Read Talaud 1 SAMUEL 21 Bible Online

1 SAMUEL 21 - Talaud bible

1 SAMUEL 21

¹Ne i Daud inaite ringanni Imam Ahimelekh su Nob. Ringannu niṛṛumoro i Ahimelekh sinumabbangnga naisasomban Daud lapiddu naiwal᷊o si tou, “Anio i'o sassane nirumanta?”

²I Daud sinumimbakka, “I ya'u buatte tinantil᷊anni tuanga datu sambau manara wuṛṛu imbaṛṛangnga iapasingkatta su saran sangkatou manara udde. Ana waugu udde mallal᷊aṛenggengku ta'u nirolokka niapaṛṛaddo si ya'u su sambau tampa.

³Maddorongnga ampunga, orassa indi ya'u maiwal᷊o, i Papa pia anna apa? I ya'u onggol᷊ewe lima su waune roti ara'e walate pia apa isindi.”

⁴Ana see imam udde nabbisara, “I ya'u tawe roti wiasa, tumba'u roti sasamba indi; i'o wotongnge manganu, sawal᷊iate mallal᷊aṛenggenu tawe na'ola'a patatamba wakku-wakku indi.”

⁵I Daud sinumimbakka, “I mangitou tawe na'ola'a patatamba udde. Sidutu sauapawe yami mammanara, allangku mandiaga tadea'u i mangitou waresi tumuṛṛuttu agana, wutte'e wiasane udde tumba'u manga manara wiasa; nangillembo lai manara apan al᷊aṛṛaene orassa indi!”

⁶Ana see imam udde nangonggollu roti sasamba udde si Daud, ana waugu si tou tumba'u roti apan ionggolla su Ruata, wuṛṛu buatte nianu wuassu mezbah tadea'u hantiannu roti wakku. (

⁷Inauranna, i Doëg taumatan Edom, piaṛṛa'u mallal᷊u'addu winatangngi Saul isudde lai su allo udde mappaamattu atorannu agama.)

⁸Wua'udde i Daud naiwal᷊ote si Ahimelekh, “Apa i Papa uasahipunna sambeangnga ara'e hal᷊ele apan wotongnge ta'u ipaatta? Parentan Tuangnga udde tumaniten namaṛṛoro, na'oman sara ya'u niumamatta ringannu uasasaṛṛawutta wuṛṛu tate tempo ipanganu hal᷊ele ara'e ahidda waine.”

⁹Ana see i Ahimelekh sinumimbakka, “I ya'u uasahipunna hal᷊elen Goliat, taumatan Filistin apan buatte nipatenu su Wawal᷊annu Ela udde; hal᷊ele udde poi su liuddu efod, papi'unannu mal᷊aṛṛenessa. Amungkangu i'o mappulu, anute, ana waugu tumba'u udde ahidda apan uaraddo isindi.” Daud nabbisara, “Hal᷊ele udde hal᷊ele apan apianne su ahewallu wanua, onggol᷊a'e udde si ya'u!”

¹⁰Su allo udde lai i Daud tinumal᷊angngu watanganne wuassi Saul, ana see na'omate ringanni Akhis ratun soa Gat.

¹¹Manga mandariagane namasingkatta si Akhis arendi, “Wal᷊inewe i tou indi i Daud, ratu su wanuane? Wuṛṛu wal᷊inewe tumba'u si tou manga wawine tempo udde massal᷊aingnga lapiddu mangngantari arendi, ‘i Saul namate seetta suṛṛiwune, arawe i Daud su pul᷊o ṛiwune?’ ”

¹²Manga wisara udde naasongkaka ṛingiranni Daud, ne i tou nata'utten Ratu Akhis.

¹³Ana waugu udde, su saruannu awadaalla i Daud namahia wewa. Sutempo i mangitou maannamma manaṛṛangnga, i tou ere ola'u tawe ṛingiranna; i tou mangngaṛṛudda ngaran soa wuṛṛu namalan luṛṛone mangngelekka su omengnge.

¹⁴Ana see i Akhis nabbisara su mammamarane, “Apa i yamiu tawe maasilo manungku taumata indi wewa? Anio iapiddi yamiu inawarendi?

¹⁵Ta'e matul᷊ungnga taumata apan tawe bewane marani'u, na'oman sara i yamiu nangapiddu sangkatou taumata wewa su wal᷊e'u indi?”