i Daud sinumabbangnga wuassu liuddu watu ua'ombo udde, ana see niumal᷊intudda paatallu. Mawae i tou ara'e i Yonatan, itarua lulluai sutempo itarua uaa'ari'a. Asasusan Daud maggewal᷊anna wuassu asasusan Yonatan.

⁴²Wua'udde i Yonatan nabbisarate si Daud, “Doronganna Ruata mantul᷊ungngu. MAWU sarun mallu'adda manungku iaddua wuṛṛu papapulunni addua sidutu uaagassa paairen kadua su saruannu Ruata.” Wua'udde i Daud niumamatte, wuṛṛu i Yonatan napul᷊ete lai watukku soa.